मत्ती 21
21
यरूशलेम नगरे मां ज़ींत
(मरक. 11:1-11;लूक. 19:28-40;यूह. 12:12-19)
1ज़ैखन यीशु ते कने तैसेरे चेले यरूशलेम नगरेरे नेड़े पुज़्ज़े, त यीशुए ज़ैतून पहाड़े पुड़ बैतफगे मरां अपने दूई चेले एन ज़ोइतां अग्रोवं भेज़े। 2“अपने सामने उस ड्लाव्वें मां गाथ, ते तैड़ी पुज़ेले, त तुसन अक गधी बन्धोरी मैलनिये, ते तैस साथी तैसेरो बच्चो भी भोनोए, तैस खोलतां इड़ी मीं कां आनां।” 3अगर तुसन कोई पुछ़े, त तुस ज़ोइयथ, कि प्रभुए एसेरी ज़रूरत आए, ते तै लूशी तैस वापस भेज़ेलो। 4इन सब किछ एल्हेरेलेइ भोवं, कि नेबे ज़ैन वचन ज़ोवरू थियूं, तैन पूरू भोवं,
5“सिय्योनेरे कुइये सेइं ज़ोथ,
कि तेरो राज़ो तीं कां एवरोए,
ते तै बड़ो हलीमी ते तै गेधी पुड़ च़ेढ़तां एवरोए,
बल्के गधेरे बच्चे पुड़।”
6चेले च़ले जे ते ज़ेन्च़रे यीशुए ज़ोवरू थियूं, तैनेईं तेन्च़रे कियूं। 7तैनेईं तै गधी ते तैसारो बच्चो आनो, ते तैन पुड़ अपना लिगड़ां छ़डां, ते यीशु तैस पुड़ च़ेढ़तां च़लो। 8बड़े लोकेईं अपना लिगड़ां बत्ती मां बिछ़ां, ते किछेईं बुट्टां केरे डाल केटतां बत्ती मांमेइं छ़डोरे थिये। 9ते तैना लोक ज़ैना यीशु सेइं साथी अग्री-अग्री ते पत्ती-पत्ती च़लोरे थिये, तैना नहरे देते थिये, “दाऊदेरे मट्ठेरी होशाना (तारीफ़), धने तै, ज़ै प्रभुएरे नंव्वे सेइं एइते, सुर्गे मां होशाना#21:9 होशाना मतलब बच़ाथ।” 10ज़ैखन यीशु यरूशलेम नगरे मां पुज़ो, त सारे नगरे मां हलचल मेच़ि जेई, ते लोक ज़ोने लग्गे, “ऐह कौने?” 11लोकेईं ज़ोवं, “ई गलीलेरे नासरत नगरेरो नबी यीशुए।”
यीशु मन्दरे मरां बुपारी कढते
(मरक. 11:15-19;लूक. 19:45-48;यूह. 2:13-22)
12यीशुए परमेशरेरे मन्दरेरे अंगने मां गेइतां, ज़ैना बुपारी बुपार केरते थिये सब तैट्ठां कढे, तैनी सुनारां केरि दुकान ते कबूतर बेच़ने बालां केरि ठारां ट्लोड़ी। 13ते तैनी ज़ोवं, “लिखेरूए कि मेरे मन्दरे जो प्राथना केरनेरू घर ज़ोले, पन तुसेईं त ऐह डैकू केरो अड्डो बनेवरोए।”
14तैखन काने ते टोन्टे मन्दरे मां यीशु कां आए, ते तैनी तैना सब बज़्झ़ाए। 15पन ज़ैखन मन्दरेरे प्रधान याजक ते शास्त्री लोक एना कम्मां ज़ैना तैनी कियां, ते मट्ठन मन्दरे मां दाऊदेरी मट्ठेरी होशाना (तारीफ़) ज़ोते लाए, तैन बड्डी सरक आई। 16ते तैस सेइं ज़ोने लग्गे, “तू शुन्ने लगोरोस कि एना कुन ज़ोने लगोरेन?” यीशुए तैन सेइं ज़ोवं, “हाँ अवं शुन्ने लगोरोईं, तुसेईं कधे नईं पढ़ेरू कि, ‘तीं मट्ठन ते दुद्ध पीते बच्चन करां भी तीं अपनि पूरी तारीफ़ कमाई?’” 17तैखन तै तैन शैरतां नगरे बेइरोवं च़लो जेव, ते बैतनिय्याह नगरे मां जेव ते तैड़ी रात गुज़ारी।
बेफल फैगेरो बुट
(मरक. 11:12-14,20-24)
18झ़ेझ़ां ज़ैखन यीशु नगरे मांजो वापस एवरो थियो, त तैस ढ्लुख लग्गी। 19बत्तरे ड्लेखी अक फैगेरो बूट लाव ते तैस कां जेव, ते पट्लां केरे अलावा तैस पुड़ किछ न लाव, तैनेईं तैस जो ज़ोवं, “कधे भी तीं पुड़ फल न लग्गेलो ते तैखने तै बुट शुक्की जेव।” 20एन हेरतां चेले हैरान भोइतां पुछ़ने लग्गे, “ई फैगेरो बुट अकदम केन्च़रे शुक्की जेवरोए?” 21यीशुए जुवाब दित्तो, “अवं तुसन सेइं सच़ ज़ोताईं कि अगर तुस विश्वास रखथ, ते शक न केरथ, ज़ैन फैगेरे बुट्टे सेइं भोवं तैन तुस भी केरि सकतथ, बल्के उस पहाड़े जो ज़ोले कि इट्ठां उखड़तां समुन्दरे मां गा, त तैन्ने भोल्हु।” 22अगर तुश्शो विश्वास पक्कोए त ज़ैन किछ तुस प्राथनाई मां मग्गेले, तैन तुसन मैल्ही गालू?
यीशुएरे अधिकारे पुड़ सवाल
(मरक. 11:27-33;लूक. 20:1-8)
23यीशु मन्दरे मां शिक्षा देने लगोरो थियो, त प्रधान याजक, ते लोकां केरे बुज़ुर्गेईं तैस पुछ़ू, तू एन कम केसेरे अधिकारे सेइं केरतस? ते तीं एन कम कैनी दित्तोरोए? 24यीशुए तैन जुवाब दित्तो, “अवं भी तुसन अक गल पुछ़ताई, अगर तुस तैसेरो जुवाब देले, त अवं भी ज़ोइलो कि अवं एन कम केसेरे अधिकारे सेइं केरताईं। 25यूहन्नारो बपतिस्मो कोट्ठां थियो? सुर्गेरे तरफां थियो, या की इन्सानेरी तरफां थियो? तैना एप्पू मांमेइं गलबात केरने लग्गे, कि अगर अस ज़ोतम कि, सुर्गेरे तरफां थियो, त फिरी तैनी ज़ोनूए कि फिरी तुसेईं तैसेरू याकीन की नईं कियेरू? 26पन अगर अस ज़ोतम कि, ‘इन्सानेरी तरफां थियो,’ त लोकां केरो भी डरे किजोकि लोक यूहन्ना नबी मन्ते थिये।” 27एल्हेरेलेइ, तैनेईं यीशुए जुवाब दित्तो, “अस किछ न ज़ानम।” तैनी भी तैन सेइं ज़ोवं, “अवं भी तुसन सेइं न ज़ोईं कि अवं इन कम्मां केसेरे अधिकारे सेइं केरताईं।”
दूई मट्ठां केरि मिसाल
28पन तुस इस मिसालरे बारे मां कुन सोचतथ? केन्ची मैन्हेरां दूई मट्ठां थियां, तैनी बड्डे मट्ठे कां गेइतां ज़ोवं, “अज़ दाछ़री बागी मां गा ते कम केर।” 29तैनी जुवाब दित्तो, “अवं न गेईं।” पन बादे मां पशतेइतां च़लो जेव। 30फिरी बाजे होरि मट्ठे कां भी गेइतां एन्ने ज़ोवं, तैनी जुवाब दित्तो, “ठीके खरी गाताईं।” पन जेव नन्ना। 31“एन दूईने मरां केनि अपने बाजेरो हुक्म मन्नो?” तैनेईं जुवाब दित्तो बड्डे हुक्म मन्नो, यीशुए तैन सेइं ज़ोवं, कि अवं तुसन सेइं सच़ ज़ोताईं, कि चुंगी घिन्ने बाले ते बदचलन कुआन्शां तुसन करां पेइले परमेशरेरे राज़ मां दाखल भोल्ही। 32अवं इन ज़ोताईं, यूहन्ना बपतिस्मो देनेबाले तुसन ज़ोवं, कि धार्मिकतारी ज़िन्दगी केन्च़रां ज़ींनीए पन तुसेईं तैसेरू विश्वास न कियो, पन चुंगी घिन्ने बाले ते बदचलन कुआन्शेईं तैसेरू विश्वास कियूं, एन हेरतां भी तुसेईं पापन करां मन न फिराव ते तैस पुड़ विश्वास न कियो।
दुष्ट ज़मीनदारेरी मिसाल
(मरक. 12:1-12;लूक. 20:9-19)
33अक होरि मिसाल शुना, एक्की ज़मीनदारे अक दाछ़री बाग लाई ते तैसेरे च़ेवरे पासन बाड़ दित्तो, ते दाछ़रो रस कढनेरे लेई अक हौवज़ बनावं, ते तैस बागरी हेरगेश केरनेरे लेई अक उच्ची कूड़ी बनाई ते फिरी तै काशत केरनेबालन ठेके पुड़ देइतां कोन्च दूर प्रदेशे जो च़लो जेव। 34ज़ैखन दाछ़ ट्लोड़नेरो मौको अव त तैनी अपनो हिस्सो नेनेरे लेई अपने नौकर तैन ठेकेदारन कां भेज़े। 35ते ठेकेदारेइं तैसेरे नौकर कोई झ़ूस्सो कुट्टो कोई मारो ते केन्ची जेई घोड़ेईं दित्ती। 36फिरी तैनी होरे नौकर भेज़े ज़ैना पेइलन करां जादे थिये, पन ठेकेदारेइं तैन सेइं भी तेरहो ज़ेरो सलूख कियो। 37आखर्कार तैनी अपनु मट्ठू तैन कां भेज़ू, ते सोचू कि मेरे मट्ठेरो त लिहाज़ केरेले। 38“पन ज़ैखन ठेकेदारेइं तैसेरू मट्ठू लाव, त तैना एप्पू मांमेइं मुशोरो केरने लग्गे, कि एज्जा एस सेवां मारम ते एसेरी बागी पुड़ कब्ज़ो केरम।” 39“तैखन तैनेईं तैन मट्ठू ट्लाव ते बागरे बेइर शेरी छ़ड्डू। 40एल्हेरेलेइ ज़ैखन बागरो मालिक एप्पू एज्जेलो, त तैन ठेकेदारन सेइं केरो सलूख केरेलो?” 41तैनेईं जुवाब दित्तो, तै तैन बुरन, बुरे तरीके सेइं मैरतां बागरो ठेको होरि ठेकेदारन देलो, ज़ैना मौके पुड़ तैसेरो हिस्सो तैस देन। 42यीशुए तैन सेइं ज़ोवं, “तुसेईं पवित्रशास्त्रे मां कधे नईं पढ़ेरू,
ज़ै घोड़ मिस्त्रेईं रद्दी कियोरो थियो,
तैए कूनेरो घोड़ भोल्हो,
एन कम परमेशरे कियोरूए,
ते इश्शी नज़री मां एन आजीब आए?”
43एल्हेरेलेइ अवं तुसन सेइं ज़ोताईं, कि परमेशरेरू राज़ तुसन करां निव गालू, ते एरी कौमी कां दित्तू गालू ज़ै वक्ते पुड़ तैस फल दे। 44ते ज़ै कोई इस घोड़े पुड़ बिछ़ड़ेलो त तैसेरे टुक्ड़े-टुक्ड़े भोइ गाले, पन ज़ै एस उन्ढो बिछ़ड़ेलो त तैस पइतां छ़डेले। 45प्रधान याजक ते फरीसी लोक यीशुएरी ऐह मिसाल शुन्तां सेमझ़ी जे, कि यीशु एन गल्लां इश्शे बारे मां ज़ोने लेवरोए। 46तैनेईं यीशु ट्लानो चाव, पन लोकन करां डरते थिये किजोकि तैना यीशु नबी मन्ते थिये।
Цяпер абрана:
मत्ती 21: BHDNT
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.