2 Anịkọrịntị 3
3
Oto ọwọọwa oni Ohomorihi wo yị anẹhẹ
1Vị ịrẹyị ọnọnị wáá vị ka vị ị kụkụ aa gụ ẹngụ aanị nị? Áá nyị ka aza ẹ̀ẹ chẹrẹ iwee túu hi wu nịnị ka wa zụ yẹ yị nịnị, anka aza ẹnyị mẹ̀ẹ̄ mẹ nị? Áá nyị ka ẹwụ nịnị ẹ̀ rẹ chẹrẹ ẹngụ iwe ọnọọ yị? 2Ẹwụ nịnị gẹdẹ-gẹdẹ ọ kụkụ jẹẹ yị ẹngụ iwe ẹnẹẹ nị. Ịnị ayị ayị a chẹrẹ ẹ tụ́ nị, ka avaba aza ẹ̀ẹ kà a, dị ẹ̀ rẹ yẹẹ. 3#Kụra 24.12; Ijer 31.33; Ezk 11.19; 36.26Ọzọza ộ yẹ ka, vị ụ sị mẹẹ nịnị anka iwe ọnị Ọza oni Ohomorihi nyị mẹ ohinọyị ka ọ̀ dọ yị ha chẹrẹ, dị ahịka ẹyị o pe e chẹrẹ ẹ nị. Ẹ yị vị ịsa a sị inyiiki chẹrẹ ọ vị. Ẹ yị rẹ vị ịnị ọparị a chẹrẹ ẹ tụ́. Ama Ụhwẹ Ohomorihi ana yára a sị chẹrẹ ẹ tụ́ ịnị ayị ọza nị. 4Ị vavọọ aa kà, agụvị ka ini oze Ijeesu oni Ohomorihi nyị ka mẹ ohinọyị ka ọ̀ dọ yị há, yâ sị ayị tụra Ohomorihi. 5Yẹ yị vavọọ yà ana aa kà a ka ya zụ mẹ̀ ụkọrọ ọnọnị. Ama Ohomorihi aa sị ụkataa yị nị. 6#Ijer 31.31Ịzẹyịza, Ọnị ọ mẹ ka ya zụụ kà a oto ọwọọwa oni Ohomorihi zẹẹ aza nị. Ịzẹzẹ ọnọọ ọ yị vị ịrẹyị ọda ana a chẹrẹ, ama ịrẹyị Ụhwẹ Ohomorihii yọ nị. Ọda ana a chẹrẹ avọọ vị anaā wụ̀ ọza. Ama Ụhwẹ Ohomorihi vị anaā mẹ ka ọza ọ̀ yàra. 7#Kụra 34.29Ọda anaā wụ̀ ọza vị ana a chẹrẹ tụ́ ịnị ịrẹta. Igirima Ohomorihi ộ sị ẹngụ zụ̀, a mẹ̀ sị yị Imosiisi. Eyirẹsụ Imosiisi ộ zẹtẹ, ana ahịka Anisirẹrị ẹ yị nyayịnẹ re eyirẹsụ anị, dị ọ tangwa vee mi nị. 8Ịjị Ụhwẹ Ohomorihi àaa mẹ̀ ụkọrọ, aanị ka igirima anị é yi vee huna avọọ ẹtẹẹtẹrẹ? 9Oto ọkụkụ ana a sị jị ịvị yị aza, ọ̀ọ vavọọ nyị igirima, dị ụ wa yẹ nịnị ka oto ọwọọwa ana a sị jị ịhị yị aza vị ana nyayịnẹ nyị igirima hu avọọ ẹtẹẹtẹrẹ. 10Ya zụ kà a ka igirima oni vee re booro aanị, ộ sị zụ ka ẹ yị nyị ịsị igirima ịyẹẹyẹ vị vụrụ-vụrụ. 11Àa vị ka oto ịyẹẹyẹ ana ahịka ụmẹ chee ọ vị ộ maanị nyị igirima, oto ọwọọwa ana jẹẹ pooro ọ nyị igirima hu nị. 12Agụvị ka yaa maanị nyị ọyịtureyi ọnọnị, ọnị ọ mẹ̀ ka ya vavọọ nyị ayị dị yaa kà ịrẹyị nị. 13#Kụra 34.33Ẹyị ẹ yị yà anka Imosiisi ana sị ịta kú eyi ka asị Anisirẹrị nịnị ve re, ígirima eyirẹsụ anị mèe mi. 14Ayị ẹnịnị vị ẹnẹ rẹ sị ịta kú. Vi ve tụ́ ajịnị, ẹ̀ẹ yaa kà iwe oto ịyẹẹyẹ, vị ịsa ọnọọ ki kú wa ayị nị. Ịhị ọza ọnịrị Ijeesu oni Ohomorihi nyị mẹ ohinọyị ka ọ̀ dọ yị há, ọ̀ọ sị vị ọnya, ịhị ọnọọ a vaa hụ̀ ịsa ọnọọ hụrẹ ẹ ayị nị. 15Vi ve tu ajịnị, ẹ̀ẹ yaa kà ọda Imosiisi, ịsa vị ene ki ku wa ayị. 16#Kụra 34.34Ama ẹ̀ẹ và ka Ananyị yị na, dị ọ hụ̀ ịsa hụrẹ wa ayị. 17Ananyị yị ọnọọ ọ vị Ụhwẹ Ohomorihi nị. Ịzị Ụhwẹ Ohomorihi ọ̀ọ yà, vị ọzọzaā nyị ẹngụ anị ịzọọ nị. 18Ẹyị ana a raà hụ ịsa hụụnị eyi anị, yee re igirima Ananyị yị. I mee re e, dị aa vara yị ka yee véné e hu avọọ nị. Ananyị yị ana vị ụhwẹ Ohomorihi aa mẹ̀ ụkọrọ ọnọọ nị.
Цяпер абрана:
2 Anịkọrịntị 3: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.