Obadaya 1
1
KỊNỊNYANAḄỌ ḅe Idọmụ Fomu Ḅa
1Mie KỊNỊNYANAḄỌ ḅe kẹ Idọmụ sịẹ mẹ gbolomaye ḅụ Obadaya ḍie ịkịan mẹ:
KỊNỊNYANAḄỌ ḅe ori oku-mẹnjịḅọ kẹ
sịẹ-sịẹ ma fịrịma tẹ
wa ori oku mẹ naa tẹẹ:
“Ọ́ tẹlẹmaa! Ó yee wa mu ọmụ kẹ Idọmụ paka!”
2KỊNỊNYANAḄỌ ḅe Idọmụ ḅẹẹm,
Àrị ị́ mịẹ tẹ ịnyọ ị́ ḅụụ faa ḅa;
ḅẹḅọ-ḅẹḅọ í ḍiki-iderima ḅa.
3Ị́ ḅụụ-gelema mẹ oḅori kẹ ị́ sịn tẹẹ.
Ị́ sịḅịda opu ama mẹ anie paịn-paịn-a kụrọ tẹ ḍụḅarịị;
Ị́ angarị yọ mẹ nwẹnị gele faa, tụndụ ma ḅio,
tẹ mie ḅụ ị́ ị́ ḅụụ ḅẹẹarị,
“Tụḅọ inetẹ ị̀ nụnụ iderima ḅẹ mọ?”
4Ị́ nwẹnị igo feni fiin ḅara kẹ
gele-faatẹ anga la tẹẹ sọ,
anịanịa lolia ma ogboku ị́ warị nama tẹẹ sọ,
àrị ị́ nụnụ ideri kiri ḅio gbin ḅa.
5Furuapụ ḍin kẹ ḅo sakị,
ini ọkị ḅii ye kịngẹ mie ini ọkịarị.
Tomi girepu-asịnmgbọlụ kolokoloarị sakị,
in boowa kalịye kọnma-kọnmam.
Kụma ị́yẹrị, ị́nịna fịya-a apụ ma ye kọnma-a ḅara kẹ ị́ fama tẹẹ!
6Ọmịnị Ịsọ furo-ḅẹ-apụ, ọmịna ngọ ma kịnị fọịn tẹẹ!
7Ị́ jụ ḅẹ apụ ma oḅori kẹ ị́ sịn tẹẹ;
ini í bebe amakiri mẹ ḅụ í dee-siin tẹẹ.
Ị́nịna ḅẹrẹ ofori ḅara sime apụ ma
owu kiri ị́ nẹngịma tẹẹ;
Ị́nịna fị gboloma-gboloma ikiapụ ma
ḍiein tuu ị́ pịrị tẹẹ, kụma í nimi-a;
Ini ị́ kẹ fiearị, “Ori opu ye-nimi mẹmgba ndẹẹ anị?”
Mie KỊNỊNYANAḄỌ ḅe ḅẹẹ yee:
8Anị ene mẹ ḅụ, àrị Idọmụ fomu ḅa;
àrị ịna opu ye-nimiapụ ma ḅaa guluguluma ḅa,
tẹ ịna ye-nimi mẹmgba kọrọrọ-siin ḅa.
9Tẹmanị ama ḅẹ ọmụapụ ma tẹmẹ-naịn-naịn ḅa,
tẹ Idọmụ ḅẹ ọmụḅọ goḅọ-goḅọ ịn ḅaa ḅa.
Tamụnọ Gotẹ Idọmụ Fomu Ḅarị Aị
10Ị́ ị́ amịnapụ, Izirẹlịapụ ma aị furu tẹ ịn ḅaa ye ẹrẹsị,
kịnị í guluguluma tẹ ị́ kẹ
kụn nyana-a ḅara wẹrị gbamaso ḅa.
11Anị ene mẹ ḅụ, í ḅele tẹ sịẹsimem,
inina fịya-a apụ ịna onu-aḅọkọ ma kan-sara sakị.
Arị kịnị tọrụ nimi-a apụ ma si laa ḅara, mie ị́yẹrị sọ si laa ḅara;
anie Jeruselemu ngọ ma dogi-so
tẹ ịna ogboku anị ḍiya ọkị apụ ma.
12Í gotẹ ị́ amịnapụ Izirẹlịapụ ma
ḅụ paka si ḅẹrẹ mẹ ḍikiḍiki tẹ ḅioḅẹlẹ-ḅẹlẹ ye ofori ya.
Ịn fa ene mẹ ḅụ í ḅioḅẹlẹ na-iḅi-a.
Ịna ḅụụ-ḅalaḅala ḅụ ị́ ịn ḍẹrị na-iḅi-a.
13Ị̀ atomi ma opu ama mẹ ḅio ị́ sọ-mu na-iḅi-a,
paa ịna tọrụsiẹrị ḍiki tẹ ḅioḅẹlẹ,
tẹ ịna ngọ ma ọkị-so, opu ḅẹrẹ ịna ḅụụ paka ene mẹ ḅụ.
14 #
Ayị 34.5-17; 63.1-6; Jer 49.7-22; Izi 25.12-14; 35.1-15; Emọ 1.11,12; Mal 1.2-5 Ị́ tẹra-isira mẹ ḅụ sịẹsime na-iḅi-a,
ḅụụkụrọmatẹ mangị-soarị apụ ma ḅaa ḅẹ ḅara.
Ị́ ịn saḅama inina fịya-a apụ ma pịrị na-iḅi-a,
ịn ḅụụ-ḅalaḅala ene mẹ ḅụ.
Tamụnọ Sịẹ-Sịẹ Ma Kọn Ḅa
15Ene mẹ ḅo kpeki tẹẹ, yẹrị KỊNỊNYANAḄỌ ḅe
sịẹ-sịẹ mamgba kọn ḅẹ sakị mẹ.
Ị́yẹrị Idọmụ, ị́ mịẹ tẹ ye mẹ
ịn kẹ ị́ mịẹ ḅa.
Ị́ pịrị pakama ye mẹ, mie ị́ pịkị ọkị ḅarịye.
16Àrị ị̀ atomi fomu ḅara
ị̀ fịafịa tụndụ mẹ ọgọnọ ḅụ,
anie à pịkị in gbori-ikelema wararị asịẹ ma fomu ḅarị ḅara;
à fomu-ḅara kẹ ịn pịrị ḅa, tẹ in tomikiri mẹ ḅụ ḅọrọ so ḅa, gbala jene amụ in sime-a.
Izirẹlị Owu-ḅara-iḅi Nyana Ḅa
17KỊNỊNYANAḄỌ ḅe ḅẹẹm mịnẹ Zayọnị Tụndụ ọgọnọ jen-apụ mangị-so ḅa,
tẹ anị fịafịa yọ sọ ḅa.
Jekọbụ atomi ma pịkị siin ịna
amakiri mẹ nyana ọkị ḅa.
18Jekọbụ na Josẹfụ na atomi ma kọrị-fịnị kịka ḅa;
ini Ịsọ guluguluma ḅa,
fịnị samụnọtẹ afun dọkịma ḅara.
Ịsọ furo-ḅẹ-ḅọ tẹ fịị-a so ḅọ paka ḅịa.
19Juda suku-jụ ḅẹ apụ Idọmụ ọkị anga ḅa,
ịrụa-ideriarị-anga ḅẹ apụ tẹ ḅụọ-kẹ-mẹnjị-saḅarị tụndụ mẹ ḅụ ḅo apụ ma Filisiteni nẹngịma ḅa;
ịn pịkị Iferemu na Sameriya na nyana amakiri mẹ kẹ amịna nye sọma ḅa.
Benijamịnị ḅẹ apụ ma Giliyadi ọkị ḅa.
20Izirẹlị ọgọnọ-jụ kun-soapụ ma ọmụ-ogbo mẹ ḅo Fohinisiya ọkị ḅa,
ọkị mu ọgọnọ-jụ Zarẹfatị la.
Jeruselemu ḅụ kun-soapụ ma tẹ Sadisi ḅụ emi apụ ma,
Juda ḅẹ suku-jụ ḅẹ ama ma ọkị ḅa.
21Owu-ḅara-iḅiapụ ma#1.21 Anị fie jen ye anie, Ḅọrọmatẹ-apụ Ma kpọlị Zayọnị mu ḅa;
in ḅẹrẹtọn Idọmụ pịrị ḅa.
Tẹ KỊNỊNYANAḄỌ ḅe amadaḅọ sọ ḅa.
(C) The Bible Society of Nigeria