Mjir Rom 10
10
1Maɗaməma, su tə ɗəffi hir ka su tə I ana kiɗa akəla Hyel an kamnyar ka da na mjirna, abbər ka da sə mbantədzi. 2I ata mzhi hara seɗa ata kəra ɗa ala giri abbər da ana bara Hyel dzau, amma lakur bara Hyel arɗa ni aɗi ndzi abwar səndər jirkur wa. 3Da aɗi səndə laku tə Hyel ana namtə mji ka da ndzi kula biku akəmari nə wa, antə atar bara lakur kəra ɗa atar ɓəla tsawu ni, da ku nggəlar kələngkər aka lakur Hyel na ata namtə ɗa kula biku ni. 4Kamnyar Kristi an tsikəra tsawa, antə kəlara mdə na ku hamta jiri alari, tsa ata ndzi kula biku akəma Hyel.
Mbantədzi An Kamnyar Shanga Mji
5Kamnyar Musa ku rəbutə su ata kəra bara ndzi kula biku akəma Hyel atar ɓəla tsawu ni. Tsa rəbuta abbər, “Kəlara mdə na ata ɓəlatə tsawayeri ngəni ni, tsa ata ndzi ka mpika atar ni.” 6Amma ndzi kula biku akəma Hyel atar hamta jiri akwa pəla, “Ga aɗiya pəla akwa ɗəffa ga abbər, ‘Wan ata ləmtazi kamnyar ka tsa səghəi ka Kristi?’ ” 7Wala tsuwa, “Wan ata ləghəi akwa duniyar mji mtəmta ka tsa səɓəla ka Yesu ri?” 8Su tə tsa akwa pəlari an apani,
“Ndər ni kudzəhə ka ga,
tsa akwa mnya ga,
ka akwa ɗəffa gə tsuwa.”
Tsuwa ndər ngəni an ndərər hamta jiri natə yeru akwa ngkərari. 9Kamnyar ma ga ku hara pəla ka mnya gə sur nga abbər Yesu an Mthlaku ni, ka hamta jiri akwa ɗəffa ga abbər Hyel ku thlentə ni akwa mtəmta, tsa ata mbantə nga. 10Kamnyar atar hamta jiri akwa ɗəffa ga, antə ga ata ndzi kula biku akəma Hyel, tsuwa atar pəlari ka mnya gə sur nga antə ga ata wutə mbantədzi. 11Kamnyar kakaɗər Hyel ku pəla,
“Kəlara mdə na ku hamta jiri alari
tsa aɗi ata ləkwa səli wa.”
12Kamnyar zumzumkur aɗi akwa daɓwa mjir Yahudi ka mjir Helleni wa. Kamnyar Mthlaku duku an Mthlakər shanga mji, tsuwa tsa andər hamta su ka tsiyari bwang aka shanga mji na ku kiɗa akəlari. 13Kamnyar, “Kəlara mdə na ku kiɗa akwa thləma Mthlaku, tsa ata wutə mbantədzi.”
14Amma apa madi tə mji ata mzhi kiɗə su akəla mdə tə da aɗi hamta jiri alari wa ri? Tsuwa apa madi tə da ata mzhi hamta jiri aka mdə tə da aɗi ɗar nggatə su ata kərari wa ri? Tsuwa apa madi tə da ata mzhi nggatari kula mdə laga an ngkər ala ɗa ri? 15Tsuwa apa madi tə mji ata mzhi ngkər ndərər Hyel ma mda aɗi thlentə ɗa wa ri? Apatə mdə ku rəbuta akwa kakaɗər Hyel abbər, “Kəmar ɓɗakkur səla mjir səntə labar na msəra aɗi wa!” 16Amma aɗi shanga mji an dlu labar na msəra nə wa. Kamnyar Ishaya pəla abbər, “Mthlaku, wan ku hamta jiri aka ndərər yeru ri?” 17Apani hamta jiri ana thlata ata kəra su tə mdə ku nggata, tsuwa su tə mdə nggata ana thlata atar ngkər labar ata kəra Kristi.
18Amma I akwa yu su, “Jiri ya abbər da aɗi nggatə wa ni? Ai da ku nggati. Kamnyar kakaɗər Hyel akwa pəla,
“Ndər ni ku dlarhə shanga duniya,
gari ni ku mzhitə shanga datər duniya.”
19I akwa jaktə yu su. Mjir Israila ni aɗi ana nggaɓəla su ng? Kamnyar wala akwa sakar Musa Hyel ku pəla,
“I ata hara ka giri səlkər mji na aɗi suma wa,
ka ɗəffa giri ɓza ata kəra mji na kəgaɓu.”
20Tsuwa aghəla nda Ishaya ku gari kula thlivəra, abbər Hyel pəla,
“I ku ncantə kərna aka mji
na aɗi ghər pakə ra wa.
I ku ncantə kərna aka mji
na aɗi ghər yu su ata kəri wa.”
21Amma ata kəra Israila, Hyel akwa pəla,
“I ana zhar nyarmbwarna ka tsa ɓukci bwang,
kamnyar mjirna na nggyarɗu ka kəra ɗa ɓəɓal ni.”
Цяпер абрана:
Mjir Rom 10: KNB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.