Devidi-Anume 45
45
Amadaḅọ Ere-Ịyarị Sakị In Su Nume
1Iḅi ẹkwẹn ì kuroma sọ ḅin-arị,
à mịẹ nume mẹ su amadaḅọ ḅe bomarị sakị.
Ḍiri kẹ ḍịn-ḅọ kẹ, kẹ sara ḅara
anie ị̀ ḅẹlẹ ọgọnọ arị tẹịn-tẹịn pakarị ḅara.
2Ḍiki-tọrụ ḅụ, tomi mamgba ị́yẹrị iḅi tẹịnm;
ẹkwẹn kọn ḍịn-ḅọ.
Tamụnọ sakị mamgba í bomarị.
3Opu amadaḅọ, í okologie sụkaa;
í ebube nyanam, ị́ ḅakam!
4Ḅakaḅọ, mẹnjị mu owu-ḅara-iḅi nyana-a,
ị́ karakara na jụmọ-jụmọ inoma-a na ḍụarị ye ḅụ!
Ị́ ịnyọ opu owu-ḅara-iḅi, iḅi, iḅi kẹ ị̀ pịrị ḅa!
5Ị́ aḍịẹịn ma oḅuarị,
arị si kẹ ị́ tọn apụ ma aḅioḅẹngbọ kan sọ muarị;
sịẹ-sịẹ ma nwẹnị ị́ aḅụọ-suku ḅịkị koroarị.
6 #
Hib 1.8,9 Tamụnọ kẹ ị́ pịrị daarị ama mẹ,
ị́ anị da-mu ḅẹẹ-sakị ḅẹẹ-sakị la ḅa.
Ị́yẹrị anie aḍụa ofori ḅara kẹ ḅẹrẹtọn ị́ atomi pịrịarị;
7í kuraye ḅẹlẹma tẹ siye ḍiki-ḅioḅuarị.
Anie ẹrẹsị Tamụnọ, ị́ Tamụnọ ḅe, ị́ sẹlẹ ọkị tẹẹ,
tẹ ḅioḅẹlẹ kẹ ị́ ọgọnọ ọsụma-ọsụma sararị, ọ̀ kẹ jen
gbọrụ amadaḅọ sọ na mịẹ-a ḅara.
8Maha na alo na nwẹn-sịn kụnụ aị kẹ mịẹ sẹntị ị́ kapa ḅụ kụnụarị;
ị́ ama-da opu awarị ma tẹ ọdụ kẹ
ḅirima aị ma ḅio nume ḍịn apụ su-su í ḅioḅẹlẹmarị.
9Ị́ ama-da warị mẹ ḅẹ ogigo mẹ ḅio
ḅẹ iriawọ ma ogboku amadapụ awọmẹ sọ emi,
í emine mẹ ama-ḅara anga ḅụ ama-da
ẹrẹḅọ ma iḅi tẹịn golu ḅiriaị ḅiri tẹ sịẹ wararị.
10Amadaḅọ ḅe ịya ḅẹ ẹrẹḅọ, à ḍukoarị
ye mẹ poki; ị́ ama ḅẹ apụ na ị́ amịnapụ na kẹ ḅioḅọrọma-a.
11Í iḅi mịẹ tẹ amadaḅọ ḅe tẹmẹ ị́ ịgbanị ḅa;
ori ị́ sịḅịdaḅọ sọ tẹ, ọkọẹrẹsị sịḅị-tuu ọ̀ pịrịị.
12Taya ḅẹ apụ ḍiepịrị-aị kẹ ḅo ị́ pịrị ḅa,
ngọ-kọn apụ ḅo ị́ tọrụ iḅi ọkị ḅẹ anga ḍọkị ḅa.
13Amadaḅọ ada ma ama-da opu warị mẹ ḅio emi —
árị iḅi ye ḅakam.
Á sụa wararị vọrọrọ-kapa mẹ golu-golu iri mie ịn kẹ anị ḍori yee.
14Á ḅiri gẹnị-gẹnị vọrọrọ-kapa mẹ na
mie ini á ḅọrọma amadaḅọ ḅe dama-mu ye:
árị iriawọ ma á pono mum,
ini sọ ini ịn kẹ ḅo ọ̀ lam.
15In ḍereku na ḅioḅẹlẹ na kẹ ḅoarị,
tẹ amadaḅọ ḅe opu warị mẹ sọ-muarị.
16Ị́yẹrị ị̀ amadaḅọ, ị́ tọnwa awọ iyi tẹ ini í kiri ọkị tẹ ama-da ḅa,
ị́ ḅarị ofori sakị, ị́ ị́ elemu aḍapụ kiri ọkị ḅara,
tẹ ị́ ịn mịẹ tẹ ịn ḅẹrẹtọn bebe tomikiri mẹ pịrị apụ sọ ḅa.
17À kẹ í bomarị nume mẹ mịẹ tẹ ị́ ereso
mẹ sime mu ḅẹẹ-sakị ḅẹẹ-sakị la ḅa,
tẹ tọrọkọ-jụ ḅo ḅarị sakị mamgba ḅụ
ḅẹḅọ-ḅẹḅọ í tokini ḅa.
(C) The Bible Society of Nigeria