1 Itimoti 6
6
Ịrẹyị ezi ahụ nịnị
1Avaba aza ana àa vị ozi ahụ, ẹ̀ za ọga ẹnịnị ịrịka tụ́ ịnị ọza ana nyị ụbanyị ini oze tụra oze, agụvị asị a nyị ọza ene re oze kà ịrẹyị odivi hi Ohomorihi ọnịrị ịsa ọnị yaa sịị zụ̀ aza! 2Ezi ahụ ana àa nyị ọga ana vị ọdọwụ, asị ẹ sị eyi oweyi ree, agụvị ka ọ́ọ mẹhị vị ẹnẹbẹnị ẹnịnị. Vị a vọrọ ka ẹ̀ hyakụụ mẹ ụkọrọọ yị waa hu avọọ nị, agụvị ka aza ana aa rị ọgụ ụkọrọ ẹnịnị vị ọdọwụ ene e sì ịrẹyị anị.
Ịrẹyị ireche ọnịrị ụbanyị obooro
Waa sị ịsa ẹnẹnịị zụ̀ aza, di u we sii pe waa juwe! 3Ọza ana àa sị ịrẹyị ọsa zụ̀ aza, dị ọ̀yị saasa ịrẹyị obooro ana vị ịrẹyị Ijeesu Ikirisiti Ananyị yị, dị ọ̀yị rẹ saasa ebira ene zé Ohomorihi eyi ọnị yaa sịị zụ̀ aza nị, 4ẹngụ ọza ọnọọ vị ana aa sị ẹngụụ tụ́ ẹba, ayị rẹ nyị ịsị ọ yẹ. Ve ee sì ka ọnị ọ̀ọ nyị ahankata, dị ọnị ọ̀ọ zyaazịị tụ́ ịnị ịrẹyị pooro kẹnẹ nị. Ẹngụ aza ẹnẹẹ vị anaā mẹ ka aza ẹ̀ẹ kụ̀ ụhị, dị ẹyaa zyaazị, dị ẹ rẹ yaa kụ̀ ẹngụ ụhụ, dị ẹ rẹ yaa jị mọọ tụra ẹngụ, 5dị ẹyaa nyị ahankata pooro kẹnẹ. Ẹngụ aza ẹnẹẹ, eyi kuku zụ ro ịrẹyị ana vọrọ, ẹyị zụ kà ịzẹyịza. Ẹngụ aza ẹnẹẹ ee ro ka ahẹkẹ Ikirisiti vị oze ọnị ọza zụ hụra zị rị ọgụ. 6Ịzẹyịza yọ, ahẹkẹ ọ zụ sị ọza rị ọgụ, ọ̀ọ zẹẹ ka ịsị ọnị ọ̀ọ nyị, ọ̀ hụ ọnị. 7Ẹ yị nyị ịsị ị za vẹ ẹhẹ ọnọnị. Ya rẹ yẹ ka yàaa na, ẹ yị nyị ịsị ị zụ sị na. 8Agụvị avọọ, yàa sị ịta ọnịrị ịsọyịrị nyị, áa vọrọ ka ọnọọ ọ̀ hụ yị. 9Ama aza ana aa dụ ụbanyị vaa hụrẹ ngụ ịnị ẹzamare. Ịsa ene eyee sì, vị ịsa ụra ana zụ mẹ wa ọnya; ịrẹpa ịsa ẹnẹẹ ọ sị wa za. Ẹngụ ịsa ẹnẹẹ vị eneē vú ọza saka-saka, dị áanị ta nị. 10Ọza ọ̀ọ raà sị ayị tụ́ ịnị ẹkẹhị baaba, ọnị ọọ̄ vị iruvo avaba ịsa odivi nị. Aza ẹnyị ẹ́ẹ vavọọ sì ọọ na pooro, ana ahịka ọyị kụkụ vana zẹẹ ka ẹ̀ kụkụ sị ayị tụra Ohomorihi; ẹ raà sị ụya tụ̀ ẹngụ ẹnịnị ụnava.
Ịpọọrụ óo pe Itimoti juwe
11Ama ẹwụ ana vị ọza Ohomorihi, asị ụ sị ụvọ tụ́ ịnị ịsa ẹnẹẹ! Sị vụrị we re ka waa mẹ̀ ebira ana vọrọ, dị o re zé Ohomorihi eyi! Wa yịị sị ayịị tụra Ohomorihi! Wee sì ịrẹyị ọza, dụ wa nyị isuuru, dụ wa rẹ nyị ebira hẹẹ! 12Re ka waa vụ̀ ịrẹvụ ẹdọwụ! Re re ka ụvọ awụ óo kú ka wa yàra ị́da Ohomorihi pooro zịna-zịna! Agụvị avọọ Óhomorihi hị́ wụ nị. Wáa sị irenu dọ ka wáa sị ayị tụra Ijeesu éyi aza ọrụrụ-ọrụrụ. 13#Ịjọ 18.37Ọ́vịdị Ohomorihi anaā sịị Ụhwẹẹ yị avaba ịsa, ọnịrị Ijeesu Ikirisiti ana jẹẹ ọvịdị Ịpọntụsị Ipayireti, dị ọ sị sị ọtụtụrụma kà ịrẹyị, m mee hú wu ụvọ aanị nị. 14Ọda ọnị mị mẹ wụ aanị, sị eyi pee, oo! Asị u du ọọ pẹrẹ, asị ụ zẹẹ ka wa nyị ohuvọ pooro dị Ijeesu Ikirisiti Ananyị yị ọ̀ vavẹ! 15Ịjị ụmẹ anị òo si tù, Ohomorihi vaa sị ọọ zụ̀. Ohomorihi ọ nyị avaba ụbanyị, dị ọ rẹ nyị avaba ụkata nị. Ọnị ọ vị Ohinọyị avaba ohinọyị nịnị nị; ọnị ọ rẹ vị Ọga avaba ọga nịnị nị. 16Ọnị ịnyara chọchọchọ o reè yi mē sú nị. Ini ẹtohweyi ọnị ọ yà, ẹ yị nyị ọza ana zụ kà pee. Ẹ yị nyị ọza ene ree da, ayị rẹ nyị ọza ene zụ ree. Ọnị ọ nyị ụbanyị ọnịrị ụkata pooro zịna-zịna nị. Aamị. 17Aza ana vị ọzọbanyị ịnị ẹhẹ ọnọnị, hú wa ụvọ ka asị ẹ na mẹ eyi! Kàa ka asị ẹ na sị eyi tụra ụbanyị ana ahịka ọ mā za jẹẹ! Ama kà a ka ẹ̀ sị ayị tụra Ohomorihi anaā mẹ ẹyịza! Ọnị ọọ̄ sị avaba ịsaa yị ka ya sịị mẹ inohine. 18Kàa ka ẹ̀ẹ mẹ ọyịza, dị ẹ̀ẹ mẹ ọza ẹyịza, asị ẹ ngụ ayịsa! Ọnọọ ọ vaa mẹ ka ẹ̀ vị ọzọbanyị obooro nị. 19Ẹ̀ẹ vavọọ aa mẹ, dị ẹyaa kụ́ ịsaa tẹẹ yị ẹngụ ẹnịnị ana ahịka ọ vaa vị ịsa ẹtẹẹtẹrẹ yị wa ụhwọọ, agụvị dị ụvọ ẹnịnị ò zụ kú ẹhẹ obooro. 20Itimoti, re ka ịsị e si chire wu ụvọ, wáa sị eyi pee! Hụụnị ịrẹka ana ahịka ẹ yị nyị ịsị ẹ kụ́ ọnịrị Ohomorihi gẹ, ọnịrị ahankata ụra ana aza ẹnyị ee nyeeyii hị́ “ịrẹyọyẹ”. 21Aza ẹnyị aa kà ịrẹyị “ịrẹyọyẹ” ọnọọ zị, ama e si nyeeyi, ẹyị kụkụ sị ayị tụra Ohomorihi. Ohomorihi ọ̀ mẹ ọyịza yị wụ nịnị!
Цяпер абрана:
1 Itimoti 6: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.