1 CORINTIOS 2
2
Esohui Jesosa acui ecuiata'apeejo mano'yapoajo huohuicapoa
1Ecue dohuecuana jjo'icuana, yahuajopishana eya poquinaje miquianaja meshiyasijje miquiana sohuihuohuiya Eyacuiñajjija esohui ma miquianaja bajjimanei poanaje oja esohui. Dejjacuana queasapaja'a poani sohuinequiñaquiajja jama huohuiya pojjeama eya poquinaje. Eya queasapaja'anee poanijo jjabameequiya pojjeama pea-ai poquinaje cocuamaya. 2Eyaya miquianaja meshijo aniya Jesosa Quitojonei huohuipoquianaje pea esohuicuanajo pojjeama, majoneiya. Ma o acui ecuiata'apeejo mano'yapoajonei esohui eyaya huohuineineinaje quiana. 3Eyanei queaca'a poanijo pojjeama eya poquinaje miquiana sohuihuohuiya. Eya ca miquianajo nequi esohui ehuohuijji queamete poanaje. Queasohuicaca poanaje esohui ehuohuitai poanijjejojo. 4Majo aniya eyaya quiana huohuineinaje dejja queasapaja'aja ejjashahuabaquijji pojjeama miquiana ecuea esohui ehuohuijo ejjashajja-ajjaquijji. Edojjoshahuapame queaca'aneetiiya caca eya queaja'a huohuimeesahuacanaje Eyacuiñajjija esohui miquiana majo queapame ejjashahuabaqui'yojji, ecueanei ejjashahuabaquijjijo pojjeama. 5Jamaya eyaya quiana esohui huohuineinaje. Jamajjeya Eyacuiñajji queaca'aneetii poani bamajje jjashahuabaqui'yonaje quiana. Dejja queasapaja'a poanija esohui shajja-ajjamajje pojjeama jjashahuabaqui'yonaje quiana.
Edojjoshahuapameya Eyacuiñajjija esohui ma miquianaja bajjima bameesahuacani
6Bacue, joya esohuijo queaca'a tiipoquianicuaa bacani eya huohuiaña esohui o queaja'a ba'epoquijji. Joya ecua jiquio meshijo nequica dejjacuaa ojayanei esohui huohuicani jama pojjeamaa eyaya huohuiaña. Jiquio meshijo dejja etii poanicuaa huohuicani esohui jama pojjeamaa pea-ai eyaya huohuiaña. Oya quijje jjachamaquije'yo, oja esohui pajeacaje'yo cuaa. 7Jiquio ese queaja'a ba'epoquijji esohui huohuiaña Eyacuiñajjija esohuitiiya poani ma yahuajoneinei ojjañaja bajjimanei poa. Jiquio meshi panajjimahuajotii Eyacuiñajji jjashahuabaquianiapoa esejo achajja nahue'yome acaje eseya queapame eba'epoqui'yojji onijje. Ma Eyacuiñajjija ejjashahuabaquijji yahuajonei queaquehua poa cuanaja bajjimanei poa cuanaja. 8Eyacuiñajjija ejjashahuabaquijji emeshimese etii poanicuanaja queaquehuatii poani, ojaya bajjimatii. Etiicuanaja eba poanajejojjemo Emeshimesenei Jesosa Eyajje poe acui ecuiata'apeejo manomee'yojjima acaquiae etiicuaa. 9Eyacuiñajjija esohui yahuajonei etehue jaa jama poani ba'a:
“Eyacuiñajjiya apoa acapoa queapameneenee
ojjaña joya o queajea ajji poanicuanaja epojji.
Ma ojjañacuanaja ecojjaja bajjimanei, shajja-ajjajjimanei, jjashahuabaquijjimanei pea-ai
jjeshecaje o queajea ajji poanicuaaya.”
10Eyacuiñajjiya jiquio esohui queaja'a eseya bameesahuacanaje oja Edojjoshahuapamejo. Ohuaya ojjañatii Eyacuiñajjija esohui bajeyojeyocani. Ojaya ejjashahuabaquijjicuana pea-ai Edojjoshahuapameja ebajeyojeyo ma Eyacuiñajjija sapajotii jaa jiquio esejaya queaquehua poani.
11¿Ache dejjaa shai onijje dejjaja ejjashahuabaquijji queaja'a bacani oja sapajo jaa? Acheyapishana. Ojayanei ejjashahuabaquijjicuana oja yamidojjojo edojjoshahuaa huohuicani. Jama jayojja esejaya bajjimanei Eyacuiñajjija ejjashahuabaquijji. Edojjoshahuapame oeneiya oja ejjashahuabaquijjicuana queaja'a bacapoquiani. 12Eyacuiñajjiya eseya jiquio meshijo ba'ecacuanaja ejjashahuabaquijjinei quiajjima acanaje. Ohuaya ca se ca oe oja Edojjoshahuapame quiacanaje eseja yamijo enequi'yojji. Majoya eseya ojaya Edojjoshahuapame quiacanaje queaja'a esejaya ebajji ma Eyacuiñajji queapameneeya eseya quiacanaje huisotii ojo queapame echacochacopoquijji. 13Ecuana jama mimime poani jiquio Eyacuiñajjija Edojjoshahuapameya bameesahuacani huisotii esohuijo. Ecuanajanei ejjashahuabaquijji esohuijo pojjeama mimiani jiquio peacuaa huohuicani esohuijo pojjeama pea-ai. Jamajjeya jiquio Eyacuiñajjija esohui queapame ecuaa huohuiaña joya Edojjoshahuapame yamijjicuanaja queaja'a bacajji. Ohuaya queaja'a bameesahuacaje.
14Ojjaña joya Eyacuiñajjija Dojjoshahuapame yamima'cuaa oja esohuicuana cajaa acani, peajjanei poso acani, yajja poani poso acani pea-ai. Edojjoshahuapame oeneiya oya queaja'a bameecani oja esohui, jamatii ba'e pojjeama. 15Ojjaña joya Eyacuiñajjija Edojjoshahuapame yamijji poanicuaa caca oe queaja'a bacapoquiani ache queapame eajji, ache aca-ajja pea-ai. Ojjaña joya Eyacuiñajjija Dojjoshahuama'cuanaja ca ebajji pojjeama achajja Eyacuiñajjiya Jesosaja epeejjicuana bacapoquiani. A'a queapame a'a queamimishi ojaya ehuohuijji pojjeama. 16Eyacuiñajjija esohui yahuajonei etehue jaa jama poani ba'a: “¿Ache dejjaa acuae che Eyacuiñajjija ejjashahuabaquijji queaja'a bacani? Acheyapishana. ¿Aeya acuae oya niñesheacani? Aeyapishana. Jamatii eseyaya oja epeejjicuaaya queaja'a bapoquiaña achajja oya Quito jjashahuabaquipoquiani.”
Цяпер абрана:
1 CORINTIOS 2: ESE
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Copyright Mision Nuevas Tribus, 2006