Yorhaq 16
16
1“Nawmaf sanqtif maqya tifni, garkawv heudeuq ngar, nawmaf-anr aernaeq-eu ma. 2Aqcawq, nawmaf-anr zanrdawq khawqnymr-anr nae taedov naeqlaf taef-a. Khoeruqtaf, nawmaf-anr saef-eu aqsur ghaq maqkaq, aqyawf, Miqyaer-euq gar mr-eu ma laer noeq-eu aryamq keuvle luf-eu mae. 3Aqyawfmaf, Aqda-anr maq siqnya-aer, ngaq-anr khawf maq siqnya-euq mirnae, nawmaf-anr khoerlof-aer janrlar taef-a. 4Garkawv heu ngar, nawmaf-anr aernaeq-euq ma. Aryamq tsaqlar ngae, ngaq nae nawmaf-anr aernaeq-euq deuq nawmaf noeqdovlar taef-a. Yawbae ngae, ngar, nawmaf-anr maq aernaeq-euq khoer-aq, ngar, nawmaf naeq-aer jawrluf-eu mirnae ma.”
Yawshawr Saflar Mr-eu Gardeuq
5“Nymq-mr ngar, ngaq-anr khaerghae lef-euq ghaq jawr-eu gar ghofler ma. Aerkhawf, ‘Nawr aqgeugar ir-eu le?’ laer nawmaf tiqghaq-iq ngaq-anr maq narhaq lar-a. 6Aerkhawf, garkawv heudeuq ngar, nawmaf-anr aernaeq-euq mirnae, nawmaf-euq nuima-euq lafkhoer noeqshaq-eu jeq byan-eu mae. 7Ngar, nawmaf-anr dawrcoeni aernaeq nyar. Ngar ghofler-eu-aq, nawmaf-euq gharduq yawmuiq mae. Aqjeq mirnae aernar-aq, ngar maq ghofler nar-aq, Cawba-eu ghaq, nawmaf jawr-eu gar maqoe-a. Aerkhawf, ngar ghawq-ir-euq nar-aq, aqyawf-anr nawmaf jawr-eu gar khaerghaelef ma. 8Aqyawf oekeuv ngae, iqbax-euq garkawv, tsaq-awr dawr-eu garkawv hawr-eu yarkhaq dar-eu garkawv, aqyawf, mirtsaqzaq-anr yawlaeq toeqmaeqnaeq taef-a. 9Iqbax-aq, aqyawfmaf, ngaq-anr maqjan-eu mirnae mae. 10Tsaq-awr dawr-eu-aq, ngar, ngaqDa jawr-eu gar ghofler-awr, nawmaf, ngaq-anr maqpar ya’mawr-eu mirnae mae. 11Yarkhaq dar-eu-aq, mirtsaq heu-anr uvlanr-eu ghaq-aq, yarkhaq bi dartsaev ghaq-euq mirnae mae.
12“Ngar, nawmaf-anr aernaeq paq-aer ghae-eu ghawqmya jeq jav-eu le siq. Aerkhawf, nymq-mr nawmaf maq ghovtaq jircoer-a. 13Aerkhawf, yawtsaq yawdawr-euq Saflar oekeuv ngae, nawmaf yawtsaq yawdawr dawqtawv luf-anr siqnya larni aqyawf sheuqmaeq naeqlaf taef-a. Aqjeq mirnae aernar-aq, aqyawf-aq, aqyawf-euq aryaq zmq-awr maqngaeq-a. Aerkhawf, aqyawf nae kharya gaq-euq jeq aqyawf ngaeq-awr, aqkar pyeuflar-eu garkawv deuq khawf, aqyawf, nawmaf-anr aernaeqlaf taef-a. 14Aqyawf, ngar yawshaef khanqsaer za’ni mr taef-a. Aqjeq mirnae aernar-aq, aqyawf, ngaq-anr taf-eu deuq yur-awr nawmaf-anr dzawrnaeqlaf taef-a. 15Aqda kharjav-eu dawqtawvluf ngaq-euq ma. Khoermirnae, aqyawf, ngaq-anr taf-eu deuq yur-awr nawmaf-anr dzawrnaeqlaf taef-a laer ngar, nawmaf-anr aernaeq-eu ma.”
Noeqshaq-eu Jeq, Laqkhaq Caer-eu Jeq Pyeuflar Taef-a
16“Tiqkhaeq ghae nar-aq, ngar, Aqda jawr-eu gar ghofler-eu mirnae, nawmaf, ngaq-anr maqpar ya’mawr-ar. Aerkhawf, tiqkhaeq parghae nar-aq, nawmaf, ngaq-anr ya’mawr taef-a.”
17Khoerngae, zaqlanr tiqpavnav deuq, aqyawf maf-euq yawkaq ja-eu, “ ‘Tiqkhaeq ghae nar-aq, ngar, Aqda jawr-eu gar ghofler-eu mirnae, nawmaf, ngaq-anr maqpar ya’mawr-ar. Aerkhawf, tiqkhaeq parghae nar-aq, nawmaf, ngaq-anr ya’mawr taef-a’ laer aqyawf, aqdui-anr aernaeq laf-eu khoer, aqjeq-anr aermawf-eu nga?”
18Khoermirnae, aqyawfmaf aer-eu, “Aqyawf aer-eu khoer, aqjeq aermawf-eu la laer aqdui-anr maq ghovlar nya. ‘Tiqkhaeq ghae nar-aq’ laer aer-eu dawq aqjeq-anr aermawf-eu nga?”
19Khoerngae, aqyawfmaf, aqyawf-anr narhaq mawf-eu nga laer Yeqsur siqnya-awr heulof-aer aernaeq-euq mae, “ ‘Tiqkhaeq ghae nar-aq, nawmaf, ngaq-anr maqpar ya’mawr-ar. Tiqkhaeq parghae nar-aq, nawmaf, ngaq-anr ya’mawr taef-a’ laer ngar aer-eu mirnae, nawmaf tiqghaq tirghaq narhaq luf-eu le lor? 20Ngar, nawmaf-anr aqdirma-aer aernaeq nyar, nawmaf yawkhav-aer ngoer-awr, tsawrngoer ya’ngoer taef-a. Aerkhawf, mirtsaqzaq laqkhaqcaer taef-a. Nawmaf ya noeqshaq-eu khawf, nawmaf noeqshaq-eu khoer laqkhaq caer-eu jeq pyeuflar taef-a. 21Zaqmiq aqbur tiq ghaq, zaq baw-eu laer ghae ngae, aryamq tsaqlar-euq mirnae, aqyawf noeqshaq-eu mae. Aerkhawf, aqyawf, zaq khoerghaq bawghaq-euq naeq-aer, shaqzanq naf-euq jeq ngaerjir-euq mae. Aqjeq mirnae aernar-aq, mirtsaq-euq khoertav tsawrhaq tiq ghaq daefle-euq mirnae laqkhaq caer-eu mae. 22Khoerlof-aer durni, nymq-mr nawmaf noeqshaq luf-eu ngar-a. Aerkhawf, ngar, nawmaf-anr parya mawr ngae, nawmaf-euq nuima laqkhaq caerlar taef-a. Nawmaf laqkhaq caer-eu gar, laqkhaq maqbi caerni tiqghaq-iq maq yurgeuf nya-ar.
23“Khoerngae nan keuvlar nar-aq, nawmaf, ngaq-anr tiqjeq-iq maqpar shar-ar. Ngar, nawmaf-anr aqdirma-aer aernaeq nyar, ngaq-euq tsawrmyanr-anr ghoe-awr, nawmaf, Aqda-anr kharshar-eu jeq aqyawf, nawmaf-anr bifnaeqlaf taef-a. 24Nymq-mr keuvni, nawmaf, ngaq-euq tsawrmyanr-anr ghoe-awr tiqjeq-iq maqshar-aq siq. Nawmaf laqkhaq caer-eu jeq byanlarni shar-awq, shar nar-aq za taef-a.”
Mirtsaq-euq Khoertav Shaqzanq Ya’mawr Taef-a
25“Ngar garkawv heudeuq nawmaf-anr yawjeq majeq dawq-anr nae aernaeq-euq ma. Aerkhawf, ghawqmyanr maqghae-aer, Aqda-euq garkawv, yawjeq majeq dawq-anr nae maqngeur-eu, nawmaf-anr byacaevni ja’naeq-eu aryamq keuvle luf-eu mae. 26Khoerngae nan, nawmaf, ngaq-euq tsawrmyanr-anr ghoe-awr shar taef-a. Ngar, nawmaf-euq gharduq Aqda-anr shar ma laer ngar, nawmaf-anr aer-eu maqngeur. 27Ngar, Aqda jawr-eu gar nae oe-euq mae laer nawmaf jan-awr, ngaq-anr gaq-eu mirnae, Aqda, aqyawfghaq khawf nawmaf-anr gaq-eu mae. 28Ngar, Aqda jawr-eu gar nae oe-awr, mirtsaq-anr oeka-euq ma. Ngar, mirtsaq-anr nae dov-ir-awr, Aqda jawr-eu gar par ghofler ma.”
29Khoerngae, aqyawf-euq zaqlanr deuq, aqyawf-anr heulof-aer aer-eu mae, “Hawsher-eq, nymq-mr nawr yawjeq majeq dawq maqzmq-aer byacaevni maeqnaeqlaf luf-eu ngar-a. 30Tiqghaq-iq nawq-anr tiqjeq-iq narhaq-eu laer maqya ghaeni, nawr yawqjeq navluf-anr siqnya nga laer nymq-mr nga’maf siqduq-euq ma. Khoermirnae, nawr, Miqyaer jawr-eu gar nae oe-euq ngar-a laer nga’maf jan ma.”
31Yeqsur, aqyawf maf-anr heulof-aer aerkhof naeq-euq mae, “Nymq-mr pov-aq, nawmaf jan ma lor? 32Nawmaf caevbyav jir-awr, yawqha-euq jawrduq-anr caevghof jir-awr, ngaq-anr taef-aer byaerdzae yaf-eu aryamq keuvle luf-eu mae. Nymq-mr nae keuvle-euq mae. Aerkhawf, ngar-aq, ngar tiq ghaq taef-aer jawr-eu maqngeur, Aqda, ngaq naeq-aer jawrluf-eu mae.
33Nawmaf, ngaq-euq lafkhoer nuisar of-eu jeq za’ni, ngar, nawmaf-anr garkawv heudeuq aernaeq-eu ma. Mirtsaq-euq khoertav jawr ngae, nawmaf shaq-awr zanq-eu jeq-anr yadaq taef-a. Aerkhawf, nawmaf nuima zif-awr laqkhaq caer-awq, ngar, mirtsaq-anr ghaqler-euq ma.”
Цяпер абрана:
Yorhaq 16: AKA
Пазнака
Падзяліцца
Капіяваць
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions