Sáni Lúkasï 18
18
Uarhiti tsînti ka juramutiri uantantskua
1Kát'u Jesusi uantantskua terukutarantskua ma aiankuaspti; jurhentaani uékani eskaksï no kuatant'a'parini méntku ísï uantamukukorheni. 2Ka arhiaspti: “Iretarhu ma, kuáp'iri ma irekaspti enka Diósïni no chérhempka ka enka nót'u janhanharhpempka. 3Imani iretarhut'u uarhiti tsînti ma irekaxapti enka arhirperata ma kámani jápka, ka niraspti kuáp'iri arhini eska jarhuatapirinka imani jinkuni enkaksï arhirperani jápka. 4Kuáp'iri ióni ísku kurhach'asptia, k'óru tátsekua ísï eratsespti: ‘Na uék'ini Diósïni no chérhek'a ka nót'uni kaxumpitini, 5ka jimpokarini inte uarhiti tsînti méntku ách'akuxaka, kuáp'eaka, eska nóteru méntku junkuani jauaka ka tekantskuarini k'amak'utacheni.’ ” 6Ka Acha ísï uantasptiteru: “Kuáp'iri nómpemaru arisïsï arhini jápti. 7¿Ka anti jíani Diósï imeri erakukatechantu no kuap'eaua, imechani enkaksï chúrekua ka jurhiakua uekuk'a? ¿Anti erokataraua? 8Jíksïni arhisïnka eska no erokatarauaka, eska kuáp'eauaka. Ka k'óru enka jamperi acheti Uáp'a parhakpeni junkuaaka ¿Arhik'its'ï eska jakak'unhani janhaakateru?”
Fariseoueri ka tumina tánatiri uantantskua
9Jesusi máteru uantantskua aiankuaspti imechani enkaksï sési ampe úni uantakorhek'a ka jiniksï máteruechani no xénhchaani: 10“Tsimanksï niraspti tiósïo uantamukukorheni, ma fariseo, ka máteru tumina Roma axakua tánati. 11Fariseo, anhantetini, ísï uantamukukorhexapti: ‘Diósï, diósmaiamukuakini arhixaka enkani ji no inteni jáxeka, enkaksï sïpak'urheka, ka nósesi kámpitini, ka ísku jántini, ka nót'uni inte tumina tánatini jásïska. 12Ji tsimani jurhia k'arhinta jarhasïnka iúmu tsimani jurhia jimpo ka témpeni jima iámueri íntspentasïnka enkani xáni antak'a.’ 13Ka tumina tánati iauani tátsepani uératini no jamperi tekaasïrempti erancheni, sánteru uánhesïrempti, ka uantasïrempti: ‘¡Tata Diósï, p'amok'urini jínteni enkani k'amanharhintstika!’ 14Arhixakaksïni eska inte tumina tánati kaxumpentatini niántaskia, ka fariseo mák'ueni pakarasti. Jimpoka ne enka k'éramakorheaka, ísku ampeni exenhaaka; ka ima enka kétsekua uérak'a, ima k'éri amperanhaati.”
Jesusi sapichani úch'akuraasti
(Mt 19.13-15; Mk 10.13-16)
15Ístuksï Jesusini tataka ka nanaka sapirhatichani pákuasïrempti, eska ima p'áts'ïkuapirinka; ka enkaksï jurhenkorhericha exepka, xukaasptiksï imechani enkaksï sapichani páani jápka. 16Jimak'ani Jesusi arhiaspti: “Jurak'uts'ïni sapirhaticha antarherani, ásï p'ínkua je, jimpoka Diósïri irechekua imecheriska ne enkaksï inteni járhaka. 17Sési jimpoksïni arhixaka eska ne enka Diósïri irechekuani no ísï jiókorhek'a eska sapi ma na jiókorhek'a ima Diósïri irechekuarhu no jatanheati.”
Acheti jatsikorheri ma Jesusini jinkuni uantontskorhesti
(Mt 19.16-30; Mk 10.17-31)
18Ka tátsekua ireteri urhets'ïkuri ma Jesusini kurhamarhespti arhiparini: “Ampakiti jurhentpiri ¿Néna uétarhesïnki eskani jámaaka, eskani ísï jámani jít'uni méntkisï anapu irekua intsïnhaaka?” 19Jesusi arhispti: “¿Antirinisï arhik'i eskani ampakitiska? Diósïk'usï ampakititi. 20Míteaskaria juramukuechani: ‘Ásï ísku jánti úkorhe, ásï uántikpe, ásï sïpa, ásï nemani chkuántirakua jimpo nósesi úku, ka chéti táteni ka chéti nánteni janhanharhi.’ ” 21Ka ima urhets'ïkuri arhispti: “Tumpirinitkini iámu inteni ampe ísï úxaka.” 22Enka Jesusi ísï kurhach'apka, arhispti: “Ma ampeterkuri no úxaka: Atarantsï iámu ampe enkari xáni jatsikorheka ka no jatsikorherichani íntsaa. Ísïri jámani auantarhu jatsikorhekua p'iuaka. Ka jimak'ani k'órurini ju chúxapunia.” 23K'óru enka ísï kurhach'apka, kánekua mískorhespti, jimpoka kánekua jatsikorherispka.
24Enka Jesusi ísï exepka, uantaspti: “¡Kánekua ts'unhapesti eskaksï jatsikorhericha Diósïri irechekuarhu inchaaka! 25Kameiu ma, p'ikukueri p'orhoch'akuarhu sánteru no ts'unhapekua jimpo parhich'akuaati, eska jatsikorheri ma Diósïri irechekuarhu inchani.” 26Ima enkaksï kurhach'ani jápka, kurhankorhesptiksï: “¿Ka jimak'ani néchkasï p'ímutakorhent'aia?” 27Jesusi arhiaspti: “Ima ampe enkaksï parhakpeni anapuecha no úk'a úni, Diósï k'óru úsïnti.” 28Pédru arhispti: “Acha, jucha iámentu ampe jurak'uska, ka chúxapuskaksïni.”
29Ima arhiaspti: “Sési jimpoksïni arhixaka eska ne enka Diósïri irechekua jimpo k'umanchekua jurak'uka o témpani o erachi jémpechani o tátjempani ka amampani, o uáp'echani jurak'uaka, 30íni jurhiatekuechani sánteru uánekua ampe p'iuati, ka imani jurhiatekuechani jimpo enkaksï jurhani jaka méntku ísï anapu tsípekua p'iuati.”
Jesusi tanimu úni jámani uantanukorhesti
(Mt 20.17-19; Mk 10.32-34)
31Tátsekua Jesusi témpeni tsimani jurhenkorherichani támu páaspti, ka arhiaspti: “Jerusalenichi niraxaka, jima enka iámu ampe úkorheaka eskaksï Diósïri uantaricha acheti Uáp'eri ampe na karaka. 32Jimpokaksï uérakua iretichani intsïnharhitant'a'aka, ka teresmarhuatiksï, útakuatiksï ka t'uánharhikuatiksï. 33K'uikirheatiksï ka uántikuatiksï; k'óru tanimu jurhia jimpo tsíntaati.”
34Imaksï nómpema kurhankuspti, ka nót'uksï mítespti ampesï arhiani jápi, jimpokaksï imani ampe no kurhankusïrempka.
Jesusi Jerico anapu ma pátenharhi ampakerantasti
(Mt 20.29-34; Mk 10.46-52)
35Enka Jesusi Jeriko niárani jápkia, pátenharhi ma xanhari jimpo uaxakatini tumina kurhak'orhexapti, 36ka enka kurhapka eska uánekua nitamanhaxapka, kurhankorhespti ampesï úkorheni jápi, 37ka aiankunhaspti eska Jesusi Nasareti anapusï jimesï nitamani jápka, 38Ka ima uinhachaparini uantaspti:
–¡Jesusi, Dabidi Uáp'a, p'amok'urini!
39Ima enkaksï urhepani jápka xukasïremptiksï eska ísku japirinka, ka ima sánteru uinhachasïrempti:
–¡Dabidi Uáp'a, p'amok'urini!
40Jesusi p'ínkukorhespti ka arhiaspti eskaksï antarheterapirinka. Enka na antarherani jápka kurhamarhespti:
41–¿Amperi uéksïnki?
Ka pátenharhi arhispti:
–Acha, éskantani uéksïnka.
42Jesusi arhispti:
–¡Éskantsïchkia! Chéti jakak'ukua jimpori ampakeranhantaskia.
43Pátenharhi éskantapaspti, ka Diósïni k'éri ampe arhiparini chúxapaspti. Ka iámentu enkaksï xáni exepka, imat'uksï uénaspti Diósïni k'éri ampe arhini.
المحددات الحالية:
Sáni Lúkasï 18: DKPJ
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia en P´urhépecha, Michoacán, México © Sociedad Bíblica de México, A.C.
