Mjir Rom 15
15
Ka Gə Namtə Ɗəffa Mji
1Mburu na ka duna akwa hamta jiri, kalkal ka mburu hara kəmar ka mji na ka hamta jirər ɗa raka. Tsuwa mburu aɗiya hara su na ata ndzi msəra ala mburu wa. 2Amma ka waskəi hara su na ata ndzi msəra aka ntəwulərni, su na ata kəlantə ni akwa hamta jirərni. 3Kamnyar Kristi aɗi hara su na kəskərari wa. Apatə kakaɗər Hyel pəla, “Nggəl tə mji akwa harari ala gə ni ku ngka ata kəri.” 4Kamnyar kəlara su tə mdə ku rəbuta akwa kakaɗayeri waci, mdə rəbutə kamnyar thlipə ala mbur su, kamnyar ka mburu nggitə su ka dunautədzi, apatə mburu akwa sək sakatə Hyel ata sə nghyaɓəla alkawalayeri tə tsa hara ala mburu ni. 5Antə ka Hyel na ana hamta dunar nggitər su ka dunar ntsantə mda, hara ka giri ndzi akwa nggaɓəladzi kəga nvwa giri, akwa laku na ata kəɓa ka hala mjir nu Yesu Kristi. 6Kamnyar atar apani antə giri ata mzhi paktədzi ata kəma duku, ka hu Hyel na Təddar Mthlakər mburu Yesu Kristi, ka mnya giri duku.
Labar Na Msəra Kamnyar Durayeri Damwa
7Ka giri dlu nvwa giri kamnyar səliyir Hyel, tsu apatə Kristi ku dlu giri. 8Kamnyar I akwa pəla ala giri abbər Kristi ndzi buɗa aka mjir Yahudi ni, kamnyar ka tsa ncanta abbər jiri Hyel ata nghyaɓəla alkawalayeri tə tsa hara aka kəkayeri arɗa. 9Tsuwa tsa si ni kamnyar ka durayeri damwa mzhi haptə səliyir Hyel kamnyar kətadzərni ala ɗa. Apatə ku rəbutədzi akwa kakaɗər Hyel abbər,
“Kamnyar ngəni I ata hu nga
akwa nca mji na aɗi mjir Yahudi wa,
I ata hara hayeri ar hu thləma ga.”
10Tsuwa mdə ku jaktə pəla abbər,
“Hara giri kucali, giri na aɗi mjir Yahudi wa
ata kəma duku kəga mjir Hyel.”
11Ka jaktə pəla abbər,
“Hu giri Mthlaku,
shanga giri na aɗi mjir Yahudi wa.
Hu giri ni,
shanga giri na akwa duniya.”
12Tsuwa Ishaya ku pəla akwa vəi laga abbər,
“Mdə laga ata sə thlata akwa nyarmbwar Yesse,
ka hara kuthlikur ata kəra mji
na aɗi mjir Yahudi wa,
Antə mji na aɗi mjir Yahudi wa
ata sə vəkər ka tsa.”
13Antə ka Hyel na ana hara ka mdə mzhi vəkər ka su, nghyantə giri ku kucali ka msərakur, apatə giri ku hamta jiri alari. Kamnyar ka dunar Mambəl na Ɓɗakkarkara nghyantə giri ka hamta jiri.
Bulus Ku Kəthlər Aka Durayeri Damwa
14Maɗama'na, I ka kəri ku mbərsa abbər giri ka kəra giri an nghyinghyari ka ɓɗakkur, ka shanga sənda, har giri akwa mzhi thlipə aka nvwa giri. 15Amma I ku rəbuta ka ngkərɓəla ala giri ata bəbal ata kəra suayeri ngəni, kamnyar I ku sənda abbər su tə giri ata turari an ka mdə ɗangtə ala giri. Tsuwa I hara apani ni kamnyar laku tə Hyel kətadzə ra, 16ka namtə ra mdər kəthlər ar Kristi Yesu ala giri na aɗi mjir Yahudi wa. I akwa hara kəthlər apa prist, akwa ngkər labar na msəra ar Hyel, kamnyar ka giri na aɗi mjir Yahudi wa ni mzhi ndzi apa saɗaka tə Hyel ata dluwari, saɗaka na kəcəkəcari atar Mambəl na Ɓɗakkarkara.
17Kamnyar ngəni I akwa gaya ata kəra shanga su tə Kristi Yesu ku hara atar na, akwa kəthlərərna aka Hyel. 18I amzhi ɓwadzər gaya ata kəra su damwa wa, tar ata kəra su tə Kristi ku hara atar na. Tsa hara kəi mzhi səntə mji na aɗi mjir Yahudi wa aka Hyel, atar ndər tə I akwa ngkərari ala ɗa ka atar kəthlər tə I akwa harari akwa nca ɗa. 19I akwa ngkər ala ɗa laku tə Kristi hara seɗayeri kəga surndatayeri atar dunar Mambələr Hyel. I baɗitə akwa Urushalima har ka mwanta ahar Illirikum, shang akwa ngkər labar na msəra ar Kristi aka shanga mji.
20Mwaɓərna tədəku an kəi ngkər labar na msəra ni, aɗi akwa vəi tə mdə ku kurtə ngkər ala ɗa su ata kəra Kristi wa, kamnyar ta I asə həna ata kəra səla mbwa tə mdə laga zum an nci. 21Apatə ku rəbutədzi akwa kakaɗər Hyel abbər,
“Mji tə mda aɗi ɗar gari ala ɗa ata kərari wa,
an ata sə wutə ni,
Tsuwa mji na aɗi ɗar nggatə su ata kərari wa,
an ata sə nggaɓəla ni.”
22An su na hara tə tədək sakatə I ɗəmha abbər I ata mwari adzə giri, su laga ana ngkatə ra ni. #Rom 1:3
Bulus Ku Ɗəmhədzər Mwari Ahar Rom
23Amma kulini tə I ku kuri kəthlərərna akwa bwayeri ngəni, tsuwa tə I ku kəɗar bara kəi ra wuli giri akwa məvayeri hang na təramta ni, 24I tamata abbər I ata mzhi thləthlata kəi wuli giri. Kamnyar I akwa bara mwari ahar Spen, antə I ata nu atar giri ka mburu thlawardzi. Tsuwa aghəla tə I ku nggatə msərakur mwardzi kəga giri ar saka laga raka, I mbərsa giri ata pwarɓəla ra ka su na ata dlar ra akwa lənggurna ni. 25Amma kulini I akwa mwari ahar Urushalima kamnyar mwantə dlara aka mjir Hyel na anda. #1 Kor 16:1-4 26Kamnyar mjir nu na ahar Makidoniya ka Akaya ku hamta dlarər ɗa ka kucali kamnyar mji na ka tur su akwa nca mjir Hyel na ahar Urushalima. 27Da ku nggatə msərakur hara ngəni, wala tə jiri da akwa nggari apa ku ndzi dwali ala ɗa apa təmbəl ka da dlar ɗa ni. Kamnyar ma mji na aɗi mjir Yahudi wa ata wutə barkayeri ar labar na msəra na abwar mambəl akəla mjir Yahudi na akwa Urushalima, ata hara ɓɗaku ka da dlar mjir Yahudi ka kwaba kamnyar turər ɗa na abwa dza tsuwa. #1 Kor 9:11 28Antə ma sakatə I ku kuri kəthlər ngəni, ka hamta ala ɗa kwaba tə mdə tsaptə ni, I ata tamtə lakur mwari adzə giri, ata lakur mwari ahar Spen ni. 29Tsuwa I ku sənda abbər ma sakatə I akwa mwari adzə giri ni, I ata mwari ka barka ar Kristi na nghyinghyari.
30Kulini I akwa kiɗa akəla giri, maɗaməma, akwa thləma Mthlakər mburu Yesu Kristi, ka tsuwa kamnyar hirkur ar Mambəl na Ɓɗakkarkara, abbər ka giri dlar ra akwa hara adduwa aka Hyel ata kəra kəthlər tə I akwa kəɗarari ni. 31Hara giri adduwa kəi mzhi msərəmta mji na kula hamta jiri akwa Yahudiya ni, ka tsuwa ka mjir Hyel na akwa Urushalima ni mzhi dlu kəthlər tə I ɗəmha kamnyar ɗa ni. 32Antə apani, ma Hyel hira I ata si adzə giri ka kucali, kəi ghərəmtaghəra adzə giri.
33Ka Hyelər msərakur ndzi adzə shanga giri. Amin.
Цяпер абрана:
Mjir Rom 15: KNB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.