Salmos 121
121
Díos la tsꞌayakohanra
1Jeheni kontani ti ijna̱ kixin,
¿nketí chrókui̱xi̱n ti nkexro chrókjuinki̱tsa?
2Ti nkexro tsjinki̱tsa ti jeheni
mé Itꞌéni Díos tíha
kixin jehe chꞌan mé
kjuíchꞌéna chꞌan nka̱jní la ko chjasintajni.
3Tsjajonhña Díos kjuachaxin kixin tsoxrátóxian
la ko jehe chꞌan la tsꞌajuahya chꞌan,
nkochríxín tsꞌayakohen chꞌan ti jaha.
4Kixin Díos la í tꞌajuahya chꞌan,
nkochríxín tꞌayakohen chꞌan ti sin Israel.
5Itꞌéni Díos mé tsꞌayakohan
la ko tsjinki̱tsa chꞌan ti jaha.
Díos mé chjinaxón itjen ti itjen jaha,
kixin tsjinki̱tsa.
6A̱ndá ti sóa kuènté ña̱o la tsochjáxinhña ti jaha
la ko kja̱xin ti nitjó la sincheníahña.
7Itꞌéni Díos mé tsjinki̱tsa
kixin kohya ninkehó nkehe jínahña tso̱han,
la ko tsꞌayakohan chꞌan kixin jína tsjakꞌe.
8Itꞌéni Díos mé tsꞌayakohen ti nti̱a sátsjia
la ko ti tsokjan ínaá
ijie la ko nkochríxín.
Цяпер абрана:
Salmos 121: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.