Devidi-Anume 7
7
Karakara Ḅẹrẹkọn Gotẹ Kọn Tẹkẹ
1Yei KỊNỊNYANAḄỌ, ị̀ Tamụnọ, àrị ị́ ḍọkụma-ḅom,
ị̀ gbaịn ḅọrọma-a:
ì ḍukarị apụ mamgba ḅara-ḅio ị̀ pụkọ-pakamaḅo tẹ ị̀ ḅọrọmaa,
2ọkọ-a kụma ini ì dogi-so ḅa,
ọkụkụ nama kun so ḅara,
anịanga gbọrụḅọ-sọ inetẹ ị̀ ḅọrọma ḅịa,
tẹ ini ị̀ kanị-kọsịma ḅa.
3Yei KỊNỊNYANAḄỌ, ị̀ Tamụnọ,
jen sakị à si kẹ mịẹ tẹ ḅọ emi
tẹ ḅẹrẹ-ḅarasii nyana tẹ ḅẹḅẹ;
4jen sakị à si kẹ ị̀ na dein ḅụ simearị ḅọ mịẹ tẹ ḅẹḅẹ mịẹ tẹ ḅẹḅẹ,
anịanịa à kura-a ḅara kẹ jụmọ
nye pụkọ ọkị tẹ ḅẹḅẹ,
5yee si kẹ ị̀ tọn apụ ma ì ḍuka tẹ ì kun,
yee ini ị̀ pẹlẹ-gbin tẹ ị̀ ḅaa
tẹ ị̀ ḍụẹịn kẹ kiri-ḅio gbin kuroma tẹ so!
6Yei KỊNỊNYANAḄỌ, saakịị, ị́ ịganị ḅụ!
Saakị-sịẹ tẹ si kẹ ị̀ tọn-arị apụ ma na
bịamaa ịna owi-ịganị mẹ ḅụ:
ị́ ḅụụ jike saakị tẹ ḅarasụa ị̀ pịrị-a:
karakara ḅẹrẹkọn mie í ḅiiarị,
7ọkọẹrẹsị tomi kịrị-kịrị mamgba kobiri ḅo ị́ ḅụụ gborii,
tẹ So-ḅio sime tẹ ḅẹrẹtọn ịn pịrịị.
8Ị́yẹrị anie tomi mamgba ḅẹrẹkọnḅọ.
Yei KỊNỊNYANAḄỌ, ḅẹrẹkọn ị̀ ḅara iḅimaa:
í nimim à mịẹ ye ofori.
9 #
Mịẹ 2.23
Ị́yẹrị anie kuraye mịẹarị Tamụnọ
tẹ wamịna akuroma ma na wa ḅiiarị aị na kọn-arị.
Si atomi ma si-sịḅịḅio mẹ dasịẹmaa
tẹ iḅi kẹ iḅi-apụ ma mịẹẹ.
10Tamụnọ anie ị̀ gbaịn-arị ḅọ:
ori ọ̀ ḅịḅị pokiarị apụ ḅọrọmarị.
11Tamụnọ anie karakara ḅẹrẹkọnḅọ:
tẹ sakị mamgba ọ̀ ḅẹrẹ-ḅarasii pẹlẹ si-sịḅịḅio-sụapụ ma pịrịarị.
12Ini ịna etela ma ḍima-a ḅẹḅẹ,
Tamụnọ ori okologie farị oḅuma ḅa.
Ori ori iboli nụnụ gagama tẹ anị tẹlẹma tẹ.
13Ori ọ̀ kịnị-ḅaaḅa owuna-aị ma saakị ọlọ tẹẹ
fịnị kọrị ḅara kọrịarị aḍịẹịn ma kẹ
ọ̀ tẹịn ḅẹ apụ tụkụma tẹẹ.
14Si-sịḅịḅio-sụa apụ ma si-aị kuroma ḅoarị ḅara ḍikii:
ịn ḅụụ-fụka tọn pakama ḅo tẹ oḅori kẹ kịnị
sịn amịẹaị mịẹarị.
15Kụma in tuu jen-apụ pịrị ḍiein ma,
ini rẹ mie arị kun sịẹmarị.
16Mie ḅụ ini mịẹ si ḅarana in fomu tẹẹ,
tẹ kụrọ-kụrọ mịẹ ye tẹ ịn mịẹ ye mẹ ḅo ye kẹ ịn lama tẹẹ.
17Àrị ịmịẹtẹ kẹ KỊNỊNYANAḄỌ ḅe ḅẹẹarị ọ̀ karakara ḅẹrẹ kọn-arị gotẹ,
à nume su-su KỊNỊNYANAḄỌ ḅe tokiniarị, Gele Tẹịnḅọ ḅe.
(C) The Bible Society of Nigeria