Odeyi 13
13
Ohomorihi ộ sị ụkọrọ ọwọọwa yị Ịbanabasị ọnịrị Ịpọọrụ
1Ịnị ịragụ Ohomorihi ana yà Antịyọkị â nyị ọnịsẹ ẹnyị ọnịrị ọzwọzịsa nịnị ene hi ịzọọ. Ẹnịnị ẹ vị Ịbanabasị ọnịrị Isimiyọnị ana aā hị́ Ozoji, beri Irusiyọsị ana vị Anisayireni, ne beri Imaneya ana a pá ọnịrị Ịhẹrọdị ohinọyị aha ọnya, ọnịrị Ịsọọrụ. 2Ẹ màa mẹ ụkọrọọ yị Ananyị yị, dị ẹyaa za awẹ, dị Ụhwẹ Ọnịnị kà a yị wa ka, “Sị Ịbanabasị ọnịrị Ịsọọrụ tịtẹ mị nịnị, dị ẹ̀ na mẹ̀ ụkọrọ ọnị mị hị́ wa tụ́ ịnị anị!” 3Dị ẹ za awẹ, dị ẹ mẹ̀ aduwa, dị ẹ sị ụvọ tụra Ịbanabasị ọnịrị Ịsọọrụ, dị ẹ kụ́ wa nyaatụ nị.
Ịbanabasị nịnị ệ nọ Ịsayịpịrụsị
4Aza ẹnị ẹyịva ọnị Ụhwẹ Ọnịnị tụ́ ụtụ aanị, ê chí nọ Iserusiya, dị ẹ na ngụ ẹpa hụụ ịzọọ, dị ẹ nọ Ịsayịpịrụsị nị. 5E mè tù ẹkụra ana aā hị́ Isaramisi, dị ẹ nọ ini irehi Ohomorihi Aniju nịnị, dị ẹ na kà enube ọyịza yị wa nị. Ệ sị Ịjọọnụ za ka ọ̀ọ mẹ ọgụvọọ yị ẹnị ịnị ụkọrọ ọnọọ.
6Ệ ngụ ẹkụra ọnọọ ene enyi kara, dị ẹ na pooro di e ne tù ịzị aā hị́ Ịpahwọsị nị. E ne tù ọnịvọpa ọnya ịzọọ ana aā hị́ Ozi Ijeesu. Aniju ọ́za ọnọọ vị nị; dị ọ vị ọnịsẹ ireche nị. 7Ozi Ijeesu vị ọnya ini ezi ahụ ọnọba ẹkụra ọnọọ ana aā hị́ Ịsagịyọsị Ịpọọrụ. Ộ yẹ ịrẹyị ẹtẹẹtẹrẹ. Ọnọba ọnọọ ộ hị́ Ịbanabasị ọnịrị Ịsọọrụ nọ ịdị anị, agụvị ka ee sì ka ọnị ọ̀ wụ́ ịrẹyị Ohomorihi. 8Ịrẹha ọnịsẹ ireche ọnọọ ọ rị Erimasi ịnị ẹkụra Anigiriki nị; iruvo ịrẹha anị vị ọnịvọpa. Erimasi ọ yị zẹẹ Ịbanabasị ọnịrị Ịsọọrụ; ee sì ka ọnị ọ̀ vara ọnọba ọnọọ ayị ka asị ọ dọ Ohomorihi wụ́. 9Ụhwẹ Ọnịnị ộ dọ avaba ayị Ịsọọrụ ana a rẹẹ̄ hị́ Ịpọọrụ. Dị ọ jị eyi ngụ ọnịsẹ ireche ọnọọ nị. 10Dị ọ ka, “Ẹwụ ozi Echu, ẹwụ ana sị avaba ẹngụ vị ireche-ireche ọnịrị irikichi, uū sì ka we du avaba ịsa ene zoza. Aanị ka aanị ụ mẹ̀ vaa vara ịzẹyịza Ohomorihii tụ́ ini ireche pooro nị? 11Ohomorihi ọ raà sị ụvọ tụra wụ booro aanị, u vee gu eyi, di u we yi kuku re ẹtẹ dị ẹkụhị che ọ̀ mẹ.” Obooboro ọnọọ, dị ịsa chire hi ọọ eyi, dị eyi anị si hozi nị. Di o kuku ee sì ọza anaa sị ụvọọ gẹ ẹ, dị ọ̀ọ zụ̀ ọọ oze nị. 12Ịjị ọnọba ọnọọ re ịsị ẹ mẹ, ộ dọ Ohomorihi wụ́, agụvị ka ịrẹyị Ohomorihi ọnọọ wụ́ ô hí oo irenu.
Ịpọọrụ nịnị ệ nọ Antịyọkị ịnị ẹkụra Ipisidiya
13Ịpọọrụ nịnị ệ hụrẹ Ịpahwọsị, dị ẹ ngụ ẹpa nọ Ipeega ịnị ẹkụra Ipamihwiriya nị. Dị Ịjọọnụ Ịmaakị hụrẹ wa ụvọ ịzọọ, dị ọ sị varẹma nọ Ijerusarẹmị nị. 14Ịpọọrụ nịnị ệ hụrẹ Ipeega nọ Antịyọkị ịnị ẹkụra Ipisidiya. Ẹ́kụhị ụhwọtụ mè si tù, dị ẹ ngụ ini irehi Ohomorihi Aniju nịnị, dị ẹ na yaayịtẹ nị. 15Ịjị a sị iwe ọda Imosiisi ọnịrị iwe ọnịsẹ nịnị kà, dị ọdọvịdị irehi Ohomorihi ọnọọ tụ́ ne tù Ịpọọrụ nịnị, dị ẹ ka, “Ẹnẹbẹnị ayị, ị yaanị sì ka wa kà ịrẹyị yị aza ẹnẹnị nịnị, wàa nyị ịrẹyị ana a vọrọ ka ọ̀ tụ́ wa ọtụtụrụma.” 16Dị Ịpọọrụ kwẹẹtẹ, di o mi wa ụvọ nị, dị ọ ka, “Ẹwụ nịnị Anisirẹrị ọnịrị aza ana vọ ene hí angwa Ohomorihi, sị ụtọ pe ịrẹyị amị nịnị! 17#Kụra 1.7; Kụra 12.51Ohomorihi Anisirẹrị ẹnẹnị ộ nyị ada ayị nịnị, dị ọ vara wa anẹkụra ọbanyị, ẹ mẹ̀ yị vị ọzọga tụ́ ịnị ẹtẹ Anijipiti nịnị nị. Ini oze ụkata Ohomorihi ộ kụ́ wa hụụnị ẹtẹ Ijipiti. 18#Ịrị 14.34; Ọda 1.31Dị ọ sị ẹngụ dọ ịrẹyị ẹnịnị mẹ ẹhụụ ịrayị ẹbẹẹva ịnị ụnọmị nị. 19#Ọda 7.1; Ijos 14.1Ohomorihi ộ wụ anẹkụra ịhịmba kwooze hụụnị ẹtẹ Ikanaani, dị ọ sị ẹtẹ ẹnịnị yị aza anị, 20#Ọdọ 2.16; 1 Ịsa 3.20dị ẹ yà ịzọọ nị. Ohomorihi ộ nyị ọmọkarẹyị yị wa mẹ ịrayị akava tụra ẹvarẹwụ (450) pooro ne tù ụmẹ Ịsamụwẹrị ana vị ọnịsẹ. 21#1 Ịsa 8.5; 1 Ịsa 10.21Ịrẹma ọnọọ, dị Anisirẹrị ka eni ee sì ohinọyị nị. Dị Ohomorihi sị Ịsọọrụ ozi Ikisi ana vị anovwoovu Ịbẹnjamịnị yị wa nị. Ộ mẹ ohinọyị yị wa mẹ ịrayị ẹbẹẹva. 22#1 Ịsa 13.14; 1 Ịsa 16.12; Ahẹ 89.20Ịjị Ohomorihi raà sị Ịsọọrụ kwooze, dị ọ sị Idevidi rị ohinọyị ẹnịnị nị. Ohomorihi ộ dọ ivenu tụ́ ọọ ka ọnị ộ yẹ Idevidi ozi Ijeese ka ộ nyị ebira oni oni sì. Ọ kà ọ vaa mẹ avaba ịsị oni òo sì. 23Ọnya ini ezi Idevidi Óhomorihi sị mẹ ọdọzaha, dị ọ sị ọọ va yị Anisirẹrị, anka ọ mẹ̀ vịdị kà a tịtẹ nị. Ọdọzaha ọnọọ ọ vị Ijeesu nị. 24#Ịmk 1.4; Irk 3.3Dị Ijeesu vavẹ, Ịjọọnụ ộ vịdị raà kà a yị avaba Anisirẹrị ka è ro ịnẹ varẹma, dị ẹ̀ mẹ̀ ọyịhwọzenyi. 25#Ịjọ 1.20; Imt 3.11; Ịmk 1.7; Irk 3.16; Ịjọ 1.27Ị́jọọnụ màa vaa zị ụtụ anịị ta, di o họ̀ use ka ẹnẹ aza ro ka ọnị ộ vị nị. Dị ọ ka ẹ yị vị ọnị vị ọza ana aza ee zí eyi. Ọ kà, Re! Ọza ọnọọ aa vẹ ịrẹma anị, ọnị ọ yị yà ọza ana a vọrọ ka ọ̀ ngwa adava hụụnị ahụ anị. 26Ẹwụ nịnị anda ayị, ẹwụ nịnị ezi Abụrahamị, ọnịrị ẹwụ nịnị aza ana vọ ene hí angwa Ohomorihi, ẹyị a sị ịrẹyị ẹdọha ọnọnị tụ́ hi nị. 27Aza ene hi Ijerusarẹmị beri ọdọvịdị ẹnịnị ẹ yị yẹ ẹngụ ọza oni Ijeesu vị. Ẹnịnị ẹ yị rẹ yẹ ịrẹyị ọnịsẹ nịnị ana aa kà ẹkụhị ụhwọtụ-ẹkụhị ụhwọtụ. Ama ệ mẹ ka ịrẹyị ọnịsẹ nịnị ọ̀ sẹ, ẹ mẹ̀ jị ịvị isu yị Ijeesu. 28#Imt 27.22,23; Ịmk 15.13,14; Irk 23.21-23; Ịjọ 19.15Ẹnịnị ẹ yị hyakụ zụ re ịrẹyị ana a vọrọ ka à sị mẹ̀ ọkarẹyị isu yọ, ama ẹ kị ka Ipayireti ọ̀ wụ ọọ. 29#Imt 27.57-61; Ịmk 15.42-47; Irk 23.50-56; Ịjọ 19.38-42Ịjị ẹ sị avaba ịsa oni Iwe Ohomorihi kà ini oze anị mẹ ta, dị ẹ sị Ijeesu hụụnị ọchị apavahị, dị ẹ sị ọọ tụ́ ịnị ụsị nị. 30Ama dị Ohomorihi ha a kwẹẹtẹ hụụnị isu nị. 31#Ụkọ 1.3Ijeesu ộ sị ẹngụ zụ̀ aza ọnị ọnịrịị̄ zịị hụrẹ Igariri nọ Ijerusarẹmị mẹ ẹkụhị ọrụrụ-ọrụrụ. Aza ẹnẹẹ aa dọ ivenu ịrẹyị anịị yị aza booro aanị. 32#Ahẹ 2.7Dị ẹyị raa kà enube ọyịzaa wụ nịnị, ka oto oni Ohomorihi wo yị ada ayị nịnị, 33ọ raà mẹ̀ ẹ yị ẹyị ezi ẹnịnị, ini oze ka ọ sị Ijeesu ha hụụnị isu. Avọọ a mẹ̀ chẹrẹ ẹ tụ́ ini iwe ahẹ ụga ụpẹ ọhụva nị ka: ‘Ẹwa vị Ozi emi nị. Ajịnị mị ma wụ nị.’ 34#Ayị 55.3Ini oze ka Ohomorihi ộ ha a kwẹẹtẹ hụụnị isu, ka o mē vene kuku sú, Ohomorihi ộ kà a ka: ‘Mị vaa sị ẹyịza yị wụ nịnị. Mâ vịdị raà kà a yị Idevidi ka ẹ yị zụ nyị ka mẹ yị vaa sịị yị wụ nịnị.’ 35#Ahẹ 16.10A rẹ kà a tụ́ aha ọsa ka: ‘Wẹ yị vaa zẹẹ ka Ọza Ọnịnị awụ ọ̀ vụ̀ hi ẹtẹ.’
36“Idevidi ộ mẹ̀ ịsa oni Ohomorihi mẹ̀ eto anịị yọ ta ịnị ụmẹ anị, di o sú, di e ne e anka ohiku anị nịnị, dị ọ vụ̀ nị. 37Ama ọza oni Ohomorihi ha kwẹẹtẹ hụụnị isu, ọ yị vụ̀. 38Agụvị avọọ, ẹwụ nịnị anda ayị, yẹ nịnị ka â kà a wụ nịnị ka ini oze Ijeesu Óhomorihi vaa zịị vagu wu nịnị ịnị ịvị awụ nịnị nị. 39Ọda Imosiisi ọ yị zụ vagu wu, dị ọ̀ rẹ jị ịhị yị wụ nịnị. Ama ini oze anị Óhomorihi zị vagu wu, dị ọ rẹ jị ịhị yị avaba ọza ana àa sị ayị tụra a nị. 40Agụvị avọọ sị eyi pe ẹngụ awụ nịnị, dị asị ịrẹyị ọnị ọnya ịnị ọnịsẹ nịnị kà sẹ tụ́ ịrẹsụ awụ nịnịị. Ộ kà a ka,
41 #
Iha 1.5
“Re nịnị, ẹwụ nịnị onisiya,
Ò hí wu nịnị irenu, di u we vu ẹtẹ nịnị!
Ịsa ọnị mị vaa mẹ ịnị ụmẹ awụ nịnị,
wẹ yị vaa dọ ọ wụ́ nịnị,
àa daka kà a zụ̀ wụ nịnị.”
42Ị́pọọrụ ọnịrị Ịbanabasị màa vaa jịnẹẹ hụụnị irehi Ohomorihi ọnọọ, dị aza ẹnẹẹ dá ịpẹ yị wa ka ẹ̀ rẹ vavẹ ịnị ẹkụhị ụhwọtụ ọsa, dị ẹ̀ rẹ va kà tụ́ ọọ yị ẹnị ini oze ịrẹyị ọnọnị nị. 43Ịjị aza ẹnẹẹ sị gara hi, Aniju ọrụrụ-ọrụrụ ọnịrị Anigiriki, ama dị ẹ sị ahẹkẹ Aniju dọ, ệ saasa Ịpọọrụ ọnịrị Ịbanabasị. Dị Ịpọọrụ ọnịrị Ịbanabasị aa kà ịrẹyịị yị wa ka ẹ̀ dọ ayamva oni Ohomorihi aa sịị yị wa, dị ẹ̀ sị ụvọ za a.
Aniju ệ sị ụya rị Ịpọọrụ nịnị
44Ịnị ẹkụhị ụhwọtụ ọsa, ọ sị vọ chee ahịka avaba anẹkụra ẹnẹẹ ẹ kụ́ gụ ka ẹnị ẹ̀ va wụ́ ịrẹyị Ohomorihi nị. 45Ịjị Aniju nịnị maanị re ọkọnị aza ẹnẹẹ, ẹyaa kụ̀ ụhị dị ẹ ka, ịrẹyị Ịpọọrụ vị ireche, dị ẹya kụ̀ ọọ ụhụ nị. 46Dị Ịpọọrụ ọnịrị Ịbanabasị aa sị ọtụtụrụma kà ịrẹyị huna avọọ nị. Dị ẹ ka, “Â nyị ka à vịdị kà ịrẹyị Ohomorihi yị wụ nịnị da. Ama ụ wẹ̀ yị mẹ̀ dọ ọ nịnị, dị ụ ka wẹ yị vị aza ana aa yàra ị́dị Ohomorihi pooro zịna-zịna nịnị aanị, yaa hụụ ịdị awụ nịnị, dị ya nọ ịdị anẹkụra ẹnẹ ẹ̀ yị vị Aniju. 47#Ayị 42.6; 49.6Ọda oni Ohomorihi mẹ yị yị. Ọ kà:
“Ma sị wụ nyị ka wa vị ẹtohweyi yị anẹkụra ẹnẹ ẹ̀ yị vị Aniju;
dị ụ wa na zụ avaba anẹhẹ oze ana zụ zị dọ wa ha.”
48Ịjị Anigiriki ẹnị maanị wụ́, dị ẹyaa jẹ, dị ẹyaa sị ụgaa yị ịrẹyị Ananyị yị nị. Aza ọnị ọ sị nyị ka ẹ̀ yàra pooro zịna-zịna, ệ sị ayị tụra a. 49Ịrẹyị Ananyị yị ộ gara hi avaba aha ịnị ẹtẹ ọnọọ. 50Dị Aniju nịnị tụ́ ohirẹsụ ẹkụra ọnọọ ịrẹyị nị, ne beri anyẹnẹẹ ẹnẹ ẹ̀ yị vị Aniju, ana aa hẹkẹ Ohomorihi dị ẹ nyị udi ẹtẹẹtẹrẹ tụ́ ịnị ẹkụra. Di e nyima dị ẹyaa sị ụyaa rị Ịpọọrụ ọnịrị Ịbanabasị nị. Dị ẹ dụ wa hụụnị ẹkụra ẹnịnị nị. 51#Imt 10.14; Ịmk 6.11; Irk 9.5; 10.11Dị Ịpọọrụ nịnị bànyị edudu ahụ ẹnịnị hi ịzọọ yị wa, dị ẹyaa nọ ẹkụra ana aā hị́ Ayịkọnịyọmị nị. 52Ezirẹma ene hi Antịyọkị ệ nyị inohine ẹtẹẹtẹrẹ. Dị Ụhwẹ Ọnịnị dọ avaba ayị ẹnịnị nị.
Цяпер абрана:
Odeyi 13: EBTP
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.