1 Anịtẹsaronika ỌYỊSỊZỤ
ỌYỊSỊZỤ
Ịtẹsaronika vị ẹkụra ọbanyị ọnya ịnị Imasedoniya, Aniroomi nịnị a mẹ ịjọvaa tụra wa ịrẹsụ nị. Ịpọọrụ mẹ̀ hụrẹ ịzị aā hị́ Ihwiripi ọ na sị ịragụ Ohomorihi hi ẹtẹ ịzọọ nị. Ộ da ku chee, dị Aniju nịnị kụ̀ ụhị ka enube ọyịza ọnị Ịpọọrụ aa kà a yị Anigiriki nịnị aa kà a tụ ọvịdị nị. Ẹnịnị ệ kwẹẹtẹ tu Ịpọọrụ agụvị ka Anigiriki ẹnẹẹ vị ana vịdị aa saasa ahẹkẹ Aniju nịnị. Ọsọnị ộ mẹ̀ ka Ịpọọrụ ọ̀ hụrẹ Ịtẹsaronika dị ọ̀ nọ ịzị aā hị́ Iberiya nị. Ộ kù chee, Ịpọọrụ mẹ̀ na sị ngụ Ịkorịntị, Itimoti, ọnị ọnịrịị dudu aa mẹ̀ ụkọrọ ộ tụ́ hi ọ ịnị ịsa anaa na ịnị ịragụ Ohomorihi ana yà Ịtẹsaronika.
Iwe ịpaapa ọnị Ịpọọrụ chẹrẹ tụ hi Anịtẹsaronika aanị vị ọnị ọ chẹrẹ ọ̀yị tụ evere Ikirisiti nịnị ene hi ịzọọ ọtụtụrụma, dị ọ̀ rẹ sị sị wa ayị nẹtẹ. Ộ kụ Ohomorihi avọ yị enube ọnị ọ wụ́ ịnị ịpa ẹ̀ mẹmẹ sị ayị tụra Ijeesu ọnịrị è meme sì ịrẹyị ọza. Ịpọọrụ ộ tama wa ayị ẹngụ ẹhẹ ọnị ọnị ra ọnị mẹ̀ yà ịdị ẹnịnị. Dị o re tụ́ ohi ịrẹyị ene e họ̀ use ịnị ịpa Ikirisiti mẹmẹ vaa vàa vẹ nị. Ẹ ka, ọdọwụ ene e su di Ikirisiti ọ̀ vavẹ wáá vaa nyịị tụ́ ịnị ẹhẹ ọyịyara pooro zịna-zịna ọnị Ikirisiti vaa sịị vẹ ịhị ọ̀ọ vavẹ? Ịpọọrụ ộ rẹ sị ụmẹ ọnọnị kà a yị wa ka ẹ̀ tangwa naa mẹ̀ ụkọrọ ẹnịnị e mee zi ka ịhị Ikirisiti aa vàa vẹ.
Eyi Ịrẹyị
Ọyịsịzụ 1.1
Avọ ọ̀yịkụ ọnịrị ụga 1.2—3.13
Ịpọọrụ ô hu aza ụvọ ịnị ẹngụ ebira ana avọrọ ka Evere Ikirisiti ẹẹ mẹ 4.1-12
Ịrẹyị ọnị Ịpọọrụ ka ịnị ịpa ọyịvavẹ Ikirisiti 4.13—5.11
Ịrẹyị ọdịrẹma ọnị ọ sị tụ wa ọtụtụrụma 5.12-22
Ịrẹyị ọdịrẹma 5.23-28
Цяпер абрана:
1 Anịtẹsaronika ỌYỊSỊZỤ: EBTP
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Ebira First Bible © Bible Society of Nigeria, 2014.