Jobu 7
7
Jobu Ọ̀ Ḅụụ-fụka Ḍuko Tamụnọ Sụam
1Tomikiri ḅụ tomḅọ nyana ye kụrọ fịrị mẹnjị anị-a,
tẹ ori ene ma ọkọ-fịrịmẹnjịḅọ ene ma sime-ḅara sime-a?
2Omoniḅọ tẹ sịḅị-kikima-yọ ḍọkịarị ḅọ pembe ḅara,
na ọkọ fịrịmẹnjịḅọ tẹ amịna gbẹẹ-ye ḍọkịarị ḅọ sime-ḅara;
3anie à ye ofori ḅara kẹ akalụ-akalụ ḅụ koro-simearị ḅara
tẹ sịḅị-kanakanama aḍin ịn nwẹn ḍie ị̀ pịrị tẹ ḅara.
4À ḅọlọlọ tẹso, kụma, à ḅẹẹ tẹ,
Ḍin mẹ kọkọ ala tẹ,
à tọ sakị saakị ḅẹ?
Ḅụụ-gbene-a ị̀ ḅụụ ḅaka nwenii ene ḅaa ḅa.
5Angule na, muno na, kapa sọ tẹ ì oju-meni mẹ gbaịnm;
ì oju-kiri mẹ akpakpa sọm, tẹ pịkị ịwọma gẹẹm.
6Ì ene ma fiin ḅịtẹ ḍori-ḅọ ọja nẹngịm,
tẹ ḅiokpọ ofori ḅara kẹ arịḅẹ kunoma lam.
Jobu Tamụnọ Tẹkẹm
Jobu ḅẹẹm:
7Yei Tamụnọ, kẹ ḅiokoroma mịnẹ ì ḍumo anie ọwụ;
ị̀ tọrụngbọ gbala-gbala ḅarị siin iḅi ẹrị ḅịa.
8Anị ḅọ ḅe tọrụngbọ mẹ tẹ ị̀ ẹrị ye mẹ,
ḅarị jen kẹ ị̀ ẹrị ḅịa;
ị́ atọrụngbọ ma ị̀ ḅụụ emi ogbo, à so ḅa.
9Kpiti So-tọrụ mẹ sịkịrị tẹ mẹnịma-faa ḅara,
mie anịḅọ ḅe tẹ ideri ḍuḅu sọ ḅọ ḅe ḅarị ḅo-a ḅara;
10ọ̀ ḅarị jen kẹ pịkịma ọ̀ warị ḅo-a,
ò sime yọ mẹ sọ ḅarị jen kẹ ò nimi-a.
11Anị ẹrẹsị arị ị̀ ḅịḅị gbaịn wẹrị ḅịa;
ị̀ tẹmẹ ḅẹ fụka ye mẹ ḅụ arị ẹkwẹn ḅa;
à nyana tẹmẹ akụ ḅụ à ye ḍuko sụa ḅa.
12Yẹrị ḅọrọ opu tọrụ mọọ, anịanịa owu-ẹḅẹkẹlẹḅa
tẹ ị́ kịnị kẹ koroma tẹ ì ẹbị ḅẹ?
13Ì monoye ì ḅio kpọma ḅa,
ị̀ ḅọlọlọ anga ì ḍuko-sụaye mẹ mịẹ sarasarama ḅa
à nwẹn ḅẹẹ sakị,
14anịrẹ ị́ nwẹnị ḍawọ kẹ ị̀ ḅalafama,
tẹ ịkịan kẹ ị̀ tẹmẹ-naịn-naịnma,
15mịẹ tẹ arị ì mgbe ma sẹlẹ-ọkị ḅẹ nakara
à fangala ḅaa na, fịị na sẹlẹ-ọkị ḅẹ ḅara.
16Àrị ì ḍumo mẹ ḍiki-simam;
à ḍumo gbamaso ḅịa.
Ị̀ wẹrịso à koro-sime, kẹ gotẹ ọkọ ḅẹẹarị,
í ene ma anie ọwụ.
Jobu Tomi Gotẹ Tamụnọ Tẹkẹm
Jobu ḅẹẹm:
17 #
Dev 8.4; 144.3 Tomi anie tiye tẹ í opu ḅara kẹ ịn ḍikiarị,
tẹ í ḅioḅẹngbọ kẹ ịna ọgọnọ gbanarị,
18tẹ dede-ḅio goyegoye mu-mu toluma ịn ḍikiarị,
tẹ sakị goyegoye ḅụ ịn da-da ḍikiarị?
19Ị́ ì ḍiki nwenii mu tọ sakị la tẹ tọrụ siin ḅa,
anịanịa ị̀ wẹrịso tẹ à koro-sime nwenii arị ị̀ fịla mẹnị ḅẹ?
20À nwẹnị si mịẹ kụma, à tiye kẹ ị́ mịẹ,
ị́yẹrị tomi ẹbị ma ḅọrọarị ḅọ?
Í tiegotẹ ị̀ kẹ í elekima mịẹarị?
À tiegotẹ ḅụụ-palịmaye sọ ị́ pịrị tẹ?
21Í tiegotẹ ì mịẹ-irima wẹrịso-a,
tẹ ị̀ karakara-a mẹ saakị sin-a?
Kẹ gotẹ ọkọ ḅẹẹarị,
mịọkụ à mu kiri mẹ ḅio koro-sime ḅa;
Ị́ ị̀ ḍọkị ḅa, kụma à ḅarị paka ḅịa.
(C) The Bible Society of Nigeria