HECHOS 10
10
Pedro mimiapoa Cornelio bajjani dejjanijje
1Oe dejja Cornelio bajjani nequiapoa Cesarea meshijo. Oya soldadocuanahuohuijji etii poa. Oja Romano soldadocuana echicha “Italiano” bajjani acapoa. 2Oya Cornelio oja huapa pojjeamacuananijje pea-ai jjashahuabaquipoquiapoa Eyacuiñajjijo. Ohuaya Eyacuiñajji shahuabacapoquiapoa ebihuiajji. Judío dejja aema'cuana poani ohuaya oja bejjo quiacapoquiapoa o ba'emeesahuajji. Oya Eyacuiñajjinijje mimipoquitiiapoa pea-ai. 3Majoya aje quijje oe epojja sinecuaneijo a las tres Eyacuiñajjiya oya jjacahuibaquiani jayojja ani bameecapoa queaja'a oe ángel oque jjaja'aquije onijje emimijji. Oya jama poñapoa ba'a: —Cornelio.—
4Jamajjeya queameteneeya Corneliohua ángel baneineimajje oya huohuiajjacapoa jama ba'a: —Emeshimesenei, ¿a'ya so'o? ¿Ae miyaya saña?—
Ma angelya oya jama saja-ame acapoa ba'a: —Mique mimicuana Eyacuiñajjiya shajja-ajjacani. Aema'cuana joya miyaya ba'emeesahuaña cuana ohuaya pea-ai bacani queapame. 5Jjeya dejjacuana huoojeacue Jope meshiyasijje majo nequi dejja Simón bajjani jjequiya. Oya bajjani pea acani cuaa ba'a: Pedro. 6Oya jjeya pea Simón bajjanija equijo ani so'o. Ma pea Simonya bae-ai anisahuajo ba'e, ijjiacajjijeecuana quecuapojijji poani oya— jamaya poa.
7Majoya aje ángel ma onijje miminequinaje poqui'yajo Corneliohua beca dejja ojo chacochacoani iyaacapoa ehuoojeajji. Oe soldado queajjashahuabaquija'anee Eyacuiñajji bihuiajji poani iyaacapoa onijje epoquipea-aijji. 8Ohuaya oja iyaacuana huohuijeyocapoa ma o angelya acanaje esohui huisotiiya. Majoya Corneliohua huoojeacapoa ma dejjacuanaya Jope meshiyasijje.
9Majoya aje pea pojjajo Cornelioja huoojeacuana Jope meshiyasijje poquianijo Pedro pea equijamacoohuasijje jaasohuaquiapoa Eyacuiñajjinijje mimiya eshequi biacojjajjanei nequijo. 10Pedro majotii aniya shoeca'yapoa. Jamajjeya ijjiaijjiasapoa oya. Majoya aje peacuana bobi oja ijjiajji cuacuapoequijo Eyacuiñajjiya Pedro jjacahuibaquiani jayojja ani bameecapoa jama ba'a: 11Eyatahuatahua jjaca'apejoquimajje daqui queaquemonee equipajaajji jayojja omiji pea-ai cuemajeyo jeaoqueacanaje. 12Ma daqui queaquemonee ejjequiquini oqueanijo pea pea ijjiacajjicuana, joya cuatro quiseme poanicuana, meshijjepojjicuana, ojjaña cuichojjicuana pea-ai ma equipajaajji omiji pea-ai cuemajeyojo ani bameecapoa. 13O jama bameecanijotii oe mimije onijje shajja-ajjacapoa Pedrohua. Jama oya acapoa ba'a: —Pedro, nequisohuacue jiquio ijjiacajjicuana cuia'yocue mique ijjiajji.—
14Pedrohua saja-acapoa jama ba'a: —Chojja Emeshimesenei, ecuea ijjiajjimaneitii coma ani ijjiacajji. Ecuana judiocuana coma ijjia-ajjanei.—
15Majoya mimio'oyapoa Pedronijje jama ba'a: —Pedro, jiquio Eyacuiñajjiya queapame acani cuana ¡a'a ijjiaca-ajja poso ajji!—
16Oya esohuiya tres huisome mimime poajeya shajja-ajjacao'oyapoa Pedrohua. Majoya aje ma daqui queaquemonee equipajaajji jayojja jjequisohuacaje'yo bacapoa. 17Majoya Pedro jjashahuabaquishequi'yapoa yajja poanijje shai ma o ohua bameecanaje jjacahuibaquiani jayojja ani. Pedro majo ani jjashahuabaquianijotii Cornelioja huoojeacuana o ani equiyasijje aniñaquiapoa. Ma dejjacuaaya huohuiajjacañaquiapoa cuana achacua Simonja equi ani. 18Esecuejjanipejjejotii nequiya huohuiajjacañaquiapoa macuaaya janobajjimanei a'a dejja joya Simón Pedro bajjani yani ebajji.
19Majoya aje oya Pedro jjashahuabaquianijotii ma ohua bameecanajejo Edojjoshahuapameya oya jama acapoa ba'a: —Pedro bacue, tres dejjacuana mi sa-ajjaa poeyanaje. 20Jamajjeya nequisohuacue oe. Jaaoquecuajiqui'yocue o baa. Majoya oe onijje poquicue meteama oya ecue huoojeajojoya.—
21Jamajjeya Pedro jaaoquecuajiqui'yomajje mimiapoa ma dejjacuananijje jama ba'a: —Eya ca iña quioya miquiaa sa-ajjaqui nequi. ¿Ajeo acuae quiana poeyanaje eque?—
22Ohuaya Pedro saja-acapoa jama ba'a: —Ecuana poeyanaje Cornelio bajjani dejja etii poanija esohuijo oja huoojea. Oya queapame ba'yani Eyacuiñajji bihuiajji poani. Ojjaña judiocuaa oya queajea acani, queasapaja'a oya bacani cuaa pea-ai. Oe Eyacuiñajjija angelya oya huohuicanaje mi jjequijjijo oja equiyasijje. Oya shajja-ajjasapoani cua mi onijje mimije esohui— jamaya acapoa cuaa.
23Jamajjeya aje Pedrohua jjequinobiacapoa cuana ma mecajje o ani equijotii ecahuijji. Majoya pea pojjajo Pedro poquiapoa onijje. Pea Jesosaja epeejjicuana Jope meshijo ba'eca poquipea-aiapoa Pedronijje.
Pedro Cornelioja equijo aniapoa
24Majoya aje pea pojjajo Cornelio, oja huapa pojjeamacuana, pea oja epeejji poanicuana pea-ai ma oja iyaacuana Pedrojo jjaishoaquianiapoa. Majoya quijjepishana Pedro Cesarea meshiyasijje aniñaquiapoa. 25Pedro oja equiyasijje aniñaje bamajje Cornelio ojaya equijo ani cuayananapoa esecueyasijje o queapame ja'ajjequiya. Pedro nequi cojjaneijo oja ecuioshajjajo anioqueñapoa o bihuiajjequiya nisho. 26Majoya aje Pedrohua oya jjequisohuacuaji'yomajje oya jama acapoa ba'a: —¡Chojja de! Nequisohua'yocue. Eya mi jayojja pea-aiya dejja.—
27Jamajjeya Pedro onijje mimianijotii oja equiyasijje nobiquiapoa ojee. Queahuisocuana ejjachichaqui eyiyejo ani Pedrohua bacañaquiapoa. 28Majoya aje Pedrohua ma ejjachichaqui anicuana jama acapoa ba'a: —Miquianajaya eba judío dejjacuana jjapeequica-ajja peajaajjicuananijje. Oja equiyasijje nobiquica-ajja pea-ai. Jamaya poani judioja esohui etehuecuana. Eyacuiñajjiya ca jjeya eya huohuicanaje chama'nei peacuana enijje jjapeequiajjanei epojji. 29Jamajjeya eya jiquiacua poecuajinaje miquea huoojeacuaa esohui huohuicajje. Eya poeyanaje jjeya jamatii huohuiajjajjimajo ajeo eya iyaacani. Jamajjeya eya basapoani apiojji quiaa iña iyaameenaje epoejji jiquiacua— jamaya poa.
30Corneliohua oya saja-acapoa jama ba'a: —Shajja-ajjacue, cuatro cahuime huiso yahuajopishana quiajja eshequi nequijoya eya ecuea equijo aninaje Eyacuiñajjinijje emimijji a las tres sinecua. Onijje mimianijotiiya aje oe dejja queadaquisiyonee ejo jjanequija'aquinaje. 31Ohuaya eya jama acanaje ba'a: “Cornelio, Eyacuiñajjiya miya onijje mimiani shajja-ajjacanaje. Miya aema'cuana bejjo quiaña o ba'emeesahuajji bacanaje queapame. 32Jjeya huoojeacue dejjacuana Jope meshiyasijje oe dejja Simón bajjani jjequiya. Oya bajjani pea Pedro. Oya pea Simón bajjanija equijo ani so'o. Ma pea Simón ijjiacajjijeecuana quecuapojijji poani, oya bae-aisahuajo ba'e” jamaya eya acanaje. 33Jamajojoya aje eyaya dejjacuana cuamaya huoojeacuajinaje mi sa-ajjaa. Miya queapameneejjejojoya poeyanaje. Jjeya eseya ojjaña jiquiojo ani Eyacuiñajjiya bacani. Ecuana shajja-ajjasapoani ojjaña cua Eyacuiñajjiya miya huohuicanaje esohui ecuanaque ehuohui'yojji.—
Pedrohua Cornelioja equijo anicacuana esohui huohuicapoa
34Majoya aje o jama poani shajja-ajjamajje Pedrohua sohuihuohuicapoa cuana jama ba'a: —Jjeya ecuea queaja'anee. Eyacuiñajjiya ojjañajaajjicuana oya jayojja pea-ai bacani queajeanee. 35Eyacuiñajjiya ojjañajaajjicuana joya oya queaca'aneetii poanijo jjashahuabaquijjicuana, joya ojo jjashajja-ajjaquianicuana pea-aiya ohuaya queapame bacani. 36Bacue, Eyacuiñajjiya israelitacuana oja esohui queapame ebionei shajja-ajjameecoocapoa. Jesosa Quitohua Eyacuiñajji jjabeimeequica'yani esejo esohui maya shajja-ajjacoocapoa cuaa. Oya Jesosatiiya caca oe eojjañacuanamesenei poani. 37Miquiaaya queaja'a shajja-ajjanaje ma Jesosaa judiocuanaja meshijo nequiya acapoquinaje cuana. Juanya ebionei Judea meshijo nequiya huohuicanequiapoa cuana o jjaiñajeanobiameequijjijo enaojjohuasijje. Majoya aje quijje pea dejjaa huohuicoocanaje cuana Galilea meshijo nequiya. 38Miquianaja eba Eyacuiñajjiya Jesosa Nazaretcuiñajji dejja queaca'anee pomeecanaje. Oja Edojjoshahuapame yamijji oya pomeepea-aicanaje. Majoya Jesosaa eshahuamase yamijjicuana shahuamase yamima' pomeeca'yonaje. Emanocuana jaaca pea-ai jja-ajameequica'yonaje. Jesosaa jamaya acapoquinaje cuana Eyacuiñajji onijje enequijojoya.
39Ecuana caca ma ohua queapamenee acapoquinaje cuana Jerusalén meshijo nequiya bajji epo nequi. Ma ohua Judea meshijo nequiya queapame acapoquinaje cuana bapea-aijji epo nequi. Jamatiijojoya quijje oya Jesosa manomeeca'yonaje cuaa acui ecuiata'apeejo oya ba'ehuanasohuajeameemajje. 40Majoya Eyacuiñajjiya Jesosa tres cahuime huiso emano'yo jaa shequimeeca'yonaje. Oya eshequi'yo nequi ecuanajo jjanequija'ameequica'yonaje Eyacuiñajjiya. 41Ojjaña judiocuanajo pojjeama oya jjanequija'aqui'yonaje. Ecuanajonei caca oe jiquio Eyacuiñajjiya yahuajopishana babacacapoa dejjacuanajoyanei jjanequija'aqui'yonaje. Ecuana o eshequi'yo nequinijje ijjiaijjianaje, ena ishinaje pea-ai onijje. 42Ohuaya ecuana huoojeacanaje oja esohui huohuiya ojjañajaajjicuanahuasijje. Eyacuiñajjiya Jesosa ojjañacuana joya eshe ani, emano'yocuana pea-ai oja mimishicuana ja'anei huohui'yojji epojji nequimeecanaje. Ma esohui huohuiya ecuana huoojeacanaje ohuaya. 43Yahuajonei esohuihuohuijji poa dejjacuaa Eyacuiñajjija huoojea ojjaña nahue'yojji epojjijo huohuicapoquiapoa. Ohuaya esohui huohuicapoquiapoa ojjaña joya ojo jjashahuabaquije'yocuanaja oja mimishicuana cuijeacaje'yo, chama'yotii acaje'yo Jesosaa— jamaya poa.
Eyacuiñajjiya peajaajjicuana judío pojjeamacuanaya Edojjoshahuapame yamijji pomeepea-aicapoa
44Majoya aje Pedrohua esohui huohuicaquijotii Edojjoshahuapame nobiquiñapoa ojjaña ma ohua huohuicaqui shajja-ajjajji poani huisotiicuanaja eyamidojjohuasijje. 45Judío dejja Jesosaja epeejjicuana ma Pedronijje poeyanajecuanaya jjabaneineiquiapoa macuanajo oya peajaajji judío pojjeama Edojjoshahuapame yamijji pea-ai pomeecajo. 46Ma poeyanaje judío dejjacuaa Cornelioja equijo anicacuana peajaajjija esohuijo queaja'a mimiani shajja-ajjacapoa. Eyacuiñajji peajaajjicuaa bihuiacaje shajja-ajjapea-aicapoa ma judío dejjacuaaya. 47Majoya Pedrohua jama acapoa cuana ba'a: —Jiquio anicuana Edojjoshahuapame yamijji pea-ai pomeecanaje eseya jayojja pea-aiya. Jamajjeya ¿ache dejjaa jiquiojo nequiya jjaiñajeanobiameequijjima acaje cuana enaojjohuasijje? Acheyapishana.—
48Jamajjeya Pedrohua majo anicuana iñajeanobiameecapoa Jesosa Quitoja bajjanijo enaojjohuasijje. Majoya aje Pedro huohuiajjacapoa cuaa iyecahuihuiso onijje eanijji so'o.
Цяпер абрана:
HECHOS 10: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006