Doh lah terjemahan Kitab Kuy Temiar rik mulak. Puꞌdoh hòj mok ènsekh bukuk Kitab nak, dak akal kitabeh wèl bukuk Kitab rik gèhnih bil hòj mok. Èn kelòj bukuk Kitab doh, Tuhan naꞌoglèkh Gah Méj ma èk: Tuhan hòj naꞌog Kuwòt rik Eh, rik bekenëh Yèsus, najadik sènꞌòy gerèk èk. Dak Yèsus nakebes untok namtèrgos ma èk kenèmbek, supaye Allah namꞌampon ma dose èk. Dak pas nak Tuhan natèrwòg Yèsus nòm kènbes Eh! Jadik puꞌdoh chok rik hèh-hoh ma tenènglèkh Yèsus, Tuhan naterime ma kelòj kewarge rik Eh, bok èk boléh èmgos jalꞌéng samak Rik Nak.
Terjemahan Temiar doh tok samak ma terjemahan Bahasa Malaysia. Udoh kedak terjemahan nòm BM, tapik nòm bahasa asal Kitab (Bahasa Yunani ròb Ibrani). Sebab nak kandék hòj kisemak terjemahan doh samak maròp-maròp guruk Kitab ròb pakar terjemahan, supaye kenèmbek maksod eh kemën bok tehad gerèk kuy asli Kitab nak. Dak kisemak keꞌjèk samak jajéh sènꞌòy Temiar, supaye maksod eh najadik tèꞌlalah èn kelòj Kuy Temiar.
Inilah terjemahan Alkitab Bahasa Temiar yang pertama. Sekarang sudah ada separuh buku Alkitab itu, dan nanti kami akan tambah lagi buku Alkitab bila sudah ada. Dalam buku Alkitab ini, Tuhan memberitahukan Berita Baik kepada kita: Tuhan sudah memberi AnakNya sendiri, yang bernama Yesus, Dia menjadi manusia seperti kita. Lalu Yesus mati untuk menyelamatkan kita semua, supaya Allah akan mengampunkan dosa kita. Dan selepas itu Allah membangkitkan Yesus dari kematianNya! Jadi sekarang sesiapa yang ikut ajaran Yesus, Tuhan menerima dalam keluargaNya sendiri, dan kita boleh hidup kekal bersama Dia.
Terjemahan Temiar ini tidak sama dengan Bahasa Malaysia. Ini bukan terjemahan dari BM, tetapi dari bahasa asal Alkitab (Bahasa Yunani dan Ibrani). Sebab itu kami sudah semak terjemahan ini bersama beberapa guru Alkitab serta pakar terjemahan, supaya semua maksudnya benar dan tepat seperti bahasa asli Alkitab itu. Dan kami semak juga bersama ramai orang Temiar, supaya maksudnya menjadi jelas dalam Bahasa Temiar.

℗ 2025 Wycliffe Bible Translators, Inc.

Gah Méj: Kitab Kuy Temiar

Bil mulak eh tòp, èn bumi doh tèk-tik tok mèk-mok, Rik Nak hòj mok rik kenëh Eh Gah. Dak Gah nak mok samak Allah, bok Gah nak lah Rik Allah. Rik Nak hòj mok samak Allah nòm mulak. Nòm Rik Nak lah Allah napèrhéj kenèmbek, bok tok mèk-mok ilok-ilok pon rik napèrhéj tanpe Rik Nak. Gah nak lah rik èg-og nèsgos ma kenèmbek perènhéj Eh, dak nèsgos Eh nak naꞌog chènlakh ma kenèmbek sènꞌòy. Chènlakh nak bedeyãr ma kelòj rèhngah, dak rèhngah nak tok dapad namtèrped eh.
Dak nalãj lah néy sènꞌòy rik Allah natèrꞌèn, kenëh eh Yohanès. Yohanès nalãj untok namꞌèg-oglèkh ma sènꞌòy tentang Chènlakh nak, supaye kenèmbek sènꞌòy mukeyòkh gah eh nak bok mupechaye ma Chènlakh nak. Rik Yohanès nak kedak lah Chènlakh nak, tapik nanak had nalãj untok namꞌèg-oglèkh tentang Chènlakh nak. Chènlakh rik kènmën hòj namlèj-lãj ma duniak untok namchelakh ma kenèmbek sènꞌòy.
Rik kenëh Eh Gah nak hòj mok èn duniak. Dak yab Allah napèrhéj duniak doh nòm Rik Nak, tapik sènꞌòy èn duniak doh tok umkèlnal ma Rik Nak. Nanak nalãj ma tèk milik rik Eh, tapik sènꞌòy kaum rik Eh umjèk ma Rik Nak. Tapik mok keꞌjèk sènꞌòy rik umbeterime bok umpechaye ma Rik Nak. Dak Nanak naꞌog ma umnak kenèmbek hak untok mujadik kuwòt Allah. Chare umjadik kuwòt Allah nak kedak nòm jenòm sènꞌòy gerèk èn duniak doh, bok kedak lah nòm enampèk atòw nènchèn sènꞌòy. Tapik Allah irik najadik ma umnak kuwòt Eh.
Rik kenëh Eh Gah nak hòj najadik sènꞌòy dak nagel samak èk. Jadik èk hòj ènéh ma kuwase ròb renayak Eh; Rik Nak rayak bok bekuwase sebab Rik Nak Kuwòt tungal Apak. Dak Rik Nak napèrnéh kenèmbek rik kènmën tentang Allah bok kenèmbek nèjméj hup Eh ma èk.
Bil Yohanès Pembaptis naꞌèg-oglèkh ma sènꞌòy tentang Rik Nak, nanak naꞌèh-éh nòm kuy kènwad eh, “Udoh lah iRik Eh, rik yék ichal hatòp ma nyob: Rik Nak nalãj nòm kerek yék, tapik Nanak lebéh rayak nòm yék, sebab Nanak hòj mok nèng-nèng, èn tèk-tik yék tok mèk-mok.”
Sebab nèjméj hup Eh rik beduyon-duyon, Nanak sejèkh-serajèkh nateꞌèl méj ma èk kenèmbek. Nòm Musa, Allah naꞌog Hukom Tuhan ma èk. Tapik nòm Yèsus Kristus, Allah hòj napèrnéh ma èk nèjméj hup Eh bok kenèmbek ilok rik kènmën. Tok mèk-mok chok-chok pon rik pernah nanéh ma Allah, had Kuwòt tungal rik Allah. Rik Nak pon Allah, dak Rik Nak lah rik paléng tilok ma Apak. Dak Rik Nak hòj napèrnéh Allah ma èk.


Bil nak mèn pemimpin sènꞌòy Yahudi èn kote Yèrusalèm umꞌor ma maròp-maròp imam ròb sènꞌòy Lèwi (rik umkerèꞌjak èn Dékh Tuhan) supaye muwèk bok mutanyak ma Yohanès, “Chok ihãk doh?”
Dak Yohanès nak nasaꞌod kemën ma umnak bok nachal tèꞌlalah: “Yék kedak Mèsias rik Allah napèrhod nak.”
Jadik umnak umtanyak ma rik nak, “Kalòw gerèk nak, dak chok ihãk doh wèl? Ke hãk doh nabi Èliya?”
Yohanès nasaꞌod, “Hõy.”
Dak umnak umtanyak wèl, “Ke hãk doh rik bargah èn Hukom Tuhan, Nabi Rayak rik akal namlãj?”
Dak nanak nasaꞌod, “Hõy.”
Sèj-sòj eh nak umnak umtanyak ma rik nak, “Jadik chok ihãk doh? Tulong oglèkh lah ma kandék, supaye kandék boléh kimꞌoglèkh ma sènꞌòy rik èr-or kandék kimlãj ma doh! Ilok hamchal tentang rik ma rik hãh?”
Dak anak Yohanès nasaꞌod, “Yék lah kuy rik beꞌèh-éh èn pantil gurun, ‘Gerèk nyob sèrjèkh nòng bil rajak namlãj, puꞌdoh tabéh lah hup nyob untok Tuhan!’” Gerèk nak lah nabi Yèsaya naramal manah tòp.
Dak sènꞌòy rik mèn Parisi umtèrꞌèn nak umtanyak ma Yohanès, “Jadik kalòw hãk nak kedak Mèsias, bok kedak nabi Èliya atòw pon Nabi rik Musa naramal nak, bok nahey hãk habebaptis ma sènꞌòy?”
Yohanès nasaꞌod, “Yék doh had ibaptis ma sènꞌòy nòm òng. Tapik mok èn anuh, èn gagid nyob nak, néy Sènꞌòy rik tok nyob kèlnal. Rik Nak lah rik nalãj nòm kerek yék. Rik Nak jerok lebéh rayak nòm yék, bok yék doh tok behakak imtèg-teg talik kasod Eh pon.”
Kenèmbek nak nabelakuk èn kampong Bètania èn lantiw Òng Tibok Yordan, tempad Yohanès nabebaptis ma sènꞌòy.

Dak is jakal eh nak, Yohanès nanéh Yèsus nalèj-lãj ma rik nak, dak Yohanès nachal ma sènꞌòy èn anak, “Néh lah! Rik Nak lah Kuwòt Kambikh Biri Allah rik natèrhõy ma dose duniak! Udoh lah iRik Eh, rik yék hòj ichal ma nyob: ‘Rik Nak nalãj nòm kerek yék, tapik Nanak lebéh rayak nòm yék, sebab Nanak hòj mok nèng-nèng èn tèk-tik yék tok mèk-mok.’ Hatòp nak yék pon tok ilèng-lèkh Rik Nak chok. Tapik Allah natèrꞌèn ma yék untok imbaptis ma sènꞌòy Israꞌèl nòm òng, supaye umnak dapad mukenal ma Rik Nak.”
Dak Yohanès naꞌèg-oglèkh ma umnak ilok rik hòj nanéh bok nakeyòkh, “Nèng-nèng tòp yék tèk-tik tok ikèlnal Rik Nak chok. Tapik Allah, rik natèrꞌèn ma yék untok imbaptis ma sènꞌòy nòm òng, hòj nachal ma yék gerèk doh: ‘Hãk akal hanéh Ruway Yék nataw dak nakabed ma néy Sènꞌòy. Nanak lah irik akal nabaptis ma sènꞌòy nòm Ruway Kudus.’”
Yohanès nachal wèl, “Dak yék hòj inéh hal nak! Yék inéh Ruway Kudus nataw nòm langid gerèk chèp kukur nabekabed èn balikh Rik Nak. Jadik yék hòj inéh dak iꞌoglèkh ma nyob, mémang kemën Nanak nak Kuwòt Allah.”

Dak is jakal eh nak, Yohanès mok èn anak wèl natèd-ted samak nar hèhoh eh. Bil Yohanès nanéh Yèsus nahawul nòm nak, nanak nachal, “Néh lah! Rik Nak Kuwòt Kambikh Biri Allah!”
Bil wènar nak wèkeyòkh ma nèlchal Yohanès nak, dak sejèkh wèhoh ma Yèsus. Yèsus nawãr dak nanéh ma wènar nak wèhèh-hoh ma Rik Nak, dak Nanak natanyak, “Ilok kaꞌan kèk?”
Dak wènar nak wètanyak, “Rabbi, èn lok Hãk hagel?” (Èn kuy sènꞌòy Yahudi “Rabbi” nak bemaksod “Guruk.”)
Dak Yèsus nasaꞌod, “Jok lah, bok akal kaꞌan néh.”
Jadik wènar nak pon wèhoh dak wènéh èn lok tempad Yèsus nagel. Bil nak kirak-kirak pukol empad lèngꞌakh. Dak is nak wènar nak pon wègel èn anak samak Yèsus.
Néy sènꞌòy nòm wènar rik kèngyòkh ma nèlchal Yohanès bok wèhoh ma Yèsus naꞌtèk kenëh eh Andréas. Rik nak pek Simon Pètrus. Andréas nak nawèk hès natèrbuk ma kelok eh Simon, dak nachal ma rik nak, “Yar hòj yatèrbuk ma Mèsias!” (“Mèsias” nak maksod eh samak ma “Kristus,” Rajak rik Allah napèrhod.) Pas nak Andréas naꞌéd Simon nak ma Yèsus.
Dak Yèsus nanéh ma Simon dak nachal, “Hãk Simon kuwòt Yohanès, tapik Yék itèrjal kenëh hãk Képas.” (“Képas” nak èn kuy sènꞌòy Yahudi maksod eh samak ma kenëh Yunani eh “Pètrus,” rik bemaksod “batuk.”)
Dak ma is jakal eh nak wèl, Yèsus nachèn namwèk ma tèk Galiliya. Yèsus natèrbuk ma néy sènꞌòy rik bekenëh Pilipus. Pilipus nak nabeꞌasal nòm kote Bètsayda, samak gerèk Andréas ròb Pètrus naꞌtèk. Dak Yèsus nachal ma rik nak, “Jok lah, hoh ma Yék!” Pas nak Pilipus nawèk natèrbuk ma kéy eh Natanaꞌèl dak nachal, “Kandék hòj kitèrbuk ma Sènꞌòy rik Musa naramal èn Hukom Tuhan nak, bok mèn nabi hòj umramal èn kelòj Kitab! Nanak nak Yèsus, kuwòt Yusop nòm kampong Nasarèt.”
Tapik Natanaꞌèl nak nachal ma Pilipus, “Nasarèt?! Tok mèk-mok ilok-ilok pon rik méj nòm kampong nak!”
Dak Pilipus nasaꞌod, “Jok lah bok néh mad rik hãh!”
Bil Yèsus nanéh ma Natanaꞌèl nalèj-lãj ma Rik Nak, Nanak nachal tentang Natanaꞌèl nak, “Néh lah, nanak nak sènꞌòy Israꞌèl rik kènmën; tok mungkin nambesèꞌlok.”
Natanaꞌèl natanyak ma Yèsus, “Yãng, gerèk lok Hãk hakenal ma yék?”
Dak Yèsus nasaꞌod, “Yék hòj inéh ma hãk bil hagèl-gel èn kèd jehuk kèlpong nak, èn tèk-tik Pilipus tok nakèw-kòw ma hãk.”
Dak Natanaꞌèl nakèdjed bok nachal ma Yèsus, “Guruk, Hãk lah Kuwòt Allah! Bok Hãk lah Rajak kaum Israꞌèl!”
Yèsus nachal ma rik nak, “Hãk hòj hapechaye sebab Yék ichal Yék inéh ma hãk bil hagèl-gel èn kèd jehuk kèlpong naꞌtèk. Tapik hãk akal hanéh hal-hal rik jerok lebéh rayak nòm nak!” Yèsus nachal wèl, “Kemën-kemën Yék ichal ma nyob, nyob akal nyob néh langid napa-pog, dak mèn melaykat Allah umꞌòj umtaw nòm Yék, Sènꞌòy Nòm Sorga.”

Слухаць Yohanès 1