Pulosay kágad pa Rumián 15
15
Degaráni hayálá bedárén
1Má ke imáná zórmand én, báyad ent nezórén báwarmandáni kamzórián bardásht bekanén o bass wati jenday wasshiáni randá mabén. 2Cha má har yakké wati hamsáhegá wassh o razá bekant, tánke áiay rost o rodóm bebit. 3Chéá ke Masih ham wati jenday wasshiáni padá naat, anchosh ke nebeshtah ent: “Tai bad o rad kanókáni bad o rad mani sará kaptagant.”#15:3 Zabur 69:9. 4Har chizz ke pésará nebisag butag, pa may tálimá nebisag butag, tánke cha hamá sabr o delbaddhiá ke Pákén Ketáb márá dayant márá omét berasit. 5Sabr o delbaddhiay Hodá shomárá anchén zendé bebakshát ke Issá Masihay paymá gón yakdomiá hamdel bebét, 6tánke shomá pa hamdeli o hamtawári Hodá, bezán may Hodáwandén Issá Masihay Petá satá o saná bekanét. 7Nun pa Hodáay shán o shawkatá, shomá yakdomiá hamá paymá wasshátk bekanét o bezurét ke Masihá shomárá zortag.
Yahudi o darkawmáni omét
8Shomárá gwashán ke pa Hodáay rástiay pésh dáragá, Masih Yahudiáni#15:8 Asligén Yunáni nebeshtánka gwashit: “sonnat kortagénáni”. hezmatkár but ke hamá kawl o wádahán purah o sarjam bekant ke bonpirokán dayag butagatant o 9é paymá darkawm Hodáyá pa áiay rahmá satá o saná bekanant. Anchosh ke nebisag butag:
“Paméshká tará kawmáni kerrá satá kanán o
tai námá názénán.” # 15:9 Samwél Káziay Domi Ketáb 22:50; Zabur 18:49.
10É ham gwashag butag:
“Oo darkawmán! Gón áiay kawmá hór shádeh kanét.” # 15:10 Mussáay Wáz 32:43.
11Démterá:
“Oo sajjahén darkawmán! Hodáwandá benázénét.
Sajjahén ráj áiá satá o saná bekanant.” # 15:11 Zabur 117:1.
12Eshayá nabi ham gwashit:
“Yassiay risshaga rodit,
hamá ke páda kayt o darkawmáni sará bádsháhia kant,
áiay sará darkawm ométa bandant.” # 15:12 Eshayá Nabiay Ketáb 11:1.
13Ométay Hodá ke shomá áiay sará báwar kortag, shomay delá cha har paymén wasshi o émeniá sarréch kanát, tánke gón Pákén Ruhay zórá shomay del cha ométá sarréch bebit.
Pulos pa darkawmán kásedé
14Oo mani brátán! Man deljam án ke shomá wat cha sharri o nékiá sarréch ét, har paymén zántá kámel ét o pa yakdomiay tálim dayagá twáná ét. 15Bale man shomay sará lahtén chizzay bárawá pa deléri nebeshtah kortag ke padá á chizzán shomay yátá byárán. É hamá rahmat ent ke Hodáyá mani sará kortag, 16ke man pa darkawmán Issá Masihay hezmatkáré bebán o Hodáay wasshén mestágay rasénagay hezmatá chó péshwáéá bekanán. É káray maksad esh ent ke darkawm cha Pákén Ruhay barkatá anchén palgártagén hayráté bebant ke Hodáay bárgáhá kabul bebit.
17Gorhá man pa Issá Masihaygi, pa Hodáyá wati kortagén hezmatáni sará pahra bandán. 18Maná bass hamá káráni bárawá habar kanagay del o jorat hastent ke Masihá cha mani dastá, bezán cha mani habar o kárán kortagant tánke darkawm Hodáay parmánbardáriá bekanant. 19Áiá é kár cha nesháni o mójezaháni wák o kodratá, gón Pákén Ruhay zórá kortagant. Gorhá cha Urshalimá beger tán Ilirikumay damagá#15:19 Ilirikum maróchigén rónendi Bálkánay damagé butag. , man sajjahén ráhá tarr o gard kortag o Masihay wasshén mestág pa sarjami jár jatag. 20Mani wáhag armán hamé butag ke mestágay járá hamá jágahán bejanán ke ódá Masihay nám kassá pésará nageptag o degaráni ér kortagén bonredáni sará chizzé addh makanán. 21Bale hamá dábá ke nebeshtah ent:
“Hamáyán ke áiay hál narasetag, á gendant o
hamáyán ke áiay bárawá naeshkotag, á sarpada bant.” #15:21 Eshayá Nabiay Ketáb 52:15.
Pulos dém pa Rumá
22Paméshká báz randá mani dém dárag butag ke shomay kerrá átk makanán. 23Bale nun pa man é hand o damagán kár kanagá jágahé pasht nakaptag o bázén sáléá mani wáhag ham butag ke shomay kerrá byáyán. 24Paméshká mani delá ent ke wahdé man dém pa Espániáyá rawán, shomárá begendán, gón shomá wasshén gend o nendé bekanán o randá shomá maná pa démteray sapará madat bekanét.
25Bale nun Urshalimá, palgártagénáni hezmat kanagá rawagá án. 26Chéá ke Makduniah o Akáyahay báwarmandán shawr kort ke pa Urshalimay garib o nézgárén palgártagénán máli komakké ráha dayén. 27É áyáni wati jenday shawr at. Á pa rásti Yahudiáni wámdár ant, chéá ke wahdé darkawm Yahudiáni ruhi barkatán sharikdár butagant, á wámdár ant ke gón wati máli hastiá Yahudián komakk bekanant. 28Wahdé man é kár sarjam kort o deljam bután ke é komakk pa áyán sar butag, dém pa Espániáyá rawagay wahdá shomárá gendóka kanán o gwazán. 29Mana zánán ke wahdé shomay kerrá byáyán, gón Masihay sarjamén barkatána káyán.
30Oo brátán! May Hodáwandén Issá Masihay námá o Pákén Ruhay mehray sawabá cha shomá dazbandia kanán ke Hodáay bárgáhá pa man dwá bekanét o é paymá mani johdán gón bebét. 31Dwá kanét ke cha Yahudiahay Hodánáparmánáni dastá berakkán o palgártagén mardom hamá máli komakká pa galé bezurant ke man Urshalimá rasénáni, 32tánke gón Hodáay wáhag o razáyá pa shádeh shomay kerrá byáyán o gón shomay didárá maná nókén wák o twáné berasit. 33Sohl o émeniay Hodá gón shomá sajjahénán gón bát. Ámin.
Цяпер абрана:
Pulosay kágad pa Rumián 15: HPKB
Пазнака
Капіяваць
Параўнаць
Падзяліцца
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2015-2022, Wycliffe Bible Translators, Inc. and the Balochi Bible Translation Team. All rights reserved.