Папулярныя біблейскія вершы з OKHURULA 6

Падзяліцца

Khulweshio, boolela abandu ba Isiraeli ori, ‘Nisie OMWAMI Nyasaye, khandi ndalamurusia inywe mukhusandibwa khwa Abamisiri, khandi ndalamuhonia inywe okhurula mumbohe mwabamura. Ndalanyiila omukhono kwanje kwamaani okhubahonokosia nebareerera Abamisiri eshinyasio shiokhuriisia ne ndalamununula inywe.

Ne ndalamukhola okhuba abandu banje beene, nasi ndaba Nyasaye wenywe. Nolwa mulamanya mbu, nisie OMWAMI Nyasaye wenywe, oumuyiniye okhurula mubusandibwi bwa Abamisiri.

Khandi ndalamuyila mushialo shiandetsuba okhuhelesia Aburahamu, Isaka nende Yakobo. Ndalamuhelesia inywe shibe eshienywe. Nisie OMWAMI Nyasaye.’ ” Musa yamala aboolele abandu ba Isiraeli ario, nebutswa shibarecheresia aka yababoolela nikasuubila ta, shichila bali nibafwile emioyo chiabwe khulwa okhusandibwa khwa mumbohe.

Nebutswa OMWAMI Nyasaye yaboolela Musa Ari, “Bulaano olalola eshia ndalakholela omuruchi oyo. Ndalamunichilisia okhulekhuula abandu banje okhutsia, khandi ndalamunichilisia okhubalonda okhurula mushialoshie.”