1 CORINTIOS 8
8
Noe yami eyacuiñajjinishohuasijje quiajo huohuicapoa
1Jjeya quiana eyaya huohuije'yo ma yahuajo miquiaa e tehuenaje esohuijo ba'a: ¿A'a noe yamicuana enaa jehui'yo eyacuiñajjinisho quiajji Jesosaja epeejjiya ijjiaca'yojji? Beca quiana jama poani ba'a: “Ojjaña ecuana queasapaja'a poani, esohui ebajeyo ache noe queapame eijjia'yojji.” Miquianayanei queasapaja'anee poani jjabaquianiyajjejojoya Jesosaja epeejjicuana queajea ajjima' aña. Bacue, esenijje Jesosaja epeejjicuana queajeanee amajje esohui o queaca'a tiimeepoquiajjijo jjashahuabapea-aiquije. 2Joya oyanei queasapaja'a poani jjabaquijjicuana ca queaja'a pojjeama ba'epoquiani, joya ecua esohui oepojjinei ba epo jama pea-aiya poani. 3Joya Eyacuiñajji queajeanee ajji poanicuana caca oe Eyacuiñajjija ebaneinei.
4Jjeya eyaya quiana huohuije noe yamicuana eyacuiñajjinisho quiajo. Esejaya eba dejjaja ne eyacuiñajjinisho e'ejojonei pojjeama, oya ca'a-ama. Eyacuiñajjineiya caca oe che oenei enequi, chama'nei pea. 5Jamatiiya queahuisocuaa esohui huohuitaicani jama ba'a: “Eyacuiñajjicuana caca queahuisonee enequi, eyatahuatahuajo jiquio meshijo pea-ai enequi” jama huohuitaimeya acani cuaa. 6Esejaya caca chama'neinei pea Eyacuiñajji. Oeneiya ca oe enequi eseja Chii-ai poani. ¡Oya ojjañacuana aquiana panajji epo! Eseya o oeneijoya eshe ba'epoquiani o bihuiapoquiajjitii epojji. Enequi pea-ai oenei Emeshimesenei poani Jesosa Quito. Eyacuiñajjiya Jesosa ojjaña jiquio eseya baña huisotii panameecapoa ojaya epojji. Jesosa Quitohua eseya pea-ai eshe pomeecani.
7Yahuajonei jiquio meshijo ba'ecacuaa eyacuiñajjinishocuana bihuiacapoquiapoa. Eyacuiñajji oenei nequi bajjima poa so'o cuanaja ebionei. Dejjaja necuana e'ejojonei poso acapoquiapoa Jesosaja epeejji pojjimahua ba'eya. Jjeya queahuiso oja epeejji epo ba'e noe yami eyacuiñajjinisho quia ijjia'yomajje queamimishi poani jjabaquije cuana majoya. Jama jjashahuabaquiani cuana ba'a: “Jiquio noe yami equia ijjia'yomajje eyacuiñajjinishocuana bihuiaña. Jamaya ecuana queamimishi poaje ma noe equia ani ijjia'yomajje” jama jjashahuabaquime poani cuana. 8Bacue, jiquio eseya ijjiaña bobicuana, noe yami equia pea-ai ese queapame pomee'yoajjanei poani Eyacuiñajjija ese queapame poani ebajji. Bobicuana, noe yami equia ijjia'yomajje queaca'a etiipoquijji pojjeama se poaje comajoya. Oya jayojja pea-ai bobicuana, noe yami ijjia'yojjima amajje queaca'a etiipoquijji pojjeama poaje pea-ai. 9Esejaya eba ojjaña bobicuana queapame, ijjiacajji. Noe yami equia ijjia'yomajje queamimishi pojjeama poani majoya. Jamatii a'a noe yami eyacuiñajjinisho quia ijjia'yojji joya Jesosaja epeejji ca'a-ama poani ohua ijjiasapea-ai eaca poanijje. Majoya ma noe yami ijjia'yomajje oya queamimishi poani jjabaquije. 10E'e, miquea eba ma noe yami eyacuiñajjinisho quia ijjia'yomajje queamimishi pojjeama poani. Jamajjeya miya nobiquiani eyacuiñajjinisho anijji equi noe yami oja quia ijjia'yohua. Miya cuama nobiquije bamajje pea minijje Jesosaja epeejji ca'a-ama poani nobipea-aiquije noe yami eyacuiñajjinisho quia ijjiapea-ai'yohua mi jayojja epojjiya. Oya noe yami ijjia'yomajje jjabaquije queamimishi poani ma noe yami equia poanajejojoya eyacuiñajjinisho bihuiajji. 11Miquea ebatii poani ma noe yami ijjia'yomajje queamimishi pojjeama poani. Jamatii miyaya ma pea minijje Jesosaja epeejji ca'a-ama poani queamimishi pomeechana ma noe yami eyacuiñajjinisho quia ijjia'yomajje. Quito joya ca'a-ama poanicuanajo manopea-ai'yapoa. Jamajjeya queapame pojjeama oya queamimishi poani jjabaquije mi jayojja pea-ai pomajjeya. 12Miya jayojja pea-ai posapomajje joya Jesosaja epeejji ca'a-ama poaniya ijjiapea-aicaje jamatii oya queamimishi poaje jjabaquije. Majoya miyaya oya queamimishi pomeeaña, jamajjeya miya Quitonijje queamimishi pea-ai poani. 13Jamajje eyaya noe yami ijjiaje'yohua pea enijje Jesosaja epeejji ca'a-ama queamimishi pomeeje jjabaquimajje, ecuea noe yami eyacuiñajjinisho quia eijjia'yojji pojjeamatii poaje. Eyaya oya queamimishi epomee poanijje noe yami ijjia'yojjimatii aje.
Цяпер абрана:
1 CORINTIOS 8: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006