Proverbios 24
24
19
1Chrókóchji̱no̱xiánhña ti nkehe ichꞌe ti sin jínahña
la ko chrókjuénka̱yáxinhña chrókꞌuituan sin
2kixin jehe sin jehó tjenka̱yáxin sin tseé sin
la ko jehó nixja sin ti nkehe jínahña tjenka̱yáxin sin sichꞌe sin.
20
3Ti nkexro chónta kjuaxrexinkaon jína la chꞌéna ijnko nchia
la ko tjenka̱yáxin jína ti ó tsjakꞌe sin ti xránkíxixín nchia
4la ti kjuaxrexinkaon chónta sin
la jína tjasin sin ti nkehe náxrjón nkaxehen ti ndo̱e,
la xi̱kaha tíha mé kjuacha sin kixin jína tjenka̱yáxin sin.
21
5A̱ntsí tjetoan ti chrókónohe chojni ke ti chojni imá tse̱he̱;
a̱ntsí tjetoan ti chrókónohe chojni ke imá chróchónta chojni kjuachaxin tsꞌe̱to̱an.
6Ti chjasin tjenka̱yáxin tsjajo̱nko íjnko chjasin la ticháxi̱n tsjenka̱yáxin jína.
Itsjé chojni ticháxi̱n tsjinki̱tsa tsjenka̱yáxin ndá tsjacha ti sin sátsjikjajo̱n.
22
7Ti chojni lo̱nti̱ la tsjachahya tsochónta ti kjuaxrexinkaon jína;
ti tsíkónkotsé itsjé chojni ti chjasin la noehña sin nkehe tsixro sin.
23
8Ti nkexro jehó tjenka̱yáxin sichꞌe nkehe nduáhya,
la tsondáchro chojni kixin ijnko chojni xritjeyá kjuanínkaon tíha.
9Ti nkehe tjenka̱yáxin ti chojni lo̱nti̱ la ijie̱ tíha,
la kaín chojni tóxrìe̱nhña ti sin imá tꞌándaxín.
24
10Ti tjachahya jaha ti ña̱o siín kjuaxikaon
la tjáko̱xián kixin fuertehya jaha.
25
11Jaha chrókjui̱nchekaá ti nkexro tjejóchóhen kixin ó itsꞌen,
la chrókuíto̱ehya chrókꞌuen ti sin kohya ijie̱ kjuíchꞌe sin.
12Kjónté tsondáchrua kixin noahña nkehe sítóhen,
la ti nkexro nohe kaín nkehe la ó nohe nkexrín tjénka̱yáxian.
Chaxín nohe ti nkexro tjetsjehe ti nkehe ichꞌe chojni
la jehe chꞌan la tsje̱nke̱he nkojnko chojni ti ixra̱ kjuíchꞌe.
26
13Xje̱eni, inte ti itsje̱n kotsje̱nta náxrjón ixé;
Tsjéxian kixin imá náxrjón tíha.
14Mé xi̱kaha ti tsochonta ti kjuaxrexinkaon jína
la éxi ijnko nkehe ixé,
la ti tso̱noha xi̱kaha
la jína tsꞌaxrje kaín nkehe
la ko tsoxiteyá ti nkehe tjechohén.
27
15Jaha chojni jínahña, chrókjuénka̱yáxinhña chrókjui̱chꞌehé ijnko nkehe jínahña ti ndo̱e ti chojni jína.
Chrókjuinchekꞌitjáñahña ti ndo̱e sin.
16Kjónté yato vece tsꞌitsínka ti chojni jína
la tsꞌaya sin ínaá,
kjánchó ti chojni jínahña la tsꞌitsínka
la í tsochóntahya kjuaxróxin.
28
17Chrókócháahya ti ichrén nkehe chrókóhen ti chojni nínkakohan,
la ko chrókóchèhya a̱sán ti ó chónta sin nkojín kjuaxikaon,
18kixin Itꞌéni Díos la tso̱xriènhña chꞌan ti xi̱kaha tsjenka̱yáxian
landá sinchekjasótehya chꞌan ti nkexro a.
29
19Chrókónínkakonhña ti nkojín nkehe ichꞌe ti sin tjenka̱yáxinhña jína,
la ko chrókóchji̱no̱xiánhña ti nkehe tjenka̱yáxin ti sin tjasin ijie̱,
20kixin ti sin tjenka̱yáxin nkehe jínahña la kjuaxróxinhña tsꞌejó sin chrꞌéxi̱n,
la ti sin jínahña la tsꞌitjáña sin éxi tꞌanka ijnko xrohi.
30
21Xje̱eni, chrókjuíkosáyehé Itꞌéni Díos la ko ti rey tꞌe̱to̱an
la chrókꞌuitonhña ti sin imá jie̱he,
22kixin xrína̱hña titàyé itsi ijnko kjuaxikaon tsꞌitjáñaxín sin,
la ninkexró noehña nkexrín tsꞌe̱to̱an Díos la ko ti rey kixin tsjasótexín sin.
Íso nkehe ndáchro ti sin nohe
23Kja̱xin tíhi ti kjuaxrexinkaon chronka ti sin nohe:
Ti sin juez la nkokón chrókjuinchekito̱exín sin ti iji̱é chojni, kjónté chojni rico o̱ nóa.
24Ti nkojín juez tsondáchro kixin ti nkexro nduáhya kjuíchꞌe la chóntahya ijie̱
la kjá itsjé chojni tso̱nínkaon la tsotjinkakonhña sin ti juez a.
25A̱ndá ti juez jína sinchekito̱exín iji̱é ti nkexro nduáhya kjuíchꞌe,
la tsondáchro chojni kixin ijnko juez jína ti jehe chꞌan,
la ko tsjikosáyehe sin chꞌan.
26Ti nkexro jína tjate̱he nkojín nkehe
la imá tóchéhe̱ ti nkexro tjejótihin.
27Sa̱o chrókjui̱chꞌe ti ixra̱ kuèntá
la ko ti ixra̱ chonta no̱nta̱a,
a̱ndá chrꞌéxi̱n la jína si̱chꞌéna ndo̱a.
28Chrokjóntahya ti kichua ti kohya nkehe kjuíchꞌe,
la ko chrókjui̱chꞌénehña kjuachꞌia ti nkexro choxián.
29Chróndáchrohya: “Ti nkehe kjuíchꞌehe sin ti jeheni la kja̱xin xi̱kaha sichꞌeheni sin
éxi kjuíchꞌe sin mé xi̱kaha tsje̱nke̱heni sin.”
30Janhan kꞌuatsínka chjinaxón no̱nte̱e ti chojni séhe
la ko chjinaxón ti siín ito uva kuènté ti chojni tjenka̱yáxinhña jína,
31la kꞌuíkua̱n kixin nkuíxín la siín itsjé ntachꞌi̱
la ko ti chjaka kuènté sin la ó tsíxika.
32Ndá ti kꞌuíkua̱n tíha ndá kjuénka̱yáxian
la kꞌuitja ijnko nkehe:
33 #
Pr. 6:10, 11. *Ti tsjakꞌéchrian intsí la intsí tsꞌitjen
la tsjoa itjá kixin a̱ntsí jína tsjakꞌéchrian
34ndá ti xi̱kaha la tso̱nóa jaha mé éxi chrókui ijnko nkexro che̱e yámá chika
la chrꞌéxi̱n tsochontahya nkehe sinte.
Цяпер абрана:
Proverbios 24: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.