2 Anịkọrịntị 5
5
Ịdị Ohomorihi ọ vị eehi ayị nị
1Yâ yẹ ka èe wú irehi ọnị ị yà ịnị anị ịnị ẹhẹ ọnọnị aanị, (ọnị ọ vị ka ọchẹngụ ayị ọnọnị) Ohomorihi ộ nyị irehi tụ́ ẹbẹẹba yị. Ọnị ụvọta ọ mẹ irehi ọnọọ nị. O yi vee du pooro zịna-zịna. 2Booro aanị, yaa rụmayị ẹtẹẹrẹ, yee sì ka à sị irehi ayị ẹbẹẹba ku yi ẹngụ anka ịta avọọ. 3Àa vavọọ reè si ku yi ẹngụ, yẹ yị kụkụ vaa yà ịnị ahwaahụ. 4Ị mẹ̀ yị yà ịnị ọchẹngụ ayị ọnọnị booro aanị, yee ti agụvị ka ẹnya ẹngụ anaā zị yị ọ sị ngụ yị. A yị vị ka vi yee sì ka à sị ọchẹngụ ayị ẹhẹ ọnọnị kwooze nị, ama yee sì ka à sị ẹ́ẹbẹẹba ku yi ẹngụ, agụvị dị à sị ọchẹngụ ene èe mē sú dọ ịrẹsụ ọchẹngụ ayị eneē sú anịị yị. 5Ohomorihi ô tenyi yi zi ụmẹ ana a maanị vaa sị vara yị. Ộ sị Ụhwẹ Ohomorihii yị ana sị zụ̀ ka ẹ yị zụ nyị ka ọ yị vaa sị avaba ịsa ọnị ọ ka ọnị vaa sịị yịị yị. 6Agụvị avọọ, yá nyị ayọnẹtẹ ịnị avaba ụmẹ. Yâ yẹ ka ị mẹ̀ yà ịnị ẹhẹ ọnọnị aanị, yẹ yị yà ịdị Ananyị yị ana vị eehi ayị. 7Ẹhẹ ayị vị ana jẹẹ tụ́ ịrẹsụ ịsa oni yee zí eyi, ẹ yị vị ịrẹyị ịsa oni yee re ọ vị. 8Mị ka yâ nyị ayọnẹtẹ, ị hyakụ ee sì ka ya sị ọchẹngụ ayị ọnọnị tịtẹ, dị ya nọ ịdị Ananyị yị ana vị eehi ayị. 9Ịsa ene hu keekere ọ vị ka, yee sì ka yaa mẹ̀ ịsa ene zé Ananyị yị eyi, yàa yà ẹhẹ ọnọnị, yàa yà ẹbẹẹba; 10#Iro 14.10agụvị ka ẹ yị zụ nyị ka avaba ayị ọ yị vaa nọ ọvịdị Ikirisiti, dị ọ̀ mẹ̀ ọkarẹyị yị. Ọzọza vaa dọ ọgụ ịsa ọnị ọ mẹ, ọ mẹ̀ yà ịnị ẹhẹ ọnọnị; ọ̀ọ vị ọyịza, ọ̀ọ vị odivi.
Ikirisiti ọ mẹ ka ya vara ọta Ohomorihi nị
11Ya sị yẹ, a mẹmẹẹ̄ nyị angwahi Ananyị yị. Agụvị avọọ ị yaa da ịpẹẹ yị aza ka ẹ̀ va saasa a nị. Ohomorihi ộ yẹ yị ẹtẹẹtẹrẹ. Mee ro ka ẹwụ nịnị ọ rẹ yẹ yị ini ivehu awụ nịnị. 12Ẹ yị vị yee sì ka ya rẹẹ kà a wụ nịnị ẹngụ aza ọnị ị vị. Ama yee sì ka ya sị zụ̀ wụ nịnị iruvo ana vọrọ ka wa sị sịị yị mẹ eyi nịnị. Ịjọnọọ ọza ana àa sị eyirẹsụ ọza kẹnẹẹ mẹ eyi, dị ẹ̀ yị zama ayị anị nị, ụ vaa yẹ, a mẹ̀ vọrọ ka we tụ́ wa ohi nịnị. 13Yàa daka ee che uvu, yee che e yi Ohomorihi. Yàa va yẹ ịrẹyị, yâ yẹ ẹ agụvị awụ nịnị. 14Ịrẹyị ayị oni ọza oni Ohomorihi nyị mẹ̀ ohinọyị ka ọ̀ dọ yị há sì, aa sị oze zụ̀ yị nị. Ya sị yẹ ka ọza ịnya o sú yị avaba aza nị, ọnị ọ vị ka avaba ẹnị e ree wusu. 15Ô sú yị avaba aza agụvị aza ana yára asị ahịka ịsị e zé wa eyi kẹnẹ, ẹyaa mẹ nị. Ama â vọrọ ka ẹ̀ẹ mẹ ịsị e zé ọza ene sú yị wa eyi, dị Ohomorihi rẹ ha a hụụnị isu. 16Ye yi kuku re ọzọnyị-ọzọnyị, anka ánẹhẹ mee re wa. Yàa daka vịdị sị eyi anẹhẹ re Ikirisiti, yẹ yị kụkụ vavọọ mẹ. 17Ọza ọnịrị Ikirisiti ọ̀ọ sị vị ọnya, ọza ọnọọ ọ sị vara ọza ọwọọwa. Ịsa ọkụkụ ọ sị para hu, ọwọọwa ọ kụkụ vẹ nị. 18Avaba ịsa ẹnẹnị vị ana hụụ ịdị Ohomorihi vẹ. Ini oze Ikirisiti ọ raà sị yị hụụnị ọnịvị anị va vara ọta anị. Dị ọ sị ụkọrọ chire yi ụvọ nị, ọnị ọ vị ka ẹ̀ yà rẹẹ mẹ ka aza ẹ̀ vara ọta anị. 19Ini oze Ikirisiti, Ohomorihi ọ raà vara anẹhẹ ọta anị. Ohomorihi ọ yị kụkụ za ịvị ẹnịnị tụ́ wa ọrọkọ. Ô si enube chire yi ụvọ ka yaa kà a ka ọnị ọ raà vara aza ọta anị. 20Ẹya vị odeyi Ikirisiti tụ́ ịzẹnị nị. Vị ọ sị mẹẹ ka Ohomorihi ụvọta aa zị oze ịnị ụvọ ayịị dá ịpẹẹ wụ nịnị aanị nị: “Yâ sị Ikirisiti dá ịpẹẹ wụ nịnị ka wa navọ Ohomorihi ọ̀ vara wụ nịnị ọta anị.” 21Ikirisiti ọ yị mẹ ịvị vụrụ-vụrụ. Ama Ohomorihi ọ́ hụ agụvị ayị vara ọnị ụvọta ịvị, agụvị ẹyịrị ọọ ọ̀ zụ vị ọnya, dị ya zụ nyị tụ́ ịnị ịzẹyịza Ohomorihi.
Цяпер абрана:
2 Anịkọrịntị 5: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.