If you would like a copy of this version please contact info@davaraudiobibles.org

Biblia Toba Qom, La&#39;aqtaqa Ñim Lo&#39;onatac &#39;Enauacna © 2013, Sociedad Bíblica Argentina. (Text)
Toba Audio Bible ℗ 2025, Davar Partners International. (Audio)

Biblia Toba Qom 2013

Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.

Qaq aỹem nta'a Nabucodonosor, sanem da ỹa'aqtac 'enauac na nhuo' le'ecpi, qataq na ỹotta'a't shiỹaxauapi, qataq na ỹotta'a't naua la'aqtaqa maye netalec ne'ena 'alhua, da sauotaique da namayepi nquictauec da l-lagaxayec. Sauotaique da qauaỹachiñi dam lataxac maye saqaỹauanapega, maye aỹem ỹo'otec Ñim Lo'onatac 'Enauacna maye Nataỹaña 'Enauacna. ¡Qaq ỹataqta lta'araicpi nam saqaỹauanapegapi qataq nam huo'o da llo'oxoyecpi maye ỹo'ot Ñimaye! Qaq da lo'onataxanaxac Ñimaye chochaq tatec qome, qataq da la'añaxac qaica qome ca loga't. Aỹem Nabucodonosor she'emaqtac co'ollaq soota'a ñi ima' lta'araic, qataq sootaigui da qaica ca seueetaique. Qalaxaye huo'o so pe co'ollaq ñenaatai', nache huo'o so ichoxonaxac maye aỹem ỹe'elaqchet, nache na iuennataxacpi qataq na ỹauanaqchecpi ỹataqta aỹem nlaxatchigui da icolanaxa. Ime nache samaxasoxoneuga da aỹem qanauegueua'a 'enauac so ỹaanaxanaxaicpi na Babilonia, da yaqto' aỹem da'aqtaxanem cam naigui so ichoxonaxac. Nache anac co'ollaxa 'enauac so 'oiquiaxaipi, qataq so ilaviigui ca lỹa, qataq so ỹaanaxanaxaicpi, qataq som napaxagueetegapi ana huaqaañipi na Babilonia, nache aỹem sa'axatem so ichoxonaxac, qalaxaye somayepi saishet da ỹañoxot da aỹem da'aqtaxanem cam naigui somaye. Qaq pa'atec nache aỹem nachaateua'a so Daniel, maye nataqa'en le'enaxat Beltsasar souaxat dam sho'oxoren ñim ñatamnaxala', qaq da nachaalataxac somaye hueta'aguet som saqcha'a la'añaxac nam atamnaxala'pi maye qui'itta, nache sa'aqtaxanem som ichoxonaxac, sheeta': 'Am Beltsasar maye 'am lataxala' nam ilaviigui ca lỹa, aỹem saỹaten da so saqcha'a la'añaxac nam atamnaxala'pi maye qui'itta, 'am hueta'aguet, nache qaica ca ỹapogoñi 'anqa'en. Qaq 'ana'axaỹaxaachiguiñi, aỹem 'am sa'aqtaxanem som selota'a co'ollaxa maye huaigui so ỹo'ochaxa, nache aỹem 'aua'aqtaxanem qome ca naigui somaye. Qaq 'eso so ỹauanaqchec co'ollaq ñenaatai':

Na laiñi ana 'alhua huo'o aso ỹataqta logorai qo'oipaq.
Qaq asa'aso qo'oipaq ñaxatec
nache ivira'a da ỹataqta late'erai,
ana lmilo qalaq iviro'ot na piguem,
nache asomaye ishet da qaila'a da qanayeuta'a
ca ỹataqta qaỹoqta ana 'alhua.
Qaq ana lauepi asomaye qalaq ỹataqta 'onaxai,
qataq aso ala ỹataqta qalota, nache ishet da iquia'axan 'enauacna.
Na shiguiỹacpi maye huauec qalaq hueto'ot na lpaqal asomaye,
qaq na qoỹopi qalaq ỹanagui na lpata'cpi ana lcouepi asomaye,
qaq da lca'alaxa na shiỹaxauapi
qalaq chegoqtapoigui asomaye.

Qaq co'ollaq ñaq sootaigui so ỹauanaqchec, nache sela'aguet so namaxashec maye nauanaxanaxanec, chegoqo'ot na piguem, nache somaye na'axannec da detaqa, 'eeta':

Qaua'axasoxoñiiñi ara'ara qo'oipaq qauchiquiiuec qome ana lcouepi
qataq qanqache ana lauepi,
qataq qalagaxache ana alapi.
Qataq datauec qanqa'aiñi na shiguiỹacpi
maye hueto'ot na lpaqal,
qataq na maỹopi maye netaigui ana lcouepi aramaye.
Qalaxaye ara lamo qataq na lpa'a'pi
qano'onaxachiỹaigui qome na 'alhua,
nache qaỹa'añiỹagui ca ncoñetaxanaxat lcat
qataq ca bronce,
nache qauachiỹaigui qome ana huouepi maye huetalec na no'onaxa,
yaqto' na 'aỹa talec acamaye, qataq nache ỹalecta'aguet qome na shiguiỹacpi,
qataq ana huoue maye huetalec na no'onaxa.
Ña nquic qome da lhuennataxac,
nache ỹe'eguelaxa da 'eeta'am ca shiguiỹac,
qaq de'era qauem, damaye iviraxattrec qome caua siete vi'iye.
Qaq 'era da lapaxañi la'aqtac som qui'itta
namaxashecpi maye nauanaxanaxanecpi,
yaqto' 'enauac na shiỹaxauapi ỹaỹaten
da Ñim Lo'onatac 'Enauacna maye Nataỹaña 'Enauacna,
huo'o da la'añaxac da ilo'ogue
'enauac da lo'onataxanaxac na shiỹaxauapi,
Ñimaye ỹanem da no'onataxanaxac
cam taalec da ỹanem,
qataq ỹo'ot da lataxala' na ỹotta'a't shiỹaxauapi
cam qaica ca la'amaqchec da ỹalectaigui na shiỹaxauapi.

Qaq aỹem nta'a Nabucodonosor, 'eso so ichoxonaxac co'ollaxa, qaq nagui 'am Beltsasar, ñaq aỹem 'aua'axatem cam naigui somaye, cha'aye nam ỹaanaxanaxaicpi maye ỹalectaua'a da ỹo'onataxanaxac qaica ca ishet da ỹaỹaten, qalaxaye 'am ishet qome da 'aua'axat ca naigui somaye, cha'aye 'am hueta'aguet so saqcha'a la'añaxac na atamnaxala'pi maye qui'itta. Qaq huaña nache so Daniel maye nataqa'en le'enaxat Beltsasar, cara'acolec da na'axaỹaxanañi, qataq icolanaqchet na lhuennataxacpi maye taigui na lqaic. Qalaxaye aỹem nta'a shenapega somaye, sheeta': «'Am Beltsasar saishet qome da ỹapacauec da 'arhuogoxo, souaxat so ichoxonaxac, qataq da 'aua'axat ca naigui somaye. Nache so Beltsasar ỹasat, nache 'eeta': ‹¡Aicoue, ñaq talec qome 'enauac na 'ampa'aguenaxauapi ca naigui som 'archoxonaxac 'am nta'a!› Asom qo'oipaq maye logorai qataq late'erai maye 'aula'a co'ollaxa 'am nta'a, maye iviro'ot na piguem qataq ishet da qaila'a na'aictaxa da qanayeuta'a ca qaỹoqta nam 'alhua, qataq ỹataqta 'onaxai ana lauepi qataq qalota aso alapi maye ishet da iquia'axan 'enauacna, qataq na lpaqal asomaye nache hueto'ot na shiguiỹacpi maye huauec, qaq ana qoỹopi qalaq ỹanagui ana lcouepi na lpata'cpi, qaq asa'aso qo'oipaq qalaq nache 'am, 'am nta'a, da 'anquictasheguem qataq 'am 'añaxaic. Qataq da 'ara'amaqchec 'am nta'a nquictauec, nache ivira'a da iviro'ot na piguem, qataq da 'aro'onataxanaxac imattalec ana 'alhua. 'Am nta'a nataqa'en 'aula'a co'ollaxa so qui'itta namaxashec maye nauanaxanaxanec da chegoqo'ot na piguem, nache somaye, 'eeta': Qaua'axasoxoñiiñi 'ara'ara qo'oipaq qataq qaulaxachiigui, qalaxaye qano'onaxachiỹañi qome ara lamo, qataq na lpa'a'pi, qataq qaucoñiyiỹagui ca ncoñetaxanaxat lcat qataq ca bronce, nache qauachiỹaigui ana huoue maye huetauga na no'onaxa. Qataq talec qome acamaye na 'aỹa, nache ỹalectaigui qome na shiguiỹacpi qataq ana huouepi maye huetauga na no'onaxa, choche ivittrec caua siete vi'iye. Qaq 'era dam naigui da lapaxañi Ñim Lo'onatac 'Enauacna maye Nataỹaña 'Enauacna da 'am talec qome 'am nta'a. Qaq 'am nta'a, 'am qanqateeguesop qome na shiỹaxauapi, nache 'aualectaigui qome na shiguiỹacpi, nache qollectac qome ana huoue qoneta'am ca nauegaxanaxala'pi huaca, nache na 'aỹa ỹapapiaxat na 'aro'oc. Qaq 'era da qome da 'eetec da 'anachaalataxac que'ecaua siete vi'iye 'am nta'a, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem. Qaq dam namaxasoxonaxac co'ollaxa da qano'onaxatañi aso lamo qataq na lpa'a'pi aso qo'oipaq, damaye naigui da 'am qaỹe'eguelaxatot da 'aro'onataxanaxac 'am nta'a, qom 'auauatton da Ñim Lo'onatac 'Enauacna nacheñi ñim huo'o da la'añaxac. Qaq ỹoqo'oye 'am nta'a, qoquetegue qome de'era ỹapaxaguenataxanaxac: 'Ano'onaxat qome da 'aro'onataxanaxac, nache saishet da qaltaq 'auauo'o ca 'arasouaxashet, nache tachiguiña 'anqa'en nam qauem maye 'auo'ottac, nache qouapegue' qome da 'autauan na choxoraqpi. Qaq saiuena'a da nachera da chegoqchigui da nache queta da 'anachattaigui da 'arlagaxayec qataq da qaica ca 'auena'a 'am nta'a.»
Qaq 'enauac de'era qaỹa'axata'a da talec so nta'a Nabucodonosor, damaye ỹataqta ipacchigui co'ollaxa. Qaq so inoxonec so 'oonolec vi'i, nache co'ollaq so nta'a coleeteguelec na l-laq so lma' lta'araic ye Babilonia, nache 'enapeco': «¡Ña qauoloỹa na Babilonia da ỹataqta lta'araic! Aỹem so'ogoxona da lta'araic ỹa'añaxac co'ollaq ño'oxoosheguem da yaqto' hueta'a da llo'oxoyec da ỹo'onataxanaxac, qataq da ỹachaxan da ỹa'amaqchec.» Qaq co'ollaq ñaq detaqtac so nta'a, nache qaỹa'axaỹa so na'aqtac chemqot na piguem, 'eeta': «'Am nta'a Nabucodonosor, ña 'ana'axaỹaxana de'era. Da 'aro'onataxanaxac, damaye mashe saishet da 'aralamaxat, cha'aye 'am qanqateeguesop qome na shiỹaxauapi, nache 'aualectaigui na shiguiỹacpi, qataq qollectac qome ana huoue qoneta'am ca nauegaxanaxala'pi huacapi, ivittrec caua siete vi'iye, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, da huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem.» Qaq nache huaigui co'ollaq ñaq detaqtac so Nabucodonosor, da ipacchigui som qaỹa'axatta'a co'ollaxa, nache somaye qanqateeguesop som shiỹaxauapi, nache chectac ana huoue 'eeta'am ca nauegaxanaxala' huaca, nache na 'aỹa ỹapapiaxat na lo'oc somaye, huaña nache ñaxat na laue 'eeta'am na laue na vi'ic, qataq naua nna'ache 'eeta'ama naua nna'ache na maỹopi.

Qaq co'ollaq ipacchigui som qalapaxañi da ñeuaxanaguec, nache aỹem Nabucodonosor samato'ot na piguem, nache ñanomteguet da aỹem qanataren nache qaica so aỹoic, qaq huaña nache sanot da ña'achecỹaxac Ñim Lo'onatac 'Enauacna maye Nataỹaña 'Enauacna nache sho'oxoren Ñim nache 'eetai' da nca'altauec, sheeta':

«Da 'ara'añaxac qalaq chochaq tatec qome,
da 'aro'onataxanaxac qalaq qaica ca loga't.
Nam huetalec ana 'alhua
qalaq qaica ca la'amaqchec da nachatto'ot Ñimaye,
qataq Ñimaye da huo'o ye ỹo'ot
qalaq maiche ca ỹataxaateuga,
nam hueto'ot na piguem qataq nam huetalec ana 'alhua.
Qataq qaica ca ishet da dataỹa'aguet da la'añaxac,
qataq da ichemaxattac nam ỹo'otpi Ñimaye.

Qaq nache huetoigui se'eso na'a'q da ñetouen, nache aỹem qaỹe'eguelaxatot da ỹa'amaqchec, qataq ỹo'oxoyec, qataq da llo'oxoyec da ỹo'onataxanaxac. Qaq som ỹa'aqtaxanaxanecpi qataq so 'amaqtaqaicpi itauapi anac da aỹem ñe'eguena'a, ime nache qaltaq she'eguelaxa da ỹo'onataxanaxac da selo'ogue na ỹalamaxat nhuo', qaq huaña nache sevira'a da ỹactec da ỹa'añaxac napacalec som hua'auchiguiñi co'ollaxa ỹa'añaxac. Qaq ỹoqo'oye aỹem Nabucodonosor, nagui sho'oxoren, qataq huo'o naq 'enec ñaqa'en, qataq sho'oxoren Ñim Nta'a maye neto'ot na piguem, cha'aye 'enauac nam ỹo'otpi ỹataqta 'eesa, qataq nalochiguiñi, qataq ishet da ỹo'ot da qaica ca 'enec naqa'en nam 'eetega 'amaqtaqaicpi.»

Слухаць Daniel 4