Odeyi 16
16
Itimoti ộ saasa Ịpọọrụ ọnịrị Isira
1Ịpọọrụ ọ na ngụ Idabe ọnịrị Ịrịsịtịra. Â nyị ọdọwụ ọnya aanị ana ra ịzọọ, ana aā hị́ Itimoti. Ọnyị anị ọnị rẹ vị ọdọwụ, dị ahịka Aniju ọ vị nị. Ama ada anị vị Anigiriki. 2Ọdọwụ nịnị ene hi Ịrịsịtịra ọnịrị Ayịkọnịyọmị vị ana nyayịnẹ aa kà ịrẹyị ọyịza Itimoti. 3Ịpọọrụ ee sì ka ọnị ọ̀ sị Itimoti za, agụvị avọọ dị ọ jị ọọ ụvẹvẹnẹ nị. Ọ vavọọ mẹ, agụvị ka avaba Aniju ene hi ịzọọ ệ yẹ Itimoti ka ada anị vị Anigiriki. 4Ẹ màa na ịnị ẹkụra ẹnẹẹ, dị ẹ kà a yị ọdọwụ ene re hi ịzọọ ka è sị eyi pe ọda ana odeyi nịnị ọnịrị azọkụ ịragụ Ohomorihi mẹ Íjerusarẹmị nị. 5Avọọ ánịragụ Ohomorihi màa nyị ụkata ịnị ẹdọwụ ẹnịnị; dị ẹyaa rụrụụ hu avọọ eyinị-eyinị nị.
Ịpọọrụ ô re Animasedoniya ịnị ẹtẹ oni o re
6Ịpọọrụ nịnị ệ zị oze ẹtẹ Ihwirigiya ọnịrị Ịgaratịya na para hu, agụvị ka Ụhwẹ Ọnịnị ọ yị zẹẹ ka ẹ̀ kà ịrẹyị Ohomorihi ịnị ẹtẹ Esiya. 7E mèe vee tù ẹtẹ Imisiya, di eyee sì ka ẹnị ẹ̀ nọ Ibitiniya nị. Ama Ụhwẹ Ọnịnị ọ yị zẹẹ wa. 8Dị ẹ zị oze Imisiya, di e chí na ngụ Itirowasị nị. 9Ịrahụ ịhị ọnọọ, Ịpọọrụ ô re ẹtẹ. Ô re ka â nyị ọnọrụ Animasedoniya ana jẹẹ dị aa dá ịpẹẹ yị ọnị ka, ọnị ọ̀ vẹ Imasedoniya, dị ọnị ọ̀ va gụ ẹnị ụvọ. 10Ị́pọọrụ mè yi re ẹtẹ ọnọnị kẹnẹ, di i tenyi ẹngụ ka yaa nọ Imasedoniya nị. Ya sị yẹ ka Ohomorihi ọ hị́ yị ka ya na kà enube ọyịza yị anịzọọ nị.
Ịnị ẹkụra Ihwiripi, Iridiya ộ sị ayị tụra Ijeesu
11Yâ ngụ ẹpa hụrẹ Itirowasị, dị ị na taara na ngụ Isamotirake nị. Eyinẹhẹ anị, dị ị nọ Ineyapori nị. 12Dị ị hụụ ịzọọ, dị ị nọ ẹkụra Ihwiripi nị. Ihwiripi ọ vị ẹkụra ịpaapa ịnị ẹtẹ Imasedoniya nị. Aniroomi ọ raa mẹ ịjọvaa tụra a nị. Yâ yà ịnị ẹkụra ọnọọ mẹ ẹkụhị chee. 13Ịjị ẹkụhị ụhwọtụ si tù, dị ị hụụnị ẹkụra ọnọọ nọ ụtọ okuha, ịzị i ro ka â nyị aha ana a yàā mẹ̀ aduwa. Yâ yaayịtẹ ịzọọ, dị yaa kà ịrẹyị yị anyẹnẹẹ ana kụ́ gụ hi ịzọọ nị. 14Â nyị ọnẹẹ ọnya aanị ana wụ́ ịrẹyị ayị. Ịrẹha anị ọ rị Iridiya nị; anẹkụra Itiyatira ọ vị nị. Dị ọọ̄ sẹ ohu ịta ovivi ana katarihi nị. Ọ rẹẹ̄ hẹkẹ Ohomorihi. Ohomorihi ộ mẹ̀ ka ọ̀ dọ ịrẹyị ọnị Ịpọọrụ aa kà, dị ọ rẹ dọ ọ wụ́ nị. 15Â mẹ̀ ọyịhwọzenyi yọ beri aneehi anị. Dị ọ dá ịpẹ ka ya vẹ ini eehi anị, yàa dọ ka ọnị ộ nyị ịzẹyịza hi Ananyị yị. Dị ọ dá ịpẹ yị ẹtẹẹtẹrẹ nị.
 za Ịpọọrụ ọnịrị Isira tụ́ ịnị ẹngwa
16Ẹkụhị ọnya, ị màa naa mẹ̀ aduwa, ozi ahụ ọnẹẹ ọnya aanị ọ va gẹrị ẹyị. Ozi ọnẹẹ ọnọọ ộ nyị ụhwẹ echu ana aa mẹẹ ka ọ̀ọ kà ịsẹ. Ọọ̄ kà ịsẹ, dị aa sị dọ ẹkẹhịị yị ọga anị ẹtẹẹtẹrẹ. 17Dị aa dụ ẹyịrị Ịpọọrụ zị, di ee nowu ka, “Aza ẹnẹnị vị ezi ahụ Ohomorihi ana nẹba hu kere-kere. Ẹ yaa kà a wụ nịnị, ụ mẹmẹ zụ há nịnị.” 18Ẹkụhị ọrụrụ-ọrụrụ ọ maanị sị sị aa yịị kà nị. Ụpẹ ọnya kẹnẹ, ọ sị kụ́ Ịpọọrụ ayị, dị ọ vara eyi, dị ọ kà a yị ụhwẹ echu ọnọọ ka, “Ịnị ịrẹha Ijeesu mâ mẹ ọdaa wụ, ka wa jịnẹ hụụnị ẹngụ anị!” Dị ụhwẹ echu ọnọọ wụsẹ jịnẹ hụụnị ẹngụ anị nị. 19Ịjị ọga ozi ọnẹẹ ọnọọ re ka oze ẹkẹhị ẹnịnị o si gu, dị ẹ wụsẹ va za Ịpọọrụ ọnịrị Isira, di e tura wa nọ ini orere ịdị ọdọvịdị ẹnịnị nị. 20Dị ẹ kụ́ wa nọ ịdị Aniroomi ana vị ọmọkarẹyị ẹnịnị nị. Dị ẹ ka, “Anọrụ ẹnẹnị vị Aniju, dị ẹyaa và ẹkụra ayịị zí ẹtẹẹtẹrẹ nị. 21Ịsị ẹyaa sịị zụ̀ ọza, ọda ọ yị vavọọ dọ. Aniroomi ẹ́yị vị nị, yẹ yị nyẹngụ dọ ẹngụ ịrẹyị ẹnẹẹ, yẹ yị rẹ zụ mẹ wa.” 22Dị ọkọnị aza kwẹẹtẹ tù wa, dị ọmọkarẹyị nịnị za wuru Ịpọọrụ nịnị dị ẹ na a hụrẹ wa ẹngụ nị. Dị ẹ mẹ ọda ka è tụ́ wa ịjapa nị. 23Ịjị a sị wa tụ́ ẹtẹẹtẹrẹ, dị a kụ́ wa và hi ịnị ẹngwa nị. Di e hú ọga anịnẹngwa nịnị ị ụvọ ka ò chire oze hi wa nganganga nị. 24Ịjị a maanị sị ọọ kà a yọ, dị ọ kụ́ Ịpọọrụ nịnị ne hi ịnị aku ọdịrẹma ịnị ẹngwa, dị ọ kụ́ ọchị ẹbanyị-ẹbanyị hi wa ahụ tụ́ ịzọọ nị.
25Ịnị agẹvịrahụ, dị Ịpọọrụ ọnịrị Isira aa mẹ̀ aduwa, dị ẹyaa jị ahẹ ga Ohomorihi nị. Dị anịnẹngwa ana vọ aa wụ́, ẹ màa jị ahẹ nị. 26Kẹnẹ, dị ẹtẹ vene henyi jigi-jigi, dị avaba irehi ẹngwa na ngụ ịzị a kà ẹtẹ hụrẹ henyi jigi-jigi nị. Obooboro dị avaba oze na hi ẹtẹ, dị ịchẹkẹchẹkẹ anịnẹngwa nịnị hụrẹ và hi ẹtẹ pẹrẹ-pẹrẹ nị. 27Dị ọga anịnẹngwa ọnọọ sị ha nị. O mè re ka oze ẹngwa ẹ kụ́ na hi ẹtẹ, di o ro o ka vị́ avaba anịnẹngwa ẹnẹẹ e si zwe nị. Agụvị avọọ, dị ọ tụ̀ ụhwọ ka ọnị ọ̀ wụ ẹngụ anị nị. 28Dị Ịpọọrụ nowu kà a yọ ka, “Asị ụ tụ̀ ẹngụ awụ ụnava, ka avaba ayị hi ịzẹnị!” 29Dị ọga ọnọọ ka à sị ịra vẹ, di o zwe ngụ ini eehi ẹngwa, dị aa dá ẹgahị, dị ọ và ku ẹtẹ ọ́vịdị Ịpọọrụ ọnịrị Isira nị. 30Dị ọ kụ́ wa jịnẹ tụ́ ẹhẹ, dị ọ ka, “Nda, sị a vọrọ ka ma mẹ dị ma zụ há nịnị?” 31Dị ẹ kà a yọ ka, “Sị ayị tụra Ijeesu Ananyị yị, ka ọ vaa dọ wụụ há beri aneehi awụ!” 32Dị ọ kà ịrẹyị Ananyị yịị yọ ọnịrị avaba aneehi anị nị. 33Dị ọ kụ́ Ịpọọrụ nịnị ụmẹ ọnọọ gẹdẹ-gẹdẹ ịnị ịrahụ ọnọọ, dị ọ nyịna ụnava ẹnịnị nị. Dị a wụsẹ mẹ̀ ọyịhwọzenyi yị ọnịrị aneehi anị nị. 34Dị ọ sị Ịpọọrụ ọnịrị Isira nọ ini eehi anị, dị ọ sị ịsọyịrị yị wa nị. Ọnịrị aneehi anị kụkụ aa jẹ, agụvị ka ẹ sị Ohomorihi dọ wụ́.
35Ịjị eyi sị nị, dị ọmọkarẹyị ẹnẹẹ tụ́ iporisi ka ẹ̀ na kà a yị ọga ọnọọ ka ọ̀ hụrẹ aza ẹnẹẹ ụvọ nị. 36Dị ọga anịnẹngwa kà a yị Ịpọọrụ ka, “Ọmọkarẹyị ệ tụ́ vẹ ka à hụrẹ ẹwụrị Isira ụvọ. Agụvị avọọ waa na ịnị ẹngwọọrọ nịnị!” 37Dị Ịpọọrụ kà a yị wa ka, “Ẹ yị nyị ịsị ẹ kà a ka yâ rị ịvị anị. Ama dị ẹ yị za yị, di e tụ́ yi ịjapa ịnị orere nị, ẹyị ana vị Aniroomi. Dị ẹ kụ́ yị và hi ịnị ẹngwa nị. Á yị di eyee sì ka eni è were kụ́ yị jịnẹ!” 38Dị iporisi ẹnẹẹ maanị na kà a yị ọmọkarẹyị ẹnẹẹ nị. Ẹ mẹ̀ wụ́ ka Aniroomi Ị́pọọrụ nịnị vị nị, angwa ô hí wa. 39Dị ẹ va kụ́ Ịpọọrụ nịnị nyarọyịkụ, dị ẹ kụ́ wa hụụnị ẹngwa, dị ẹ dá ịpẹ yị wa ka ẹ̀ hụụnị ẹkụra ọnọọ nị. 40Dị Ịpọọrụ ọnịrị Isira hụụnị ẹngwa, dị ẹ nọ ini eehi Iridiya nị. É re ọdọwụ nịnị ịzọọ, dị ẹ tụ́ wa ọtụtụrụma, dị ẹ hụụ ịzọọ nị.
Цяпер абрана:
Odeyi 16: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.