Kəth Apos 21
21
Bulus Ku Təra Mwari Ahar Urushalima
1Sakatə yeru ku ndəkəmtadzi kəga da, antə yeru ləkwa shar ka təra mwari ahar Kos, səɓəla ɗəpari antə yeru mzhitə Rodes, anda tsuwa yeru ku ləkəma ka sə mzhitə Patara. 2Sakatə yeru wutə sharər yimi akwa mwari ahar Finikiya, antə yeru ləkwa ka təra. 3Sakatə yeru baɗitə wutə kəra Saiprus, ka təramta kazhar ni abwa matsəkar, antə yeru mwari ahar Siriya, ka ra ləɓəla ahar Taya, kamnyar anda antə shar ni ata fəi kələrni. 4Sakatə yeru ku paktə vəi tə mjir nu ni ata, antə yeru ndzəndzi adzə ɗa har vir murfa. Antə mjir nu na anda ni hara naɓikur atar Mambəl na Ɓɗakkarkara abbər Bulus aɗiya mwari ahar Urushalima wa. 5Sakatə sakar ndzəndziyir yeru na anda ni ku kuri, antə yeru zhar vəi ni, ka ləkəma ka lənggur yeru. Antə shanga ɗa ata kəma duku kəga mwankir ɗa kəga maɗankyarər ɗa pwar yeru har ka mwantə yeru aɓəla ata hildi. Antə yeru zuzuri ata wuyakər mnya yimi ni, ka hara adduwa, 6antə yeru salamtədzi kəga da abbər sai vir damwa giri. Sai sakatə yeru ku ləkwa shar antə da ngka ka ləha.
7Aghəla thlatər yeru ahar Taya ni, antə yeru thləthlata ahar Tolemayis, ka thlawar mjir nuwa na anda, ka ndzi adzə ɗa mnyar vir pal. 8Səɓəla ɗəpari antə yeru təra ka mwari ahar Kaisariya, ka ləvəyar Filibus na mdər ngkər ndərər Hyel. Tsa pal akwa nca mji na murfə tə mdə carɓəla abbər ka da dlara akwa ndəkə susəma ahar Urushalima nda. Antə yeru ndzəndzi aharngkiɗa. #Kəth Apos 6:5; 8:5 9Tsa ka maɗankwi nfwar na aɗi kəl sal wa na ana hara naɓikur. 10Sakatə yeru akwa ɗarndzi anda mnyar virayeri laga, antə naɓi laga ka thləmari Agabus thlata ahar Yahudiya ka si. #Kəth Apos 11:28 11Sakatə tsa si adzə yeru, antə fatə sur mbwadzi ar Bulus, ka mbwahə səlari ka tsiyari ka sur mbwadzi ni, ka pəla, “Ngəni an su tə Mambəl na Ɓɗakkarkara pəla abbər, ‘Apani antə mjir Yahudi na ahar Urushalima ni ata ata mbwamta mdə na mthlakər sur mbwadzi ngəni ni, ka hamta ni aka mji na aɗi mjir Yahudi wa.’ ”
12Sakatə yeru nggatə ndər ngəni, antə yeru kəga mambila mji na anda, kiɗə Bulus abbər tsa aɗiya mwari ahar Urushalima ni wa. 13Amma Bulus shinau ka pəla, “Man su tə giri akwa harari nə ri, tə giri akwa tuwa ka ɓzamtə ɗəffi ni? Kamnyar I an ɗəmhəɗəmhari, aɗi kamnyar ka mdə hambwa ra akwa pərsəna daci wa, amma har ka mdə tsi ra ahar Urushalima, kamnyar thləma Mthlaku Yesu.”
14Sakatə yeru wuta abbər yeru aɗi ata mzhi ngkəi kərari wa, antə yeru ndzi ɗiɗi, ka pəla, “To, ka Hyel hara kuthlikurərni.”
15Aghəla virayeri ngəni antə yeru ɗəmhədzi ka təra mwari ahar. 16Antə mjir nuwa laga na thlata ahar Kaisariya tsuwa ku nu yeru, ka mwantə yeru aviyar Mnason, mdə tə yeru ata pəra aviyar ngkiɗa. Tsa mdər Saiprus, pal akwa nca mjir nuwa na ntangkəma.
Bulus Ku Ra Wuli Mjir Nuwa Na Ahar Urushalima
17Sakatə yeru ku si ahar Urushalima, antə mjir nuwa na anda dlu yeru ka kucali. 18Səɓəla ɗəpari antə Bulus nu yeru akwa mwari ahar Yakub, tsuwa shanga mji na ol'olər ikələziya ni anda. 19Antə aghəla tə Bulus ku thlawar ɗa, antə tsa ngkərɓəla ala ɗa shanga su tə Hyel hara akwa nca durayeri damwa atar ni. 20Sakatə da nggatə gari ni, antə da hu Hyel. Antə pal akwa nca ɗa pəla aka Bulus abbər,
“Ga aɗi wutə wa, mdər yeru, laku tə mjir Yahudi dəpu dəpu akwa hamta jiri ni, nggədza shanga ɗa akwa vu duna ɗa akwa ɓəla tsawur Musa. 21Amma mjir Yahudi na azi ahar Urushalima nggata nggwa abbər ga akwa thlipa aka hanga mjir Yahudi na akwa nca durayeri damwa ka da zhar ɓəla tsawur Musa. Abbər ka da zhar thla kaciya aka maɗa' ɗa, ka zhar nu surharar mjir Yahudi. 22Antə man su tə mburu ata harari? Kamnyar kula nuhum da ata nggata abbər ga ku si akwa di ni. 23Apani ata ndzi dwali ka gə nu su yeru ata pəla ala ga. Nggədza yeru ka mji nfwar azi na ku hara alkawal. 24Antə ka gə nu mji ngəni ka gə kəcimta kər nga ata kəma duku kəga da, ka gə ntəmta ala ɗa kwabar pər ni, kamnyar ka da mzhi shimta kəra ɗa. Apani antə shanga mji ata sənda abbər jirkur aɗi akwa suayeri tə mji pəla ata kəra gə nə wa, kamnyar tə gə ka kəra ga akwa ɓəla tsawur Musa. 25Amma ar durayeri damwa na ku hamta jiri ni, yeru ku thlenta ala ɗa wasika na akwa pəla ala ɗa su tə yeru thlamta, abbər da aɗiya səm su tə mdə ku hamta aka haptayeri wa, wala ɓɗə kumər mwaɓi natə mdə ku ndwaləmta wulyari wa, tsuwa ka da ndəkəmta kərɗa ka karwakur.” #Kəth Apos 15:29
26Səɓəla ɗəpari antə Bulus fatə mji nayeri ni ka ra kəcimta kərni ata kəma duku kəga da. Antə tsa ləkwa mbwar vəngkər səli kamnyar pəla ala ɗa sakatə virayeri ar kəcimtadzi ni ata kura, vir tə mda ata hamta saɗaka kamnyar kəlara mda akwa nca ɗa.
Mji Ku Ngkəi Bulus Akwa Mbwar Hyel
27Sakatə vir murfə ni abaka kura, təng mjir Yahudi laga na thlata akwa tsəɗi Asiya, wutə Bulus akwa mbwar vəngkər səli ni, antə da thlentə hangkala shanga mji, tə da ngkəi ni. 28Da akwa hara kuraku abbər, “Mjir yeru Israila, dlar gir yeru! Nggədza mdə na akwa dlarhə shanga bwa akwa nggəl mjir Israila, ka tsawur Musa, ka mbwar vəngkər səli ngəni ni. Ata kəra ngəni, tsa jaktə səntə mjir Helleni akwa mbwar vəngkər səli ni, ka diɓərantə vəi na ɓɗakkarkara ni!” 29Kamnyar da ku kurtə wutə Bulus ata kəma duku kəga Trofimus na mdər Afisa ni akwa kuta di, antə da kəta abbər Bulus səntə ni akwa mbwar vəngkər səli ni. #Kəth Apos 20:4
30Antə hangkala shanga mjir kuta di ni thlata, tə mji putə hwi ata kəma duku ka ngkəi Bulus, ka ndəkərɓəla ni akwa mbwar vəngkər səli ni, antə mdə hartə shanga nyarmbwayeri ni təkəma. 31Sakatə da akwa bara ka da tsi ni, antə olər sojayeri nggata abbər shanga Urushalima ku yinggərtədzi. 32Təkəma antə olər sojayeri ni fatə sojayeri kəga sojayeri na ol'ola adzə ni, ka hwi mwari adzə ɗa. Sakatə mji ni wutə olər soja ni ka sojayeri, antə da zhar dlaɓu Bulus. 33Antə olər soja ni mwari ka ngkəi Bulus, ka tsawa abbər ka mdə mbwahə Bulus ka canayeri suɗa. Antə tsa yuwa abbər, “Ngəni wa shang ri, tsuwa man su tə tsa hara ri?” 34Amma təng mji laga akwa nca ɗa akwa hara kuraku akwa pəla su laga, mji laga tsuwa akwa pəla su damwa. Sakatə tsa wuta abbər tsa aɗi ata mzhi nggaɓəla jirkur su na aɗi wa kamnyar kuraku tə da akwa harari ni, antə tsa tsawa aka mjirni abbər ka da mwantə Bulus akwa barki ar soja. 35Sakatə tsa mzhitə vəi ndlətə ka ləmbwa ni, tar tə sojayeri ni kətə ni ta mji asə dəkəi ni, kamnyar ɗəffa mji ku vərvər thlata. 36Kamnyar shanga mji na akwa nu ni akwa hara kuraku abbər, “Mwa gir ka mburu tsi ni!”
Bulus Ku Gari Aka Dlamar Mji
37Sakatə sojayeri ni abaka ləkwa barki ni ka Bulus, antə Bulus pəla aka olər sojayeri ni abbər, “Ga hir kəi pəla ala gə su ya?”
Antə olər soja ni pəla, “Azha ga ana nggatə mnyar mjir Helleni ya? 38Ga aɗi mdər Masar əng? Azha aɗi ga an ti bwari akwa kuta di saka nda, har ka fatə mjir tsi mji dəpu nfwar, ka mwantə ɗa akwa mtaku nəng?”
39Antə Bulus pəla, “Ai arna I mdər Yahudi, mdə yaɓəla ra ahar Tarsus akwa tsəɗi Kilikiya. I an kamba ar bərni ngəni ka thləmari tuwatuwari ni. Antə I akwa kiɗə nga usa abbər ka gə zhar ra kəi gari aka mji ni.”
40Antə olər soja ni na alari laku. Antə Bulus thləthlatə tsu ata vəi ləmta ni ka haptə tsiyari aka mji abbər ka da ndzi ɗiɗi. Sakatə da ku ndzi ɗiɗi antə Bulus gari ala ɗa akwa mnya Aramiya, ka pəla,
Цяпер абрана:
Kəth Apos 21: KNB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.