मत्ती 14
14
यूहन्ना बपतिस्मो देनेबालेरी मौत
(मरक. 6:14-29;लूक. 9:7-9)
1ज़ेइस हेरोदेस ज़ै मुल्खेरे च़ेवरोवं हिस्से पुड़ हुकूमत केरतो थियो, तैनी यीशुएरे बारे मां शुनू। 2तैनी अपने नौकरन सेइं ज़ोवं, “ऐह यूहन्ना आहे ज़ै बपतिस्मो देनेबालोए, ऐह मुड़दन मरां ज़ींतो भोवरोए, एल्हेरेलेइ तै चमत्कार हिराते।”
3किजोकि हेरोदेसे अपने ढ्लाए फिलिप्पुसेरी कुआन्श हेरोदियासेरी वजाई सेइं यूहन्ना ट्लेइतां बन्धोवरो ते कैदखाने मां छ़डोरो थियो। 4किजोकि यूहन्ना हेरोदेस सेइं ज़ोवरू थियूं, कि ऐह रखनी तेरे लेई जाइज़ नईं। 5ते हेरोदेस तैस कत्ल केरनो चातो थियो, पन लोकन करां डरतो थियो, किजोकि लोक तैस नबी मन्ते थिये।
6पन ज़ैखन हेरोदेसेरी ज़र्म दिहैड़ी आई, त हेरोदियासेरे कुइयां मेहमाना केरे सामने नेच़तां हेरोदेस खुश कियोरो थियो। 7एल्हेरेलेइ तैनी वाधो कियोरो थियो, “कि ज़ैन किछ तू मग्गेली, अवं तीं तैन्ने देलो।” 8तैसां अपने अम्मरे शिखालने पुड़ ज़ोवं, “मींजेई यूहन्ना बपतिस्मो देनेबालेरी क्रोड़ी थाले मां मग।” 9राज़े बड़ो अफ़सोस भोव, पन अपने मेहमाना केरे सामने ते कसम खानेरी वजाई सेइं हुक्म दित्तो कि देथ। 10ते तैनी कैदखाने मां लोक भेज़तां यूहन्नारी क्रोड़ी कटाई। 11ते तैसेरी क्रोड़ी थाले मां रेखतां कुइये कां दित्ती, ते तै अपनि अम्मा कां घिन्तां जेई। 12तैखन तैसेरे चेले आए, ते तैनेईं तैसेरी लाश नेइतां देबतां छ़डी ते गेइतां यीशुए पतो दित्तो।
यीशु 500 मड़दन रोट्टी खुवाते
(मरक. 6:30-44;लूक. 9:10-17;यूह. 6:1-14)
13ज़ैखन यीशुए एन शुनू, त तै किश्तरे ज़िरिये अकेन्ती ठारी जो च़लो जेव, ते लोक एन शुन्तां नगर नगरेरे पैदल तैस पत्ती च़ले जे। 14ज़ैखन यीशु किश्ती मरां ओस्सो त तैनी बड़े लोक पुतोरां एइते लाहे, ते तैस तैन पुड़ बड़ो तरस अव, ते तैनी तैन केरे बिमार लोक बज़्झ़ाए।
15ज़ैखन ड्लोझ़ भोइ, त यीशुएरे चेलेईं तैस कां एइतां ज़ोवं, “ई सुनसान ठारे, त च़िर भी बड़ू भोवरूए। ते एन लोकन भेज़ी छ़ड ते कोस्कोई ड्लाव्वन मां गेइतां किछ खाने जो घिन्न।” 16यीशुए तैन सेइं ज़ोवं, “एना भेज़ने ज़रूरी नईं! तुस्से एन किछ खाने जो देथ।” 17चेलेईं तैस सेइं ज़ोवं, “इड़ी असन कां पंच़ रोट्टी ते दूई मेछ़ली केरे अलावा होरू किछ नईं।” 18तैनी ज़ोवं, “तैन इरां मीं कां आनां।” 19तैखन यीशुए लोकन घासे पुड़ उन्ढे बिशनेरे लेई ज़ोवं, ते पंच़ रोट्टी ते दूई मेछ़ली हथ्थे मां रेखी, ते अम्बरेरे पासे तेकतां शुक्र कियूं, ते रोट्टी ट्लोड़ी-ट्लोड़ी अपने चेलन कां दित्ती, ते चेलेईं तैन लोकन दित्ती। 20ते सारे मैन्हु खेइतां रेज़्ज़ी जे। तैल्ला पत्ती, यीशुएरे चेलेईं बच़ोरे टुक्ड़न सेइं 12 टोकरी भेरि। 21रोट्टी खानेबाले लोकां केरि तैधात कुआन्शां ते बच्चां केरे अलावा कोई 5000 मड़द थिये।
यीशुएरू पैनी पुड़ च़लनू
(मरक. 6:45-52;यूह. 6:15-21)
22तैल्ला पत्ती, यीशुए अपने चेलन हुक्म दित्तो कि, तुस किश्ती मां च़ेढ़तां मीं करां पेइले समुन्दरेरे उस पार जो गाथ ते अवं एन लोकन वापस भेज़तां एइताईं। 23लोकन भेज़नेरे पत्ती, यीशु तैट्ठां निस्तां नेड़े एक्की पहैड़ी पुड़ प्राथना केरनेरे लेई जेव। ते ड्लवझ़ी तै अकैल्लो थियो। 24तैखन किश्ती बन्ने करां दूर पुज़ोरी थी, किजोकि एग्रोवरां बड़ी तेज़ हवा च़लोरी थी। 25ते लगभग झ़ेज़्झ़ेरे च़ेवरे बज़ेई ज़ैखन हेजू आंधरू थियूं, यीशु समुन्दरेरे पैनी पुड़ च़ेलतां अपने चेलन कां अव। 26ज़ैखन चेलेईं यीशु समुन्दरे पुड़ च़लतो लाव त तैना डेरि जे, तैनेईं बुझ़ू, “एन भूत एवरूए,” ते डेरतां चिन्डां लग्गे मारने। 27यीशुए तैखने तैन सेइं रोड़ेच़ारे गल्लां की ते ज़ोवं, “हिम्मत रखा डरा नन्ना, अवं आईं।” 28पतरसे तैस जुवाब दित्तो, “हे प्रभु अगर तू आस, त मीं भी हुक्म दे ते अवं भी पैनी पुड़ च़लतो तीं कां एज्जी।” 29तैनी ज़ोवं, “एई!” तैखन पतरस किश्ती मरां ओस्तां यीशु कां गानेरे लेई पैनी पुड़ मेइं च़लने लगो। 30पन तेज़ हावी सेइं छ़ेल्ली च़लने लेग्गी ते तै डेरि जेव, ते डुबने लगो तैखन तैनी चिन्डां मैरतां ज़ोवं, “हे प्रभु मीं बच़ा।” 31यीशुए लूशी अपने हथ्थे सेइं झफ देइतां पतरस ट्लातो, ते तैस सेइं ज़ोवं, “हे घट भरोसे बाला तीं किजो शक की?” 32ज़ैखन तैना किश्ती मां बिश्शे ते हवां रुकी जेई। 33तैखन ज़ैना किश्ती मां बिश्शोरे थिये, त तैनेईं तैस कां मथ्थो टेको ते ज़ोने लग्गे, “तू सच़्च़े परमेशरेरू मट्ठूस।”
यीशु गन्नेसरत इलाके मां बिमार बज़्झ़ाते
(मरक. 6:53-56)
34ज़ैखन तैना गलील समुन्दर पार केरतां गन्नेसरत नंव्वेरे जगाई पुड़ पुज़्ज़े। 35त तैट्ठेरे लोकेईं यीशु पिशानो ते आसे पासेरे इलाके मां खबर दित्ती, ते सारे बिमार तैस कां आने। 36ते तैनेईं यीशु सेइं मिन्नत केरते थिये कि, तैन तैसेरे लिगड़न सेइं हुरने दे। ते ज़ेत्रेइं तैसेरे लिगड़न सेइं हथ लाव तैना सब बेज़्झ़ोए।
Цяпер абрана:
मत्ती 14: BHDNT
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.