HECHOS 25
25
1Festo bajjani dejja emeshimese judiocuana huoojeapoquiajji epojji nequihua'yapoa. Majoya aje oya tres cahuime huiso Cesarea meshijo nequi'yo poquiapoa Jerusalén meshiyasijje. 2Eyacuiñajjija equi-aijo chacochacopoquiani etii poanicuaa, pea judío etii poanicuaa pea-ai majo nequiya emeshimese poeje bacapoa. Majoya aje ma dejjacuaaya emeshimese huohuicapoa Pablojo jama ba'a: —Pablohua romanoja etehuecuana huohuitaicani.— 3Judío etiicuaa emeshimese Festo huohuiajjaneineicapoa oja Pablo yemeejjijo Jerusalén meshiyasijje. Etiicuana jjashahuabaquiapoa Pablo ejeojjijje poquiajo quehuacuiacaje'yo cuaa. 4Judío etiicuaa oya jama huohuiajjame acajo emeshimese Festohua acapoa ba'a: —Oya Pablo ca Cesarea meshijo ejeanobiatii eyaya animeeje. Majoya eya iyecahuihuiso jjayejjequiajo cuamaya poquije'yo.— 5Emeshimese jama pea-ai poa etiicuananijje ba'a: —Miquiana becacuana judío dejja etii poanicuana caca enijje poquicajji Cesarea meshiyasijje o baa, eya oja mimishi huohuiya. Majo nequiya aje quiaa eya huohuineiñaquije yajja oya queamimishi ponequinaje— jamaya poa.
6Festo Jerusalén meshijotii nequiapoa so'o beshahuanei diez cahuime huiso esohui jama amajje. Majoya aje oya poqui'yapoa Cesarea meshiyasijje. Pea pojjajo oja meshijo aniñaqui'yomajje o quii-anijjijo anioqueapoa. Majo aniya ohuaya huohuicapoa Pablo jjequijjijo ojaya o ebajji. 7Majoya aje Pablo emeshimese aniyasijje nobiñaje bamajje judío etii poanicuana Jerusalén meshijo nequi poecuana jjanequichipiquiapoa Pablojo. Pablo queatainee miminaje esohui acapoa cuaa. Jamatii oya e'ejojonei jamaya queatai miminaje bajjimanei poa cuanaja ojaya ecojjaa. 8Etiicuaa oya siajje acajje Pablo mimiapoa ojjañaja queaja'a eshajja-ajjajji oya. Jama acapoa cuana Pablohua ba'a: —Eya caca iña queatai mimime pojjima', esohui queatai ecuea ajjima' Eyacuiñajjija esohui Moisesja tehuecuanajo. Judioja equi-ai queapamejo pea-ai esohui queatai ecuea ajjima'. Roma emeshimese dejjajo pea-ai ecuea esohui queatai ajjima'nei.—
9Majoya aje emeshimese Festohua judiocuana queabihui pojji onijje Pablo huohuiajjacapoa jama ba'a: —¿A'a cuae mi Jerusalén meshiyasijje poquisapoani? Majo nequiya aje mi eyaya baneineije a'a miya queatai ponequinaje queaja'a ecuea ehuohui'yojji.—
10Ohua jama acajje Pablohua saja-acapoa jama ba'a: —Chojja, eya cuamaya poquisapo-ajja. Eya mijo Roma emeshimeseja nequimee dejja etii poanija cojjaneijo nequi jjeya. Quiojotiiya ca miquea ca oe a'a eya queamimishi poanaje bacajji. Miquea ebanei enijje judiocuananijje queamimishi pojjima'nei. 11Eya judiocuananijje queamimishinee ponequinajejojjemo eya jjeya manomee'yome cuaa, eya ejjanahuemeequi'yojji pojjeama pome. Jamatii nequi ajeo emanomee'yojji. Ojaya esohui ejo siajje acani cuaa miquea bacajji. Jamajjeya eya cuamaya Jerusalenyasijje poquisapo-ajja. Eyaya miya huohuiajjaña Roma emeshimese dejjaja eya ebajjijo a'a eya e'ejojonei queatai ponequinaje oja huohui'yojji.—
12Pablo jama poani shajja-ajjamajje emeshimese Festo dejjacuana queasapaja'anijje mimimimiapoa. Ojee oopana mimimajje oya jama poa Pablonijje ba'a: —Miyaya huohuiajjanaje Roma emeshimese dejjaja miya ebaneijjijo a'a queatai ponequinaje oja huohui'yojji. Jamajjeya eyaya miya cuamaya Roma emeshimese nequiyasijje huoojeaje.—
13Majoya aje quijje iyecahuihuiso jjayejjequiajo pea emeshimese Agripa bajjani, oe epona Berenice bajjani pea-ai poquiapoa Cesarea meshiyasijje Festo baa onijje mimiya. 14Oja equijo queacahuihuisopishana anijo emeshimese Festohua huohuica'yapoa cuana Pablojo. Jama acapoa ojo ba'a: —Jiquiojo oe dejja yani Felixja emeshimese nequija jeanobiamee. 15Eya Jerusalén meshijo nequijo Eyacuiñajjija equi-aijo chacochacopoquiani etii poanicuaa, pea judío etii poanicuaa pea-ai eya esohui acanaje Pablojo oya queatainee mimiani judío etiiquianaja tehuecuanajo. Ma dejjacuaaya eya papeni tehuemeesa-acanaje o manomee'yojji. 16Eyaya huohuinaje cuana Roma emeshimeseja nequimee dejja etii poanija jamatii peacuana manomeeca'yoajja. Ebionei joya dejja onaja iñaca'amee pea o queamimishi bajji poanajecuanaja cojjaneijo nequimeecajji. Majoya oja cojjaneijo nequimeeajo joya eiñaca'a dejja huohuicaje'yo ajeo oya jama acanaje cuaa ejjanahuequijji. Majoya Roma dejja etii poaniya oya queaja'a huohuicaje'yo a'a oya manomeeca'yojji, a'a poquica'yojji oja esohui shajja-ajjamajje. 17Judiocuana jiquiacua poeajo eyaya ma dejja jeacuayameecuajinaje a'a oya queatai ponequinaje ebajji judiocuana nequi cojjaneijo. Jamajjeya e quii-anijjijo anioquecuajinaje yajja ohua esohui acaje ojo eshajja-ajjajji. 18Majoya o queatai ponequinaje bajji epocuaa huohuica'yonaje oja mimishicuana. Ma e jjashahuabaquinaje jama huohuicaje'yo cuaa ca jama ajjima'nei poanaje cuanaja. Chama'neinei oja mimishi Roma emeshimeseja esohui etehuejo. 19Judiocuaa caca oe huohuica'yonaje oya queatainee mimiani oja etiiiquianaja esohuijo. Oe dejja pa Jesosa bajjani emano'yo jaa shequi'yonaje Pablohua huohuicani. Oya eshe nequi'yo jjeya huohuicani pea-ai cuana coma dejjaaya. 20Ecuea bajjimanei poanaje yajja oya acajji, ¿ajeo oya manomeeca'yojji? Jamajjeya eyaya oya huohuiajjanaje a'a oya poquisapoaje Jerusalén meshiyasijje majotii nequi dejja etiicuanaja a'a oya queamimishi poani ebajji. 21Pablohua caca oe eya huohuiajjaneicanaje Roma emeshimese dejjaque epoquijji. Roma emeshimeseya Cesar bajjaniya oya baneicaje a'a oya queatai ponequinaje queaja'a o huohui'yojji. Jamajjeya eyaya oya jiquiojotii animeenaje so'o ejeanobiatii, o poquijji cuamaya apoa ecuea ajjima' so'o.—
22Majoya emeshimese Agripaa Festo acapoa jama ba'a: —Eyaya pea-ai jiquio dejja shajja-ajjasa-aña enijje emimijji.—
Festo jama poa ba'a: —Ee, mecahuajjeya oya shajja-ajjahuacue.—
23Majoya aje pea pojjajo Agripa Berenicenijje nobiquiapoa daqui queanahuenee huoshojji etii poani oopana ejjachichaqui anicahuasijje. O nobiquiajo peacuaa esohui acapoa o bihuiajjequijji. Majotiiya pea-ai aniapoa comandantecuana, pea dejjacuana quea-aquianahuisonee pea-ai. Majoya aje Festohua huohuicapoa cuana Pablo jeacuayameejjijo ma anica cojjaneijo enequimeejji. 24Festohua jama acapoa ma ejjachichaqui anicacuana ba'a: —Emeshimese Agripa, pea dejjacuana jiquiojo yani ecuananijje jjachichaqui. Bacue, jiquio nequi dejja oya Pablo bajjani. Queahuiso judiocuaa Pablo queatai ponequinaje esohui eque yecani cuaa. Jerusalencuiñajjicuaa, jiquio Cesarea meshijo ba'ecacuaa pea-ai oya queatai ponequinaje acahuani. Taaamajamajani cuana ecue o emanomee'yojjijo. 25Eyaya ca oya baña ecuea emanomee'yojji pojjeama. Chama'nei oja mimishi Roma emeshimeseja etehuejo. Ohuaya caca eya huohuiajjacanaje Roma emeshimese Cesar nequiyasijje o cuama poquijjijo. Emeshimeseya oya baneicaje a'a e'ejojonei oya queatai ponequinaje queaja'a o huohui'yojji. Jamajjeya eyaya oya oque huoojeaje. 26Jamatii ecuea bajjima yajja tehueme aje ojo oja mimishi chamajo. Roma emeshimeseja ebajji ajeo oya oque dojocanaje, ¿yajja tehueme aje? Jamajje eyaya oya jiquiacua yemeenaje miquianaja oja esohui eshajja-ajjajji. Emeshimese Agripa, miyaya oya huohuiajjaneije ebajji ajeo judiocuaa oya queatai ponequinaje bacani. Majoya Pablohua huohuicaje shajja-ajjaneimajje huohuicue mo yajja tehueme eyaya aje Roma emeshimeseja ebajji ojo. 27¡Ecuea queaquehua de! Dejja jamatii oja mimishi tehuejjimajo emejeyo huoojeaca-ajja Roma emeshimeseja ebajji. Jama aca-ajja oya bajjimajo— jamaya poa Festo.
Цяпер абрана:
HECHOS 25: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006