2 Paka-aị 4
4
Tamụnọ Warị Mẹ Ḅẹ Kọrịnama Kọrị Aị
(1 Ama 7.23-51)
1 #
Pks 27.1,2 Ori ojo agbamịẹ-anga namam; anị ḅụọ-kuḅu asuei (9 m) kẹ nangwọm, pịkị ḅụọ-kuḅu asuei (9 m) kẹ finjimam, tẹ jeia aḅụọ-kuḅu (4.5 m) kẹ gelem. 2Anịtẹrẹmẹ ọ̀ nwẹnị minji-kokoye mẹ nama, anị ikelema-koro wararị; anị ḅẹ finjima anie jeia aḅụọ-kuḅu (4.4 m), nwẹnị pịkị sọnọma aḅụọ-kuḅu na pakịrị na (2.2 m) kẹ pokolo gele; tọn kụma anịḅẹ ikelema-koro anie mesi sọnọa aḅụọ-kuḅu finji (13.2 m). 3Anị suku ḅụ aḅụrọ sime ọkụ sime aị maa ise minji koko ye mẹ ikelema-korom, ise-ise ḅẹ nangwọ anie sọnọma kuḅu na, inia aḅụọ; ini anị tẹmẹ sakị ini arị kẹ anị na sụa tẹmẹm. 4Oyi maa pootẹ-anambulo finji ọgọnọ anị sịẹm, tẹrẹị tọrụ kẹ ọgọnọ-jụ pakịrị anga dam, tẹrẹị tọrụ kẹ suku-jụ-pakịrị anga dam, tẹrẹị tọrụ kẹ ịrụa-saakịarị-anga anga dam, tẹrẹị pịkị tọrụ kẹ ịrụa-ideriarị-anga anga dam; ịna ọḅụjụ mamgba ḅioju ḅụ emi tẹ minji koko ye mẹ ịna ọgọnọ gbana simem. 5Anị ḅẹ akpakpa ḅara ẹnzụ na gbasịm, anịsakị ịn kẹ anị ḅẹ ḅịḅị mẹ mịẹ ḅara anị kọpụ ḅịḅị sime ọkụ simem, ịn kẹ lili siin fịlawa mẹ ḅụ pakarị fịlawa mẹ sime-ḅara. Ndo-minji sụa ololo mẹ ḅẹ ninea apuku, sọnọ ẹndẹ finji ḅin ḅarị minji nẹngị ye anị ḅio sọm. 6#Pks 30.17-21Ye kẹ sụa tẹ sịkịrị ḅarị oyi anga sọ ọ̀ nwẹn mịẹm, ọ̀ sọnọ kẹ suku-jụ pakịrị sụa tẹ, sọnọ kẹ ọgọnọ-jụ pakịrị sụam. Mịna anga ma ḅụ ini ịn kẹ dọkịma-agba mịẹ aị ma sịkịrị tẹ inwima ḅa, anịsakị agbamịẹapụ ma minji koko ye mẹ ḅio ḅẹ minji ḅiri ḅa.
7 #
Pks 25.31-40
#
Pks 25.23-30
Ịn wẹrịtẹ tọnma ọ̀ pịrị ḅara ḅụ, ori oyia tọnjọ-sịẹma-aị mịẹm, tẹ arị kẹ Tamụnọ-warị mẹ ḅio sịẹmam, sọnọ suku-jụ pakịrị, sọnọ pịkị ọgọnọ-jụ pakịrị. 8Ori oyi adẹbịlẹ sọ mịẹm, tẹ arị kẹ Tamụnọ-warị mẹ ḅio koromam, sọnọ suku-jụ pakịrị sọnọ pịkị ọgọnọ-jụ pakịrị. Ọ̀ nwẹnị golu-golu opu apanị sọnọa si tẹmẹ.
9Agbamịẹapụ ma sime anga mẹ na, opu ḅẹrẹkọn anga mẹ na ọ̀ nwẹn pakama tẹ ḅọkọ sụa arị pịrịm, tẹ ojo kẹ ḅọkọ ma sara gbaịnm. 10Minji-kokoye mẹ ọ̀ kẹ warị mẹ ḅẹ suku-jụ ịrụa-saakịarị-anga ḅụ koromam.
11Huramụ ḅẹlẹ ma na, sọpụrụ ma na, opu apanị ma na sọ tẹmẹm. Mie Huramụ Tamụnọ-warị mẹ ḅụ ḅẹ kọrịnama mẹ tẹ ọ̀ kọrị Amadaḅọ Sọlọmọnị pịrị kọrịnama mẹ kọrị fama ḅara.
12Maa ḅeriaị ma, (ịḅalị)
maa bọlị ma na,
maa ejikila ma tẹ ḅeriaị ma sịḅị ọgọnọ sime aị ma,
maa ịgbọ sime ọkụ sime jen-jen ḅio sọ wararị
ikoli ma tẹ ejikila ma ḅẹ bọlị ma
gbaịn aị ma ḅeriaị ma sịḅị ọgọnọ,
13na kẹ omburo kịkama mịẹ aị ma ḅẹ
ẹndẹ tẹ kẹ maa ịgbọ sime ọkụ sime jen-jen
ḅio sọ wararị ikoli kẹ ejikila ma ḅẹ bọlị ma gbaịn aị ma pịrị aị ma, omburo
pembe aị ma maa ise ḅụ ini arị sụa
ikelemam ejikila ma gberie-gberie ḅụ, ḅeriaị ma ọgọnọ,
14oyia ye-sịkịrị-aị ma, na kẹ arị
gbana oyia ye-sịẹma-aị ma na,
15minji koko ye mẹ na, anị dogi oyi maa
pootẹ-anambulo finji ma na,
16ḅẹlẹ ma na, sọpụrụ ma na fịye-gbọn-aḅala ma na, mịna aị mamgba na arị na kpakụma
aị goyegoye Huramụ-Abị KỊNỊNYANAḄỌ
ḅe warị mẹ ḅụ ịnwaịntẹ ojo kẹ kọrị
Amadaḅọ Sọlọmọnị pịrịm.
17Jodanị ḅẹ ele mẹ ḅio, Sukọtị na Zẹrẹda na ogboku ọgbọịn-lịka kiri mẹ ḅụ mie amadaḅọ Sọlọmọnị arị tẹmẹ ye. 18Sọlọmọnị ḅaka ḅara kẹ mịna aị mamgba mịẹm ẹrẹsị ịn kẹ arị mịẹ ojo mẹ ḅẹ iku sọ ini inetẹ tọn nimi-a.
19Mị-ḅara mie Sọlọmọnị kẹ Tamụnọ warị mẹ ḅio sime aị mamgba mịẹ fama ḅara, golu-golu agbamịẹ-anga mẹ-o, dẹbịlẹ ma tẹ kẹ agba mịẹ Tamụnọ pịrị fịturu ma gbanarị ye mẹ-o, 20tọnjọ sịẹma aị ma na arịḅẹ atọnjọ ma na sọ karakara golu mie ịn kẹ arị tẹmẹ ye mịẹtẹ arị Fịafịa-tẹịn Yọ mẹ tọrọkọ sime tẹ kọrị ḅarị ḅara anị wẹrịtẹ ḍuko ḅara. 21Karakara golu mie ịn kẹ fịlawa ma na, tọnjọ ma na, ye kpapụ aị ma na tẹmẹ ye, 22tọnjọ wiki ḅịḅị kịrị aị ma na, opu apanị ma na, ịn kẹ kụnụaị sụarị ẹfẹrẹ ma na, amụ biin-a anyịmgbọ sụa apanị ma na sọ karakara golu kẹ ini arị tẹmẹm. Tamụnọ-warị mẹ ḅụ ịn kẹ Fịafịa-tẹịn Yọ mẹ gbaịn-arị ḅọkọ mẹ na, opu ḅio mẹ ḅẹ aḅọkọ ma na ịn golu sọ sara arị gbaịn famam.
(C) The Bible Society of Nigeria