2 Itimoti 2
2
A mẹ̀ vọrọ ka ọza ọ̀ọ saasa Ikirisiti
1Ozi emi, waa nyị ụkata ini oze ayamva oni Ijeesuū sịị yị aza ọnị ọnịrịị sị vị ọnya. 2Wâ wụ́ ịrẹyị ọnị mị raà sị zụ̀ aza eyi aza ọrụrụ-ọrụrụ. Ẹ̀wà rẹ sị ịrẹyị ọnọọ, dị u we si chire aza ana á zụ sị ayị tụra ụvọ, dị ẹ́ rẹ yẹ, a mẹ̀ vọrọ ka ẹ̀ sịị zụ̀ aza ẹnẹsa. 3Waa sị ẹngụụ dọ ụyaa beri emi anka isoja ọyịza Ijeesu Ikirisiti! 4Ọza ana aa kụ̀ ịrẹkụ, ọ mā kụkụ nyị eyi yị ụkọrọ ẹngụ anị, agụvị ò zụ zé ọga anị ana dọ ọ eyi. 5Àa ka è ne zwe echi, ọza ọyị zụ dọ ịsa ọdọvịdị, àyị vị o zwe a mẹ̀ ka è ne zwee. 6Ọkụrịkụ ene re osiye ụkọrọ, a vọrọ ka ọ̀ vịdị rị ịnị ịsa ịnị aarẹ anị nị. 7Wee ro ịrẹyị ọnị maa kà aanị! Ananyị yị vaa mẹ ka wa zụ yẹ avaba ịsa ẹnẹnị. 8Tamayị Ijeesu Ikirisiti ana chị hụrẹ ovwoovu Idevidi vẹ! M màa kà enube ọyịza, mị ka Ohomorihi ộ haa hụụnị isu. 9Agụvị enube ọyịza ọnọọ, m maa sịị rị ụya aanị, dị a hyakụ sị ẹba tụ́ mị anka ọza ana na mẹ̀ ịsa odivi avọọ nị. Ama mâ yẹ ka ọza ọyị zụ sị ẹba tụ́ ịrẹyị Ohomorihi. 10Agụvị avọọ, mâ sị ẹngụ dọ avaba ụyọrị agụvị aza oni Ohomorihi sị nyị, dị Ijeesu Ikirisiti ọ̀ rẹ zụ dọ ụyọrị agụvị aza ọnị Ohomorihi sị nyị, dị Ijeesu Ikirisiti ọ̀ rẹ zụ dọ ẹnị há, dị ẹ̀ rẹ nyị ụbanyị ana yà pooro zịna-zịna yị wa. 11Ịrẹyị ọnọnị vị ịzẹyịza ka:
Àa vị ẹyịrị ọọ o dudu sú nị,
ẹyịrị ọọ ọ rẹ vaa yàra nị.
12 #
Imt 10.33; Irk 12.9 Yàa yịị sị ẹngụụ dọ ụya, ẹyịrị ọọ rẹ vaa rị ohinọyị.
Yàa kà ka yẹ yị yẹẹ, ọnị rẹ vaa kà a ka ọnị ọ yị rẹ yẹ ẹyị.
13Ẹyị ẹ̀yị daka nyị ịzẹyịza hi ọọ,
ọnị yị vị ọnịzẹyịza,
agụvị ka ọyị zụ kà a ka ọnị ọyị yẹ ẹngụ anị.
A mẹ̀ vọrọ ka ọza ọ̀ọ mẹ ụkọrọọ yị Ikirisiti
14Waa tama aza awụ ayị ịrẹyị ẹnẹnị! Waa kà wa ọnọ ẹtẹẹtẹrẹ ọ́vịdị Ananyị yị ka asị ẹ rẹ̀ zyaazị tụ́ ịnị ịrẹyị! Ọ yị nyị ọgụ; ama aza ana aa wụ́ ọọ, vị ọnị ọ hyakụ ee du. 15Sị vụrị di u we re ka waa mẹ̀ ebira ene zé Ohomorihi eyi! Asị ụ vị ọnụkọrọ ọnị ụhị vaa nyịị tụ́ ịnị ụkọrọ anị! Waa sị ịrẹyị ịzẹyịzaa zụ̀ aza, anka ọ mẹ̀ vọrọ! 16Sị ụvọ hụụnị ịrẹka kẹnẹ-kẹnẹ ana ahịka ẹ yị nyị ịsị ẹ kụ́ ọnịrị Ohomorihi gẹ. Vị ọọ̄ mẹ ka aza ẹ̀ẹ mẹ ịsa oni Ohomorihi ọ yị sìi hu avọọ nị. 17Ịsị ẹyaa sịị zụ̀ aza vị ana sị mẹẹ anka ikenebe anaā rị ẹngụ ọza avọọ. Ihimenawusi ọnịrị Ihwiretusi yà ịnị ẹngụ aza ẹnẹẹ. 18Ẹ sị há hụụnị oze ịzẹyịza. Ẹ ka aza ẹ sị ha hụụnị isu da. Ini oze avọọ, ẹ raà mẹ ka asị aza ẹnyị kụkụ vị ọdọwụ. 19#Ịrị 16.5Ama yáa yẹ ka ịsị Ohomorihi reè si hi ẹtẹ ẹtẹẹtẹrẹ, ọza o yi kuku zụ zizi ọọ. Â maanị chẹrẹ ẹ tụ́ ọọ ka, “Ananyị yị ộ yẹ aza ana vị aza anị.” A rẹ chẹrẹ ẹ ka, “Ọza ana àa ka ọza Ananyị yị ọ́nị vị nị, ọ̀ sị ụvọ hụụnị ebira odivi.” 20Ini irehi ọbanyị, ẹnya irenyi-irenyi e hi ịnị anị nị. Ẹnyị vị ana a sị igooru mẹ, dị a rẹ sị enyusẹ ẹnyị kẹnẹ mẹ ẹnyị nị. Ẹnyị vị ana a sịị̄ mẹ̀ ịsa obooro, dị a rẹẹ̄ sị ẹnyịị kụ́ ẹnyịị kụ́ ẹchịchị nị. 21Ọza ana àa sị ẹngụ anị hụụnị avaba ịsa edivi ẹnẹnị, vị ana vaa yà anka ẹnya ana a sịị̄ mẹ̀ ịsa obooro, agụvị ka ọ raà sị ẹngụ anị tụ́ irenyi yị Ọga anị; ọ rụra Ọga anị mẹ̀ ụkọrọ. Óo tenyi ẹngụ ka Ọga anị ọ̀ọ sị ọnịị mẹ̀ ụkọrọ ozoza-ozoza. 22Asị ụ nyị ụvọ tụ́ ịnị ịsa edivi ọnị ọpa ezweyiī sì, ama wa dụ ka waa mẹ̀ ịsa ana vọrọ, dụ wa sị ayị tụra Ananyị yị, di u we ree sì ịrẹyị ọza, dị ẹwụrị aza ana aa sị ayị ọnịnịị hị́ Ananyị yị ò dudu ra ịnị ẹngwọọrọ! 23Asị ụ rẹ nyị ụvọ tụ́ ịnị ahankata ụra, agụvị ka wâ yẹ ka ịrazị ẹẹ̄ kụ́ụ vẹ nị. 24Ayị vọrọ ka ozi ahụ Ananyị yị ọ̀ọ zyaazị. Ama áa vọrọ ka ọ̀ọ mẹ̀ ebira hẹẹ hi avaba aza, dị ọ̀ rẹ zụ zụ̀ aza ịsa, dị ọ̀ rẹ zụụ sị ẹngụụ jị ọọ yị ọza. 25Ọ̀ọ sị ayohunẹnẹẹ pe aza ana aa kụ̀ụ hịrẹẹ juwe, ịsavọọ Ohomorihi ọ̀ na mẹ ka è re oze ro ịnẹ varẹma, dị ẹ̀ va yẹ ịzẹyịza. 26Ịjọnọọ dị eyi ẹnịnị si hweyi, dị ẹ sị tụ̀ hụụnị ịrẹpa Echu ana sị wa za ka ẹ̀ẹ mẹ̀ ịsa oni oni sì.
Цяпер абрана:
2 Itimoti 2: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.