Odeyi 25
25
Ịpọọrụ ka ọnị aa sị ịrẹyị anịị nọ ịda ohinọyị Aniroomi
1Ịhyẹgwẹta oni Ịhwẹsịtọsị vẹ ịnị ẹtẹ ọnọọ, dị ọ hụrẹ Isesariya, dị ọ hịrẹ nọ Ijerusarẹmị nị. 2Dị ohirẹsụ ẹbanyị irehi Ohomorihi ne beri ọdọvịdị Aniju nịnị sị ịrẹyị Ịpọọrụ tụ́ ọọ ịrẹka nị. Dị ẹ dá ịpẹ yị Ịhwẹsịtọsị 3ka ọ̀ mẹ̀ ịsa ọnya yị ẹnị nị. Ẹ ka ọ̀ tụ́ Ịpọọrụ óze.
4Ama dị Ịhwẹsịtọsị ka à navọ Ịpọọrụ tụ́ ịnị ẹngwa tụ́ Isesariya, ka oyi vee kù dị ọnị ọ̀ nọ ịzọọ. 5Dị ọ rẹ ka, “Navọ aza oni u wèe sì nịnị ẹ̀ saasa mị chí na, dị ẹ̀ va sị ịrẹyị ọnọrụ ọnọọ tụ́ ịrẹka, àa nyị ịsa odivi ọnọọ mẹ.”
6Ịhwẹsịtọsị ộ vana mẹ ẹhụụ ẹkụhị ẹẹwụ ịzọọ, di o ve chí nọ Isesariya nị. Eyinẹhẹ ọnị o tù ịzọọ, dị ọ na yaayịtẹ aha ọkarẹyị anị, dị ọ ka à sị Ịpọọrụ vẹ nị. 7Ịjị Ịpọọrụ vẹ, dị Aniju ana hụrẹ Ijerusarẹmị chí vẹ jẹẹ karaa nị. Ẹ ka Ịpọọrụ ộ mẹ̀ ịsa edivi-edivi irenyi-renyi. Ama ẹnịnị ẹ yị zụ sị zụ̀ ka ịzẹyịza ẹ́nị aa kà nị. 8Dị Ịpọọrụ rẹ kụ́ irenu anị, dị ọ ka, “Mẹ yị mẹ̀ ịsa odivi hi ọda Aniju nịnị, mẹyị rẹ mẹ̀ ịsa odivi hi irehi Ohomorihi, àa vị ohinọyị Aniroomi.”
9Ịhwẹsịtọsị ô sì ka ọnị ọ̀ mẹ̀ ịsa ana Aniju nịnị ee sì, dị ọ kà a yị Ịpọọrụ ka, “Ụ waa hịrẹẹ nọ Ijerusarẹmị, dị ma na mẹ̀ ọkarẹyị ịrẹyị ọnọnị ịzọọ?” 10Dị Ịpọọrụ ka, “Ini ikootu ohinọyị Aniroomi mị jẹẹ booro aanị nị, ịzẹnị a vọrọ ka à yà mẹ̀ ọkarẹyị amị nị. Ẹwụ ụvọta ộ yẹ ka ẹ yị nyị ịsa odivi ọnị mị mẹ Aniju nịnị. 11Màa jịnẹ ọda, dị mị mẹ̀ ịsaa vọrọ ka à sị wụ̀ mị nị, mẹ yị kà ka asị aa wụ̀ mị. Ama àa vị ireche kẹnẹ ị́rẹyị ẹnịị vị nị, ẹ yị nyị ọza ana nyẹngụ sị mị chire wa ụvọ. Maa sị ịrẹyị amịị nọ ịda ohinọyị Aniroomi.”
12Ịjị Ịhwẹsịtọsị ọnịrị anikootu anị raà gẹ eyi tụ́ ọọ, dị ọ ka, “A vị ụ ka waa sị ịrẹyị awụụ nọ ịda ohinọyị Aniroomi? Ụ vaa nọ ịda ohinọyị ọnọọ kẹ.”
Agiripa ka ọnị aa wụ́ ịrẹyị Ịpọọrụ
13Ẹkụhị ọnya, ohinọyị ana aā hị́ Agiripa ọnịrị Ịbẹnayịsị ệ vẹ Isesariya ka ẹnị ẹ̀ va kụ́ Ịhwẹsịtọsị. 14Ẹ mẹ̀ yà ịzọọ mẹ ẹkụhị chee, di Ịhwẹsịtọsị kà ịrẹyị Ịpọọrụ zụ̀ ohinọyị ọnọọ nị. Dị ọ ka, “Â nyị ọnọrụ ọnya oni Ịhwẹrịsị navọ tụ́ ịnị ẹngwa. 15M mẹ̀ yà Ijerusarẹmị, dị ohirẹsụ ẹbanyị irehi Ohomorihi ọnịrị azọkụ Aniju nịnị ka ma mẹ̀ ọkarẹyị, dị ma jị ịvị yọ nị. 16Dị mị kà a yị wa ka Aniroomi ọ mā kà a ka à na wụ̀ ọza ana àa za, ẹ̀ yị vị ọnịrị ọza ana zaa maanị ee re ẹngụ eyi gẹrị eyi, dị ẹ̀ kụ́ ịrẹka. Ịjọnọọ di ò re oze kụ́ irenu anị ini oze ịrẹyị ana àa ka ộ mẹ̀. 17Ẹ mẹ̀ vẹ kẹnẹ, me yi du ụmẹ ha. Eyinẹhẹ anị mị wụsẹ na yaayịtẹ aha ọkarẹyị amị, dị mị ka à sị ọọ vẹ nị. 18Aza ana zaa mẹ̀ kwẹẹtẹ, ẹyị va kà a ka ộ mẹ̀ ịrẹyị odivi oni mi ro ka ẹ vaa kà. 19Ịrẹyị ahẹkẹ ẹnịnị ẹ́ yaa kụ́ nị ọnịrị ịrẹyị ọnọrụ ọnya aanị ana aā hị́ Ijeesu ene wusu. Ama Ịpọọrụ ọnị ka ọ yị yàra. 20Mẹ yị yẹ eyi ẹngụ ịrẹyị ẹnẹẹ. Dị mị va họ̀ Ịpọọrụ ka óó sì ka ọnị ọ̀ nọ Ijerusarẹmị, dị à na mẹ̀ ọkarẹyị anị ịzọọ nị. 21Dị Ịpọọrụ ka eyiye, dị ọ ka à sị eyi pe ọnị pooro dị Ọgọsịtọsị ò re oze mẹ̀ ọkarẹyị anị nị. Dị mị ka à sị ọọ tụ́ ịnị ẹngwa pooro di me re oze sị ọọ nọ ịda ohinọyị Aniroomi nị.”
22Dị Agiripa kà a yị Ịhwẹsịtọsị dị ọ ka, “Emi ree sì ka ẹmà rẹ wụ́ ịrẹyị ọnọrụ ọnọọ bẹẹ.” Dị Ịhwẹsịtọsị ka, “Ụ vaa wụ́ ịrẹyị anị ụhwọọ.”
23Eyinẹhẹ anị, dị Agiripa ọnịrị Ịbẹnayịsị vẹ nị. Dị aza anị kụ́ ẹnya hi ẹngụ ẹtẹẹtẹrẹ, dị ẹ ngụ ini ikootu nị. Dị ọga ẹbanyị isoja nịnị ọnịrị ọdọvịdị ẹkụra nịnị ẹnị rẹ vẹ bẹẹ nị. Dị Ịhwẹsịtọsị ka à sị Ịpọọrụ vẹ, dị a sị ọọ vẹ nị. 24Dị Ịhwẹsịtọsị ka, “Agiripa ohinọyị ọnịrị avaba aza ana gụ pe yi ịzẹnị! U wee re ọnọrụ ọnọnị, ana avaba Aniju nịnị ene hi Ijerusarẹmị ọnịrị ịzẹnị aa sị ịrẹyị anịị tụ́ mị ịrẹka. Eyee nowu ka ayị vọrọ ka ọ̀ kụkụ ra ẹ́hẹ. 25Ama me yi re ka â nyị ịsị ọ mẹ anaa vọrọ ka à sị wụ ọọ. Ọnị ụvọta ka ọnị aa sị ịrẹyị anịị nọ ịda Ọgọsịtọsị. Ma raà sị tụ́ ịnị ayị ka maa sị ọọ na. 26Me yi re ịsị a vọrọ ka ma chẹrẹ ini oze anị tụ́ hi ọga amị. Agụvị avọọ mị sị ọọ vẹ ọvịdị awụ nịnị, dị mị hyakụ sị ọọ vẹ ọvịdị ẹwụ, Agiripa ohinọyị nị. Mee sì ka we sì iruvo ịrẹyị anị, di me zụ re ịsị a vọrọ ka ma chẹrẹ. 27Me yi ro ka â nyị ịrẹyọyẹ ịnị anị, màa sị ọza anaa za tụ́ ịnị ẹngwa tụ́ nọ Iroomi, dị mẹ̀ yị chẹrẹ ịsa anaa ka ộ mẹ̀ saasaa nị.”
Цяпер абрана:
Odeyi 25: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.