Devidi-Anume 71
71
Omongitẹ Owiḅọ Tẹkẹ
1KỊNỊNYANAḄỌ, à ḅo tẹ ị́ ị̀ gbaịn ḅọrọma ḅẹ ḅara
gbala-gbala ḍụkụ tẹ owu ị̀ ḅara sima!
2Ị́yẹrị karakara mịẹ ḅọ ẹrẹsị, ḅarasụa ị̀ pịrị tẹ ị̀ pụkọ-pakamaḅo.
Ì poki tẹ ị̀ ḅọrọma-a!
3Ye tolu ḅo ị̀ la ḅịa sịḅị-kikima-anga sọ ị̀ pịrị
tẹ iḅi kụrọnị-anga sọ tẹ ị̀ gbaịn;
ị̀ ḅụụ-ḅọị-yọ pịkị ḍụa anga.
4Ị̀ Tamụnọ, si-sịḅịḅio-sụa atomi ma
aḅara-ḅio ị̀ pụkọ-pakamaḅo,
kụrọ-kụrọ ḅara kẹ kịnị na mịẹarị si-mịẹapụ kụrọ ḅụ.
5KỊNỊNYANAḄỌ, àrị ị́ kẹ ḅiokpọmarị;
ị̀ asambịrịma sakị kụra-ḅio ị́ ḅụụ
mie à ḅioḅẹngbọ kẹ gbanarị.
6Ì ḍumo mamgba ḅụ ị́ ọgọnọ mie à sịrẹrẹ wararị;
ì iyingi ì iyi kuroma ene kụra-ḅio mie ị̀ gbaịn-arị,
sakị mamgba àrị í tokini ḅa.
7Ì ḍumo mẹ jen-apụ ḍiki anga ye sọ tẹ,
anie ị̀ kụrọ tẹ ḍụaḅọ ẹrẹsị.
8Bebe ene mẹ à kẹ í tokiniarị,
pịkị kẹ í ebube mẹ ḍuko wasamarị.
9À nwẹn omongi tẹ mẹ, ị̀ sịkị ma;
ị̀ kẹ gbin kuroma so ma, mịọkụ ịnyọ
gbọrsịḅị ị̀ ḅụụ fa tẹ sakị mẹ ḅụ.
10Si kẹ ị̀ tọn-arị apụ ma ị̀ ḅaa ḅẹ-ḅiiarị;
ini ẹkwẹn, ẹkwẹn tẹ ḅẹrẹ-ḅiya ị̀ pịrịarị.
11Ini mẹẹ, “Tamụnọ ọ̀ kẹ gbin kuroma so tẹẹ;
ó yee wa ò ḍuka tẹ ò kun;
wamịna aḅara-ḅio ọ̀ pụkọ-pakamaḅo ḅẹ ḅọ ofori.”
12Yei Tamụnọ, ị̀ ḅụụ ḅụ ḅele ḅaka ma;
ị̀ Tamụnọ fọnya ḅo ḅarasụa ị̀ pịrịị!
13Yee owu kẹ ị̀ pakarị apụ ma
owu-ḅara-sii nyana, pịkị fịị gulugulu.
Yee ye kẹ ị̀ lama ḅẹ ḍọkịarị apụ ma
ḅụụ-jịrị tẹ tọrụ-tuu.
14Sakị mamgba àrị ị́ kẹ ḅiokpọma ḅa;
àrị í tokini-tokini-tokini ḅa.
15Àrị í iḅi mẹ gbolomaye ḍuko ḅa;
bebe ene mamgba à kẹ ị́ ḅọrọma mẹ gbolomaye ḍuko ḅa,
tụkụmaye anị ḍụḅa àrị inetẹ nimi tẹ ḍuko ḅẹ ḅara nẹngị wararị sọ.
16KỊNỊNYANAḄỌ, Ḅakaḅọ, àrị ị́ kụrọ mẹ tokini ḅa;
àrị í iḅi mẹ ḍuko wasama ḅa, í iḅi mẹ ngẹrị.
17Ị̀ asambịrịma sakị kụra-ḅio í ye kẹ ì toluma tẹ,
à paa ị́ ḅụụ-buama akọrịnama ma gboloma aị ḍukoarị.
18Mịọkụ àrị omongitẹ ị̀ sịḅị iḅulu ḅịya tẹ mẹ,
ị̀ kẹ gbin kuroma tẹ so ma, Yei Tamụnọ!
Àrị ị́ kụrọ na í opu na ḍuko wasama
tọrọkọ ḅo ḅarị aḅụọ mamgba pịrịarị
sakị mẹ ḅụ ị̀ na simee.
19Tamụnọ, ị́ karakara mịẹ mẹ iwo mu So-tọrụ laarị.
Í opu akọrịnama kọrị tẹ;
ị́ kịka gbọrụḅọ-sọ ofori.
20Ị́ ḅụụ-fụka na tọrụsiẹrị na kẹ ị̀ fịrịma tẹ,
kụma í siin ịnyọ kẹ ị̀ ḅụụ ḅio suu ḅa;
ị́ ḍụkụ tẹ à ḍuḅu sọ ḅịa.
21Ị́ ị̀ mịẹ tẹ à gburo-gburo ḅo elemu à la tẹ ḅara mamgba nẹngị ḅa;
í siin ì ḅiokpọma ḅa.
22Karakara-ḅara-ḅụ àrị ọbọ farị-farị tẹ kẹ í tokini ḅa;
ị̀ Tamụnọ, àrị ị́ ḅụụ sịrẹrẹ na-iḅi ye mẹ gotẹ í tokini ḅa.
Ị̀ ọbọ ọgọnọ ḅụ à nume farị-farị í boma ḅa,
anie Izirẹlị tẹkẹarị Fịafịa Ḅọ ḅe.
23À farị ị́ pịrịarị sakị à ḍereku ḅụ oloku ḅa;
àrị ị̀ bebe ḅụụ mamgba kẹ nume-su ḅa,
ị́ ị̀ ḅọrọma tẹ ẹrẹsị.
24Bebe ene mẹ ḅụ àrị ị́ karakara mịẹ mẹ gotẹ ḍuko ḅa,
ye kẹ ị̀ lama ḅẹ ḍọkị apụ ma
owu-ḅara-sii tẹ tọrụ-tuu tẹ ẹrẹsị.
(C) The Bible Society of Nigeria