Ayịzaya 21
21
Babịlọnị Ḅịkị Ḅụ Ẹrị Ịkịan
1Mie Babịlonịya gboloma oku. Nume-naowu ḅara ḅụ, fa ḅalafama amakiri ḅụ sime tẹ mịẹ ma ḅoarị, ịkpa mẹ ḅio. 2À kụrọ-kụrọ mịẹ-aị mịẹ ḅẹ ịkịan ẹrị tẹ, jụmọ-jụmọ kẹ dẹrịma na ḅaa-guluguluma na.
Ẹlamụ ọmụ-ogbo ọmụ saakị tẹ! Midiya ọmụ-ogbo ama ma gbori tẹ ḅụụ kikima tẹ ẹbịarị! Tamụnọ ḅe Babịlọnị dogi-ḅo tẹ tọrụsiẹrị mẹ kunoma ḅẹ tẹ.
3Ịkịan mẹ ḅụ arị ẹrị ye na naa ye na opu ḅalafaa na akụ na kẹ ị̀ ḅụụ ḅio suu tẹ, ẹrẹḅọ iyiarị tẹ da-da akụ pembe ye. 4Ị̀ tọrụ-maarị, ḅalafa pịkị ì oju-sẹkịmarị. À ḅoḅiri-so ḅo ye ḍiki simem, kụma anị kẹ ḅo ye jen-a kụma tẹmẹ-naịn-naịn.
5Ịkịan mẹ ḅụ arị ẹrịarị alalị fịye dẹẹ wararị. Rọgụ bịlangịdị mie ịn kẹ alalị fịye mẹ fị ḅẹ ḅo apụ lẹgị anga ma dẹẹ wararị. Ịn fị-na-ḅuu-naarị. Ḅiotọntọn-a oloku pọkọ tọn-arị, “Ọmụ-alapụ! Ọmịnị ọmịna ekpeke ma tẹlẹmaa!”
6Anịtẹso KỊNỊNYANAḄỌ ḅe ị̀ ḅẹẹm, “Mu ama koru ḅọ kẹ ò kiri ḅụ sịẹmaa, tẹ ọ̀ ḅẹẹ ori ori ẹrịarị ye ḍukoo. 7Ori asụ kpọlị tẹ mẹnjịarị apụ, maa apụ maa apụ na, yedogi-anama na, ike-sụa-anama na ẹrịm ḅẹḅẹ, ori iḅiọkụ kweima in ḍikii.”
8Ama-koru ḅọ ḅe oloku pakamarị, “Ị̀ nyanaḅọ arị ama-koru-anga mẹ ḅụ sịẹsime tẹ koruarị eneḅaka na ḍin na ḅụ.”
9 #
Mịẹ 14.8; 18.2 Ḅiotọn-a ḅara ḅụ in ḅoarị! Asụ ọgọnọ kpọlị wararị owiapụ, maa apụ, maa apụ. Ama-koru ḅọ ḅe ori ẹrị ye ḍukoarị. “Babịlọnị ḅịkị tẹ! In sunsin pịrịarị oru-afụḅara mamgba kiri ḅio gala-gala wararị.”
10Ì atomi Izirẹlị in witi nwẹn-sịn mbịaka fomu sara ḅara kẹ í fomu tẹ, kụma mịọkụ arị iḅi-oku mẹ ḍuko ị́ pịrị tẹ, Kụrọmamgba nyana KỊNỊNYANAḄỌ, Izirẹlị Tamụnọ ḅe, ḅara ḅo ye.
Idọmụ Gboloma Oku
11Mie Idọmụ gboloma oku. Gbọrụḅọ Idọmụ ḅụ sime tẹ ị̀ sịn tẹ ḅẹẹarị, “Ama-koru ḅọ, ndẹẹ ḍin mẹ ḅọrọ ḅẹ sakị? Ḍuko ị̀ pịrịị, mu tọ sakị la tẹ ene ḅaa ḅẹ?.”
12À pakịrịm, “Ḅaa ene ḅoarị kụma ḍin pịkị siin ḅo ḅa, í siin gbela ḅarị ḅẹḅẹ, pịkịma-ḅo tẹ gbelaa.”
Arebịya Gboloma Oku
13Mie Arebịya gboloma oku mẹ. Ọmịnị Dedanị ḅẹ apụ, amịna etela mẹnjịapụ gberie-sọ paka-paka-a Arebịya ḅẹ amakiri mẹ akpụrụ-warị pike tẹ sime-sime apụ, 14ó minji kẹ minji ḅuu pọkọ-tarịarị tẹ ḅo ọ́ la apụ pịrịị. Ọmịnị Tẹma ḅẹ amakiri ḅẹ apụ, ó fịye kẹ amịna ama koroma tẹ ḍumo-mangị kọn apụ ma pịrịị. 15Tomi ịn ḅaa ḅẹ tẹ tẹlẹma wararị okologie ḅụ mangị-soarị, tẹlẹma tẹ ịn tẹịn ḅẹ-yearị iboli ma ḅụ, ọmụ dogi-ḅoḅo si-aị mamgba ḅụ.
16Anịtẹso KỊNỊNYANAḄỌ ḅe ị̀ ḅẹẹm, “Gbọrụ kụra gbasị ḅụ Keda ḅẹ afuro ma opu mẹ ḅo kunoma ḅa. 17Iboli tẹịn-apụ anie ḅiokpọ tẹịn atomi Keda ḅụ, kụma ịna ḅụ kirikọn ḅẹ apụ boowa apụ. Yẹrị KỊNỊNYANAḄỌ, Izirẹlịapụ tẹkẹarị Tamụnọ ḅe ḍuko tẹ.”
(C) The Bible Society of Nigeria