Proverbios 14
14
1Ti chojnichjin chónta kjuaxrexinkaon jína la tꞌayakohen ti ndo̱e;
a̱ndá ti chojnichjin chóntahya kjuaxrexinkaon jína la nchekꞌitjáña ti ndo̱e.
2Ti nkexro ndoá ixri la tjikosáyehe Itꞌéni Díos;
a̱ndá ti nkexro ixri ti nti̱a jínahña la tjinkakonhña sin Díos.
3Irꞌua ti chojni lo̱nti̱ la jehó nixja ti nkehe kjuahnke;
a̱ndá ti nkehe nixja ti chojni chónta kjuaxrexinkaon jína la jína tsꞌejó sin.
4Ti kohya koxinta sichꞌe ixra̱ la tsꞌónahña ninkehó;
a̱ndá ti jína ichꞌe ixra̱ ti koxinta la itsjé nkehe tsꞌóna.
5Ijnko nkexro jína la chꞌiyehya ti nkexro nchekito̱exín;
a̱ndá ti nkexro nduáhya tjenka̱yáxin la jehó tjasin kjuachꞌia.
6Ti chojni tjatènkíhi la, kjónté tjeyá sin ti kjuaxrexinkaon jína, la tsꞌitjahya sin;
a̱ndá ti chojni nohe la xra̱hya tsꞌitja sin ti kjuaxrexinkaon jína.
7Tito̱hé ti chojni lo̱nti̱
kixin tsꞌitjáhya kjuaxrexinkaon kixin ti nkehe tsonixja sin.
8Ti kjuaxrexinkaon jína la tsjinki̱tsa ti chojni nohe kixin jína tsꞌaji sin,
a̱ndá ti chojni lo̱nti̱ la jehó ti kjualo̱nti̱ chꞌiyehe a̱sén sin.
9Ti sin lo̱nti̱ la tjano sin kjónté chónta sin ijie̱;
a̱ndá Díos mé tóxríhi̱n ti ixra̱ jína ichꞌe ti sin tjenka̱yáxin jína.
10Jehó a̱sén chojni mé nohe ti kjuaxikaon chónta,
la kohya íjnko nkexro tso̱nohe ti kjuachéhe̱ chónta sin.
11Ndo̱e ti chojni tjenka̱yáxin nkehe jínahña la tsꞌitjáña;
a̱ndá ndo̱e ti chojni jína la kjuaxróxin tsꞌejó sin.
12 #
Pr. 16:25. *Siín nti̱a éxi jína tsjehe tꞌikon chojni,
kjánchó ti tsjixixín la tsꞌenxín sin tíha.
13Kjónté tjano ijnko chojni la tꞌává ti a̱sén sin,
a̱ndá ti tsjixin tsjano sin la na̱xa̱ siín ti kjuatꞌává.
14Ti chojni tsjichròe la tsjasótexín ti ixra̱ jínahña kjuíchꞌe;
a̱ndá ti chojni jína la tso̱chéhe̱ kixin ti nkehe jína kjuíchꞌe sin.
15Ti chojni lo̱nti̱ mé xra̱hya titekaon kaín.
A̱ndá ti chojni tjenka̱yáxin jína la tsjehe jína nkexrín tsꞌaji.
16Ti chojni nohe la tóxakohen la tito̱he ti nkehe jínahña;
a̱ndá ti chojni lo̱nti̱ la ihnke sin la tóxakuenhña sin.
17Ti chojni xra̱hya tónínkaon la tjoka ichꞌe sin nkojín kjualo̱nti̱;
kjánchó ti nkexro tjenka̱yáxin la tjacha tjaníhi tíha.
18Ti sin chóntahya kjuaxrexinkaon jína la ti kjualo̱nti̱ ó tsjacha sin;
a̱ndá ti sin chónta kjuaxrexinkaon jína la a̱ntsí tso̱nohe sin.
19Ti sin jínahña mé tsixíhin tochꞌin sin ti sin jína
la ko ti sin tjasin ijie̱ la tsjanchakꞌá sin nkehe ndo̱e ti sin jína tjejó.
20Ti sin nóa la hasta ti sin tꞌiton sin tóxrìe̱nhña sin ti jehe sin;
a̱ndá ti nkexro rico la siín nchónhña nkexro tꞌiton sin.
21Ti nkexro tjinkakonhña ti nkexro chóxin la tjasin ijie̱;
a̱ndá náxrjón tsꞌejó ti nkexro tsjinki̱tsa ti sin nóa.
22¿A jehya tsjichròe ti nkexro tjenka̱yáxin ti nkehe jínahña ní?
A̱ndá ti nkexro ichꞌe ti nkehe jína la itsjé sin tjinkaon ti jehe sin.
23Kaín ti nkexro ichꞌe ixra̱ la jína tsjacha,
a̱ndá ti nkexro jehó nixja ndá chꞌehya ixra̱ la tso̱nóa.
24Ti sin chónta kjuaxrexinkaon jína la ti nkehe nohe sin mé éxi ijnko corona,
a̱ndá ti sin lo̱nti̱ la jehó ti kjualo̱nti̱ tsochónta sin.
25Ti nkexro ndoá chronka la tsjinki̱tsa tsꞌenhña íjnko nkexro;
a̱ndá ti nkexro chꞌia la jehó ncheníhi iso chojni.
26Ti nkexro tjikosayéhe Itꞌéni Díos la Díos tsꞌayakohen chꞌan ti jehe sin
kixin jína tsꞌejó sin la ko ti xje̱en sin.
27Ti nkexro nchexiteyéhe Itꞌéni Díos la éxi ti tjetꞌaxrje ìnta̱ tsjajon kjuachón;
la ntiha mé tso̱kohya kjuaxikaon tsꞌenxín sin.
28Ijnko rey la chéhe̱ ti ó tsꞌe̱tue̱hen chꞌan ijnko chjasin ijié;
a̱ndá ti kohya chojni tsꞌe̱tue̱hen chꞌan la tso̱suéhe̱ chꞌan.
29Ti nkexro tjokahya tónínkaon la tja̱ko̱xi̱n kixin imá nohe;
a̱ndá ti nkexro tjoka tónínkaon la tja̱ko̱xi̱n kixin lo̱nti̱.
30Ti nkexro kjuaxróxin itjen la kanhñó tóníhi,
a̱ndá ti nkexro chji̱no̱xíhin la ncheníhi ti cuerpo kuènté.
31Ti nkexro chꞌiyehe ti sin nóa la tjikosayéhya sin ti nkexro kjuíchꞌéna ti jehe sin.
A̱ndá ti nkexro tjinki̱tsa ti sin nóa la tjikosáyehe sin Díos.
32Ti sin jínahña la tsꞌitjáñaxín sin ti ijie̱ tjasin sin;
a̱ndá ti sin jína la ti nkehe jína tꞌayakohen ti jehe sin.
33Ti kjuaxrexinkaon jína la itjen nkaya a̱sén ti sin jína tjenka̱yáxin;
a̱ndá ti chojni lo̱nti̱ la ni chóxinhña sin nkehe tíha.
34Ti kaín chojni ichꞌe nkehe jína la ti chjasin mé tsꞌáyéhe̱ kjuasàya;
a̱ndá ti tjasin sin ijie̱ la jehó kjuatosuéhe̱ tsꞌixin ti chjasin.
35Ijnko rey la tóxríhi̱n ti sin ichꞌe ixra̱ jína la tienxín,
a̱ndá tónínkakohen chꞌan ti nkexro tjajon kjuatosuéhe̱.
Цяпер абрана:
Proverbios 14: poeNTplus
Пазнака
Падзяліцца
Параўнаць
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2016, Wycliffe Bible Translators, Inc. All rights reserved.