Aniroomi ỌYỊSỊZỤ
ỌYỊSỊZỤ
Iwe ọnị Ịpọọrụ chẹrẹ tu hi Aniroomi vị ọnị ọ chẹrẹ ọ̀ yị tenyi ẹtẹ tịtẹ agụvị eto ọnị Ịpọọrụ aa mẹ ka ọnị ee ne heyi ịragụ Ohomorihi ana ya Iroomi. Ô me eto ka ọnị vaa mẹ̀ ụkọrọ ịnị akakana aza Ijeesu nịnị ụmẹ chee ịzọọ; Ịrẹma ọnọọ dị ẹnịnị ẹ̀ẹ mẹ ọgụvọ yị ọnị, dị ọnị ọọ nọ ẹtẹ Isipayi nị Ộ chẹrẹ ịrẹta ọnọnị ọnị ọ sị mẹ ẹhahi ẹdọwụ aza Ijeesu meme yé ọnị. Ọ rẹ kà a ịsị ẹdọwụ ọnọnị sị gẹ ẹngụ ini oze ẹhẹ aza Ijeesu nịnị. Ini iwe ọnọnị Ịpọọrụ kà ịrẹyị tụ hu kere-kere nị. Ịrẹma ọnị ọ raà kụ́ Anịragụ Ohomorihi ana yà Iroomi, dị ọ kà a yị wa ọnị mẹmẹ aa mẹ̀ aduwaa yị wa, Ịpọọrụ ộ kà ịsị ẹ vị ohyẹtẹ ịrẹta anị: Ọnị ọ vị ka zị oze ịnị ka ọza ộ sị ayị tụra Ohomorihi hụrị oyinyima ne tu ẹzẹtẹ Óhomorihi zịị̄ vara ọza ọnịzẹyịza eyi ẹngụ anị nị (1.17).
Ịpọọrụ ộ vana kà ịrẹyị tụụ ịrẹsụ ịrẹyị ọnọnị ka, avaba ọza, wàa vị Aniju, wẹ̀ yị vị Aniju, á nyị ka Ohomorihi ọ̀ maanị vọrọ zị oze nị; agụvị ka avaba aza ịvị vịdị aa mẹ ehunaa yị nị. Zị oze ịnị ka ọza ộ sị ayị tụra Ijeesu Ohinọyị ọnị Ohomorihi nyị ka ọ̀ dọ yị ha ọza zịị̄ rị ịhị ini eyi Ohomorihi nị. Ịpọọrụ ô vene re juwe ẹhẹ ọwọọwa ọnị ọzaā ra ọnịrị Ijeesu ọ̀ọ sị vị ọnya agụvị uze ọnị ọza ọnọọ ọnịrị Ohomorihi kụkụ nyị. Ọza ana vavọọ dọ wụ ọnịrị Ohomorihi ẹ́ yị kụkụ nyị ịrẹyị dị Ụhwẹ Ohomorihi ngwàrà a tịtẹ hụrị ụvọ ụkata ịvị ọnịrị iswọọza. Ịnị ịrẹsụ ẹẹhị na ngụ ịhịnta, Ịpọọrụ ộ kà a ịsị ẹ vị iruvo ọnị Ohomorihi sị mẹ ọda anị ọnịrị ụkata Ụhwẹ Ohomorihi ịnị ẹhẹ aza ana dọ wụ. Dị ozirẹma Ijeesu ọnọnị vaa sị vụrị ọ̀yị sị zụ̀ Aniju nịnị ẹnịrị Anigiriki u mẹmẹ nyị aha ẹnịnị ini eto oni Ohomorihi maanị mẹ yị aza aanị nị. Ịsị ọ sị za ịrẹyị nị ịrẹsụ ọ vị ka, ò yi ọnị Aniju nịnị yi Ijeesu tịtẹ vị eto oni Ohomorihi mẹ ọ̀ yị kụ́ aza ana vọ va vaka aza anị. Ịpọọrụ ộ dọ wụ ka Aniju nịnị ẹ́ yị vaa maanịị yi Ijeesuu tịtẹ pooro. Ịnị ọdịrẹma ịrẹyị anị, Ịpọọrụ ộ chẹrẹ ẹ a mẹ vọrọ ka aza Ijeesu ẹẹ ra ẹhẹ ẹnịnị, hu kere-kere ka ee sì ịrẹyị aza ana vọ. Ộ kà ịrẹyị ụkọrọ ọ̀ yị mẹ yị Ohomorihi, ịsị ẹ vị ụkọrọ aza Ijeesu yị ẹkụra ẹnẹ ẹ yà ọnịrị ịsị a vọrọ ka ẹẹ mẹẹ yị ẹngụ, ọnịrị ịrẹyị ivehu aza. Ịrẹyị ọnị ọnị ụvọta nyị ne beri ịrẹyị oni o si gono Ohomorihi ọ sị za ịrẹta anị ọnọnị ịrẹsụ nị.
Eyi Ịrẹyị
Ọ̀yịha ịrẹyị irenu ọnịrị Ohyẹtẹ ịrẹyị anị 1.1-17
Ịsị a sị nyị ka à dọ ọza ha 1.18—3.20
Oze oni Ohomorihi zịị̄ dọ ọzaa ha 3.21—4.25
Ẹhẹ ọwọọwa ọnị ọzaa ra ọ̀ọ sị Ijeesu nyị 5.1—8.39
Udi ana Anisirẹrị nịnị ini eto Ohomorihi 9.1—11.36
Ebira ana a vọrọ ka aza Ijeesu ẹẹ mẹ 12.1—15.13
Ọ̀yịza ịrẹyị ịrẹsụ ọnịrị ụkụ ọnị Ịpọọrụ kụ́ aza 15.14—16.27
Цяпер абрана:
Aniroomi ỌYỊSỊZỤ: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.