Nahọmụ 1
1
1 #
Ayị 10.5-34; 14.24-27; Zẹf 2.13-15 Ye-nimiḅọ ḅịḅị ḅio Ninive gbolomaye ḅụ paka-ḅo oku-ḅịḅị. Miemẹ anie Ẹlịkọsị ḅẹ Nahụmụ ẹrị ịkịan mẹ ḅẹ ḍiri mẹ.
Ninive Ḅụ KỊNỊNYANAḄỌ Ḅe Nyana Ịganị Mẹ
2KỊNỊNYANAḄỌ ḅe anie afana Tamụnọ, tẹ gbẹẹfị ḅiiarị ḅọ;
KỊNỊNYANAḄỌ ḅe ọ̀ gbẹẹfị ḅiiarị,
tẹ pịkị kụrọ ịganị kọn-kọnm;
KỊNỊNYANAḄỌ ḅe ori na fịya-a apụ ḅara gbẹẹfị ọkịarị tẹ ịganị wẹrị ori na fịya-a apụ pịrị-pịrịm.
3KỊNỊNYANAḄỌ ḅe ọ̀ nwana-nwanama ịganị-ịganị-a,
tẹ gburo-gburo ḅụratẹ kụrọ nyana wararị;
KỊNỊNYANAḄỌ ḅe gbala-gbala
ḅẹrẹ-ḅarasii-ḅọ mẹ fomu-a ḅara kẹ mḅọ wẹrịso ḅịa.
Kụrọ fẹrụ na erise na ḅio mie ori etela simearị ye,
anịsakị kpiti aso-tọrụ ma anie ori aḅụọ-suku ḅẹ fọọn.
4Ori opu tọrụ mẹ ḍiki ịganịm, tẹ mịẹtẹ anị samụnọm
ọ̀ tọrụ mẹmgba samụnọmam;
Basani na Kamẹlị na kpatụ tẹ samụnọm,
Lẹbanọnị panga-ḅaa mẹ ḍisim.
5Ọ̀ tọrọkọ tụndụ ma jike tẹ gẹẹm,
tụndụ ma sanịm;
ọ̀ tọrọkọ kiri mẹ ye ḅụ sọ-a ḅara kẹ koro-simem
tomikiri mẹ na anị ḅio anga aị mamgba na.
6Tụḅọ inetẹ ye ọ̀ ḅụụ-ḅẹsọ tẹ ọ̀ tọrọkọ sịẹsime ḅẹ?
Tụḅọ inetẹ ori ịganị mẹ ḅẹ ọfịrị mẹ inema ḅẹ?
Ọ̀ kụrọ ịganị fịnị ọsụma paka ḅara pakam,
tẹ ori ịkụ ma kẹ pakịrị-pakịrị puu-puu saram.
7KỊNỊNYANAḄỌ ḅe ori iḅim
ḅụụ-fụka ene ḅụ kụrọtẹ ḅụụ ḅọị anga;
inima tẹ ò ḅio ḅụ ḅụụ ḅọịarị apụ ma,
ori in nimi wararị.
8Kụma seri ḅo ye-yọ mẹmgba gbaịn-arị opu minji,
mie ọ̀ kẹ ori na fịya-a apụ ma gbọrsịḅị
ini ọfịn sin ḅarịye:
anịsakị ori ori na fịya-a apụ ma ḍuka
kanakana ḅio suu ḅa.
9Ị́ KỊNỊNYANAḄỌ ḅe kẹ tọ ḅẹrẹ-ḅiya ḅẹ?
Ọ̀ mịẹtẹ anị gbọrsịḅị kunoma ḅa;
ọ̀ maa sakị kẹ gbẹẹfị ḅii ḅịa
ori ọmụapụ ḅụ.
10Jen-jen fịnama wararị anangị dọkị fa ḅara,
ịn dọkị fa tẹ samụnọtẹ ịkpakụ dọkị fa ḅara.
11Ị́ ḅụụ ḅio kịnị paka-ḅo-a,
KỊNỊNYANAḄỌ ḅe kẹ si ḅẹrẹ-ḅiya,
tẹ ḅiokpọ ḅara kẹ kịnị toluma ḅọ.
12Mie KỊNỊNYANAḄỌ ḅe ḍuko yee,
“Ịn nwẹnị ịnyọ nyana tẹ tọnwa atomi sọm ḅẹsọ,
ịn pẹlẹ-so tẹ ḅọrọ-so ḅa.
À fomu-ḅara kẹ ị́ pịrị tẹ ḅẹsọ,
à ḅarị jen-maaịn kẹ í fomu ḅịa.
13Anịsakị mịọkụ arị ị́ ḅụụ ḅụ ọ̀ kọngọ sụa ikuye mẹ anyịma siin ḅa,
tẹ ọmịna gboloma ma kan gala-gala ḅa.”
14KỊNỊNYANAḄỌ ḅo ḅe í gboloma oloko sụa tẹ:
“mịẹtẹ ị́ ẹrẹ goo gbamaso ḅẹ ye ḅarị paka ḅịa;
ọmịna oru-atamụnọ ma tẹkẹ awarị ma ḅio
àrị ọ́ kẹ ye kịkama kara aị na tẹmẹ-aị
ma na pẹlẹ-siin fama ḅa.
À ḍuḅu tẹlẹma ọ́ pịrị ḅa
gbala ó sii kọnma-a ẹrẹsị.”
15 #
Ayị 52.7
Tụndụ ma ọgọnọ oriḅe tẹ iḅi-oku ma ọkị-ḅoarị
ḅọ ḅe aḅụọ-suku ma ḍikii,
oriḅe tẹ dein ḍuko wasarị ḅọ ḅe!
yei Juda, ọmịnị ọ́ fị-fị alalị ma fị,
ọmịnị ó minini ịlọ ma sumaa,
kẹ gotẹ ọkọ ḅẹẹarị, si-sịḅịḅio-sụaḅọ ḅe
gbala-gbala ḅarị ḅo ọ́ da-paka ḅịa;
ịkatakirikọn-a-ḅara ịn nwẹn kẹ pẹlẹ-so tẹẹ.
(C) The Bible Society of Nigeria