2 Paka-aị 35
35
Josaya Saḅaḅọrọ-Alalị Mẹ Kokom
(2 Ama 23.21-24)
1Josaya gbọrụ Saḅaḅọrọ-Alalị fị KỊNỊNYANAḄỌ ḅe pịrịm Jeruselemu ḅụ; tẹ tarị akalụ mẹ ḅe ngei aḍin fa jei karama eneḅaka ḅụ Saḅaḅọrọ-Alalị asambịrịma anana ḅe ḅaam. 2Ori agbamịẹapụ ma tọn ịna kọrịnama akiri ḅụ sunm, tẹ KỊNỊNYANAḄỌ ḅe warị ḅẹ fịrịmẹnjị ḅụ ịna ḅiokpọmam. 3Ọ̀ nwẹnị Livayị furo-ḅẹ-apụ ma tẹ ye kẹ Izirẹlị mẹmgba tolumarị tẹ amịna ḅụụ mịẹ fịafịama KỊNỊNYANAḄỌ ḅe pịrịarị apụ ma ḅẹẹ, “Ọ́ fịafịa ọḅọkụ Igbe mẹ kẹ warị mẹ tẹ Sọlọmọnị, Devidi owiḅọtụḅọ Izirẹlị ḅẹ amadaḅọ ḅe nama ye mẹ ḅio suu; ọ́ ḅarị jen kẹ anị kẹ ọmịna apana ọgọnọ dogi ḅẹ ḅara ofori. Mịọkụ ọ́ fịrịmẹnjị KỊNỊNYANAḄỌ ọmịna Tamụnọ ḅe na, Izirẹlị ori atomi ma na pịrị. 4#2 Pkị 8.14Ọ́ ḍa warị-warị ma wẹrịtẹ kpoo-kpo ma ḅụ sime-ḅara anie Devidi Izirẹlị ḅẹ amadaḅọ ḅe daa-karakarama ḅara mẹ na, ori owiḅọtụḅọ Sọlọmọnị daa-karakarama ḅara mẹ na sime-ḅara ḍiki ọmịna aḅụụ tẹlẹmaa 5Tẹ fịafịa yọ mẹ ḅụ in ḍa awarị-warị ḅụ ọ́ kẹ kpoo-kpo ḍie ḅara mẹ kẹ sịẹ ọmịna mịnapụ agbamịẹapụ-a apụ ma pịrị, tẹ yee Livayị furo-ḅẹ-apụ ma ḅụụ gbọrụ kpo gbọrụ kpo sime ḍa awarị-warị ma ḅụ gberie-gberie pịrị. 6Ọ́ Saḅaḅọrọ-Alalị mẹ asambịrịma anana mẹ ḅaa, tẹ ọmịna ḅụụ mịẹ fịafịamaa, tẹ ḅụụ tẹlẹma kẹ ọmịna mịnapụ pịrị, ọ́ KỊNỊNYANAḄỌ ḅe Mozizi ḅụụ ḅọrọtẹ kọn ẹkwẹn-ḅịḅị mẹ wẹrịtẹ ḅẹẹ ḅara mịẹ ḅẹ ḅara”. 7Anịtẹso Saḅaḅọrọ-Alalị agbamịẹ-aị ḅara ḅụ Josaya kẹ ḅarasụa agbamịẹapụ-a apụ ma pịrị ḅụ anana na oḅori na ogbo mẹ ḅụ asambịrịma anana na, oḅori na, tẹra puku jei ẹndẹ finji (30,000) na, owi-nambulo sọnọma ẹndẹ na oyia asi finji (3,000) na kẹ emi apụ ma pịrịm; mịna aị ma amadaḅọ ḅe nyana aị ma ḅụ ḅom. 8Ori asịḅịdapụ ma kịnị tọn pịrị-a ḅara ḅụ ye kẹ ḅarasụa tomi ma na, agbamịẹapụ ma na, Livayị furo-ḅẹ-apụ ma na pịrịm. Tẹ Tamụnọ warị mẹ ḅẹ sịḅịda opu fịrịmẹnjịapụ ma — anie Hilikaya Sịḅịda-Agbamịẹḅọ ḅe na, Zẹkaraya na, Jaziyẹlị na — nwẹnị kẹ Saḅaḅọrọ-Alalị agba mịẹ gotẹ asambịrịma anana na oḅori na sonioa ẹndẹ oyia asi finji (2,600) na, owi-nambulo jeia si (300) na kẹ agbamịẹapụ ma pịrị. 9Livayị furo-ḅẹ-apụ ma sịḅịdapụ Kọnanaya sọ, na ori owiapụ-amịnapụ Sẹmaya na, Nẹtanẹlị na, pịkị Hasabaya na, Jaziyẹlị na, Jozabadị na asambịrịma anana na oḅori na oyi maa ẹndẹ finji na, oyia asi (5,000) na, owi-nambulo gbọrụ ẹndẹ na sọnọa si finji (500) na kẹ Livayị furo-ḅẹ-apụ ma pịrịm kẹ Saḅaḅọrọ-Alalị agba ma mịẹ. 10In fịrị mẹ kẹ ọrụtọn fama tẹso, agbamịẹapụ ma nwẹnị ịna sime kiri ḅụ sịẹsime, Livayị furo-ḅẹ-apụ ma pịkị amadaḅọ ḅe tọn ḅara ḅụ ịna kpoo-kpo ḅụ simem. 11In nwẹnị Saḅaḅọrọ-Alalị asambịrịma anana ḅe ḅaa, tẹ agbamịẹapụ ma Livayị furo-ḅẹ-apụ ma in ḅaa tẹ anama ma ẹsịarị ogbo ọmbie mẹ tẹ in ọkị ye mẹ kẹ asana. 12In nwẹnị dọkịma agbamịẹ-aị ma sikima, mịẹ tẹ ini arị ḍie agbamịẹapụ-a apụ ma pịrị ḅẹ ḅara in wẹrịtẹ ḍa awarị-warị ḅụ sime-ḅara, ịn kẹ agba mịẹ KỊNỊNYANAḄỌ ḅe pịrị, anị wẹrịtẹ Mozizi ḍiri mẹ ḅio kẹẹ wararị ḅara. Anị ḅara mịẹ ịn kẹ owi-nambulo ma so mịẹ ḅara. 13#Pks 12.8,9In fịnị kẹ Saḅaḅọrọ-Alalị asambịrịma anana ḅe fọịnm, kụrọ-ḅara ḅụ sime apụ ma wẹrịtẹ tọn ḅara; tẹ ịn nwẹnị fịafịa agbamịẹ-aị, ma kẹ ye-sọ aḅẹlẹ ḅio na, ḍụḅa-ḍụḅatẹ opu-aḅẹlẹ na, panị aḅio na ḅụ sọ tẹ fọnya dogi-mu tomi ma pịrịm. 14Mịẹ mẹ ḅọrọ tẹso, ịn nwẹnị tẹlẹma ịna ḅụụ na, agbamịẹapụ ma na pịrị, gbala Erọnị owiapụ-awọmẹ agbamịẹapụ ma dọkịma-agba ma na, ḅẹlẹkị mẹ na dọkịma kọrịnama kọrị nwenii ene ḍinm ẹrẹsị. Anieḅụ Livayị furo-ḅẹ-apụ ma tẹlẹma in ḅụụ na Erọnị owiapụ-awọmẹ agbamịẹapụ ma na pịrịm. 15#1 Pkị 25.1Devidi na, Asafụ na, Hemanị na, Jedutuni amadaḅọ ḅe so-ḅịrịḅọ na wẹrịtẹ tọn ḅara, Asafụ owiapụ-awọmẹ nume-suapụ ma ịna sime kiri ḅụ simem; ogigo-aḅọkọ ḍikiḍikiapụ ma ḅọkọ-ḅọkọ ma ḅụ simem; kẹ gotẹ ọkọ ḅẹẹarị, ini ịna fịrị ḅụ sikima na-iḅi-a, gbala ịna mịnapụ Livayị furo-ḅẹ-apụ ma tẹlẹma in pịrịm ẹrẹsị. 16Anieḅụ Amadaḅọ Josaya wẹrịtẹ tọn ḅara, KỊNỊNYANAḄỌ ḅe fịrị mẹmgba in tẹlẹmam anị ene ḅụ, Saḅaḅọrọ-Alalị mẹ fị na, KỊNỊNYANAḄỌ ḅe agbamịẹ-anga mẹ ọgọnọ dọkịma-agba mịẹ na; 17#Pks 12.1-20tẹ Izirẹlịapụ ma tẹ sime apụ ma Saḅaḅọrọ-Alalị mẹ fịm anị sakị ḅụ, tẹ sọnọma ḍin kẹ sun-a fịturu kopini afịaị fịm. 18Samụwẹlị ịkịankoroḅọ ḅe eneḅaka ma kụra-ḅio Izirẹlị ḅụ nwẹn pembe Saḅaḅọrọ-Alalị amụ fị-a; Izirẹlị ḅẹ amadapụ ma ḅụụ Josaya na, agbamịẹapụ ma na, Livayị furo-ḅẹ-apụ ma na, Juda na Izirẹlị na mamgba ḅụ sime apụ ma na, Jeruselemu ḅụ sime apụ ma na fị Saḅaḅọrọ-Alalị mẹ sime-ḅara sime ye fị tẹ kpọkpọ gbọrụḅọ ofori. 19Josaya ama-da ḅụ maa akụra fa si karama kụra ḅụ mị Saḅaḅọrọ-Alalị mẹ fịm.
Josaya Ama-da Kunoma Mẹ
(2 Ama 23.28-30)
20Mịẹ mẹmgba ḅọrọ tẹ, Josaya Tamụnọ warị mẹ tẹlẹma tẹso, Neko Ijiputi ḅe amadaḅọ nwẹnị Yuferetisi ọgọnọ Kakẹmisi ḅụ owu sọ ḅẹ mu tẹ Josaya nwẹnị mẹnjị paka ori na sọ ḅe mu. 21Kụma ọ̀ nwẹnị opu-apụ kẹ oku kẹ ọ̀ fịrịma, tẹ ḅẹẹm, “Juda ḅẹ amadaḅọ, wa jụmọ-jụmọ na tọ mịẹ ye nyana? Mịmgba mẹ àrị ị́ na owu sọ ḅẹ ḅo-a, kụma ị̀ na owu sọarị warị mẹ mie àrị owu kẹ paka ḅẹ muarị, tẹ Tamụnọ tọn ị̀ pịrị tẹ à fọnya mịẹ. Ḅarị Tamụnọ na tụḅụrụ ma, oriḅe tẹ ị̀ na emi ḅọ ḅe, anieofori ori ị́ ḅaa ḅa.” 22Anịsọ Josaya ọ̀ ḅụụ ḅụ pịkị-so-a, kụma nwẹnị amịna ḅụụ ḍima mịẹ tẹ ori ori na owu sọ ḅarị ḅara. Tamụnọ ḅịḅị ḅụ paka-ḅo ye mẹ ò Neko ẹkwẹn-aḅịḅị ma poki-a, kụma ò mu Mẹgido ḅẹ ele mẹ ḅio owu ḅio sọm. 23Okoro-ḍiein tẹịn apụ nwẹnị Amadaḅọ Josaya tẹịn kpara; tẹ amadaḅọ ḅe nwẹnị ori afịrịmẹnjịapụ ḅẹẹ, “ọmịnị ị̀ kẹ soo, kẹ gotẹ ọkọ ḅẹẹarị, ye si ḅara kẹ ị̀ la tẹ”. 24Anieḅụ ori afịrịmẹnjịapụ nwẹnị kirimẹnjị-ọmụarụ mẹ ḅio ò koroma, tẹ ọ̀ maaịn karama kirimẹnjị-ọmụarụ ḅio ọ̀ sẹịn Jeruselemu ḅom. Ọ̀ nwẹnị fịị, tẹ ịn nwẹnị ori aḍapụ ḍiḅi aḍuḅu ma ḅio ò ḍiḅi. Juda na Jeruselemu na mamgba Josaya ḍum. 25Jerimaya sọ kururu ẹkwẹn kọnm Josaya ḅụụ; anị sakị nume-suarị owiapụ na, ereme na mamgba ịna kururu ḅụ Josaya gbolomaye ḍuko ḅo mịmgbaa lam. Kụrọ ḅara-ḅio sime apụ ma nwẹnị tọn tẹ mịna aị ma kẹ mịẹ-mịẹ aị sọma Izirẹlị ḅụ; ḍikii, kururu ẹkwẹn ma ḅio ini arị kẹẹ wararị. 26Mịọkụ Josaya amịẹaị ḅụ kirikọn-aị ma na, ori iḅi akọrịnama na anị wẹrịtẹ KỊNỊNYANAḄỌ ḅe oloko mẹ ḅio kẹẹ wararị ḅara, 27na ori amịẹaị tarịye ḅụ ọkị mu kunomaye la arị Izirẹlị na, Juda na ḅẹ Amadapụ ma ḍiri ḅio kẹẹ wararị.
(C) The Bible Society of Nigeria