Jobu 4
4
Jobu Ikiapụ Ori Na Ẹkwẹnm
Ẹlịfazị Ẹkwẹn Jobu Pịrịm
1Anịtẹso Ẹlịfazị, Tẹmanị ḅẹ ḅọ ḅe nwẹnị ḅẹẹ, 2Gbọrụḅọ ị́nịna ẹkwẹn gbọrụmgbọ kọn ḅara mịẹ kụma, ị́ ịganị ḅẹ mọ?
Anịsọ tụḅọ inetẹ ẹkwẹn-a so ḅẹ mọ? 3Ḍikii, í ye kẹ tọnwa-apụ toluma tẹẹ,
tẹ ịnyọ kẹ kụrọ-a aḅara ma pịrị tẹẹ.
4Ị́ ẹkwẹn-aḅịḅị ori tẹ pụmbụarị ḅọ ḅe ọlọ-sịẹma tẹ
tẹ ịnyọ ḅụụ ḅụ ofori aḅụọ-kụkụ ma sịẹma kụrọma tẹ
5Kụma mịọkụ anị ḅo ị́ la tẹẹ, tẹ ị́ ḅụụ ḅarị dein-a
anị ḅara kẹ ị́ lamam, tẹ í ekpe tukutuku tẹ.
6Ị́ Tamụnọ mangịma anie í ḅiokpọ, ọkọ-a,
tẹ í etela ma ḅẹ karakara ḅụ í kuroma kẹ gbanam?
7Mịọkụ kẹ ḅiokoroma, mịẹ ye ofori ḅọ jene fịị fa tẹ?
Anịanịa tọ-anga ḅụ ịn karakara apụ pẹlẹ-siin tẹ?
8Àrị ẹrị tẹ ḅara ḅụ,
ini tẹ iri-amịẹaị tẹlẹma fịaị ḍiḅi pịrị apụ ma,
tẹ ḅụụ-fụka ḍiḅi apụ ma,
anị gberie mẹ sokum.
9Tamụnọ sararị ọwụ ḅụ ịn fịị-faam,
ori ịganị kụrọ ḅụ ịn dọkị faam. 10Ọkụkụ ḅe ekire mẹ na, ḅalafama ọkụkụ ḅe pọkọ mẹ na,
asambịrịma ọkụkụ ma aka ma na, anyị tẹ.
11Kụrọtẹ ọkụkụ ḅe fịị-faam, ọ̀ pẹị ḅẹ nama ofori ẹrẹsị,
tẹ ịyọrọ ọkụkụ ḅe ịwọma iyi awọmẹ ma gala-gala tẹ.
Ẹlịfazị Ịkịan Ẹrịm
12Gbọrụ ẹkwẹn-ḅịḅị mịọkụ ḅọị ḅara ḅụ ḅo ị̀ pịrịm,
ì ḅeri anịḅẹ kẹlẹkẹlẹ fie mẹ naa ọkịm.
13 #
Job 33.15
Ḍin ḅụ ḍawọ ḅioḅẹngbọ mẹ pikirimarị sakị mẹ,
tẹ opu mono tomi ponomarị sakị mẹ
14ḅalafa ḅo ị̀ gbaịnm,
tẹ mịẹ tẹ oju sẹkị ḅụ ì mgbe mamgba jikem.
15Gbọrụ tẹmẹ fiin ị̀ tọrọkọ ḅọrọm,
ì oju ḅẹ mpọrị saakị sịẹm,
16Anị mẹnjị-a ḅara kẹ tụkụ sịẹm,
kụma arị inetẹ anị sime-ḅara lekiri-a.
Ye kịka gberie ị̀ tọrọkọ simem,
ye-yọ yaụm, anịtẹrẹmẹ à gbọrụ pọkọ naam.
17Fịị-fịị tomḅọ inetẹ Tamụnọ tọrọkọ ḅụ karakara ḅe?
Tomḅọ inetẹ ọ̀ Tẹmẹḅọ tọrọkọ ḅụ yori-yori ḅẹ?
18Ori afịrịmẹnjịapụ ḅụụ sọ ò ḅioḅẹngbọ kẹ gbana-a,
tẹ mịẹ-irima kẹ ori enjẹlị ma ọlọarị,
19jen-a jen-a ini tẹ aḅaịn awarị ḅio angarị apụ ma,
arị awarị ma tẹ sukutarị-ḍụḅarị fọọn ḅio emi aị ma,
tẹ kọsị tẹrẹmẹ etemi-laga ḅe sọ kọsịarị ye mẹ.
20Dede ọkị-ḅo ḅoḅiri la ḅẹ sakị ịn fịị tẹ;
gbọrụḅọ-sọ anị kẹ ye-sịn-a ḅara ḅụ ịn fịị-faa gbamaso tẹ.
21Ini ịna akpụrụ-warị kpọ ḍigi ọkị kụma,
ịn ḅarị nimi nyana-a ḅara kẹ fịị-a?
(C) The Bible Society of Nigeria