Zabbu̱li̱ 22
22
Hali mu̱handu̱ wa bahi̱i̱mi̱. Ku̱hi̱i̱mi̱ra mumaliriire ga “B̯uguma gya Mparaaki ha mambya.” Zabbu̱li̱ gya Dau̱di̱.
1Ruhanga wange, Ruhanga wange, hab̯waki ondekereeri̱?
Hab̯waki ondi hadei mwa kunjuna,
hadei kwo hali kulira kwange?
2Ai̱ Ruhanga wange, ka nnkusaba mwihangwe, bei̱tu̱ tonzi̱ramwo,
nei̱jolo, bei̱tu̱ nyeezegwa ntali na b̯u̱si̱nge.
3Bei̱tu̱ nab̯wo oicala mu̱syanu̱ mutima,
oi̱cali̱i̱ri̱ mu ntebe gyamu I̱saleeri̱ nigikukutenda.
4Weewe bahaaha beetu̱ gi̱beesi̱gengi̱,
baakwesi̱gengi̱, kandi noobacungura.
5Baakwesengereryenge kandi noobajuna,
weewe gi̱beesi̱gengi̱ batakuswara.
6Nagya ndi muntu kyani? Ndi nka muniongooro!
Gyagya alu̱mwa b̯uli muntu kandi agaywa bantu bensei̱.
7Bantu bensei̱ bambona, bansekereerya b̯u̱sekereerya,
banuga b̯u̱nu̱gi̱, ni̱bazi̱gi̱i̱zya mi̱twe myab̯u nibakoba yati,
8“Yeesiga Mukama, kale nu Mukama ei̱ze amucungure,
ei̱ze amujune, hab̯wakubba yooyo giyeegondezeeramwo.”
9B̯u̱b̯wo nu wantoori̱ mu nda gya mmaama,
wandinda na heibiiri lya mmaama.
10Nyeesiga weewe kuruga nimbyalwa,
kuruga ninduga mu nda gya mmaama weewe oli Ruhanga wange.
11Otandugaho,
hab̯wakubba hali̱yo b̯ujune b̯u̱kwi̱za,
kandi tihalohoona alib̯unjuna.
12Banyanzigwa bange banene banyeelogoleerye,
nka nnumi zinyamaani za Bbasaani̱ bangoti̱ri̱ hensei̱,
13bab̯u̱u̱li̱ri̱ mi̱nwa,
nka ntali zikuruutaruuta kandi zikuhuruguma.
14Nnekaneki̱ri̱ nkaaku̱u̱ti̱rwe,
na maku̱ha gange gateesu̱ki̱ri̱,
mutima gwange nka bisasala,
nkwegwa nigukwaga mu salaka,
15mimiro myange myomi̱ri̱ nka lutaana,
kandi lulimi lwange lwomi̱ri̱ mu b̯unkudankuda,
ondeki̱ri̱ nkwere mu cuucu.
16Kubba kitebe kya nkori̱ za bibii ki̱ngoti̱ri̱,
nka mbwene zi̱nyeelogoleerye,
bantu̱u̱ti̱ri̱ magulu na ngalu.
17Maku̱ha gange gensei̱ gakwebala,
bakumbona nibeeb̯uga.
18Babageeni̱ bilwalu byange
na ngoye zange bazikuutira karu̱ru̱.
19Bei̱tu̱ we, ai̱ Mukama, otandugahoona!
Ai̱ weewe onjuna, i̱za b̯wangu onjune!
20Njuna hali mpirima,
ocungure b̯womi b̯wange hali maani ga zi̱zo mbwene!
21Njuna ontoole mu mu̱nwa gwa ntali!
Kwokwo onsi̱ki̱ri̱ kuruga mu mahembe ga mpeta!
22Nyaaweeranga bei̱ra bange byeibara lyamu,
nyaakuhaariizanga mu bab̯wo beecooki̱ri̱.
23Nywe batamwo Mukama ki̱ti̱i̱ni̱sa, mu̱mu̱haari̱i̱ze!
Nywe baana bensei̱ ba Yakobbo mu̱mu̱tende,
mu̱mu̱ti̱i̱ne, baana Bei̱saleeri̱ nywensei̱!
24Hab̯wakubba Mukama tagaya kandi tanuga
b̯ujune b̯wa yogwo akuwonawona,
kandi tamuhemukira,
bei̱tu̱ ei̱ramwona kusaba kwamwe.
25Nyaakuhaariizanga Mukama, mu kitebe kya banene,
mu mei̱so ga bab̯wo baku̱ti̱i̱na nyaadoosereeryanga kwehayo kwange.
26Banaku baadyanga nibeicuta,
bab̯wo bamu̱toolya baahaariizanga Mukama!
Mitima myenyu̱ myasemererwanga biro na biro.
27Bantu ba nsonda zensei̱ za nsi bei̱zu̱kanga
nibahondera Mukama,
na maka gensei̱ mu mahanga
gaali̱i̱za mu mei̱so gaamu ku̱ramya.
28Hab̯wakubba Mukama yooyo alema,
kandi yooyo afuga mahanga gensei̱.
29Bagu̱u̱da bensei̱ ba mu nsi badyenge kandi baramyenge Mukama,
bensei̱ ba hansi baliinama,
bensei̱ batakusobora kwejuna ku̱kwa mmaliiro gyab̯u gilibba nka cuucu.
30Baana balikabyalwa balimuheereza,
baliguweera mu̱hi̱hi̱ gwa mei̱so bya Mukama.
31Mananu gaamwe bali̱gatebereerya
bab̯wo batakabyali̱i̱rwe, nti “Mukama yooyo yaaju̱ni̱ri̱ bantu baamwe.”
Цяпер абрана:
Zabbu̱li̱ 22: LUGUNGU
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2025, Wycliffe Bible Translators, Inc. All rights reserved.