Sáni Lúkasï 17
17
Kamanharhintskua tantoch'pesïnti
(Mt 18.6-7,21-22; Mk 9.42)
1Jesusi imeri jurhenkorherichani arhiaspti: “No úati nósesi jásï ampe no jurhani, k'óru ¡Che ima enka ísï niátatarpek'a! 2Sánteru sésipirinti eska tsakapu urhuratarakua ma jóch'akunhapirinka ka k'éri japuntarhu k'uanimanhani, eska íni ma isï sapini nósesi niátatarani. 3¡Xéparini je!”
“Eka chéti erachi k'amanharhint'aska, xuka; ka enka imeri jánkua mót'akuska, púakuntsï. 4Na uék'ikini ma jurhiatekua jimpok'u iúmu tsimani xanhari nósesi ampe úcheni, ka iúmu tsimani xanharikini jurhani arhini: ‘Nóteruni ísï jámaakia; púakuntaakari.’ ”
Jakak'ukua uinhapesti
5Uantakua párichaksï Achani arhispti:
–Sánteruts'ïni jakak'utara.
6Acha arhiaspti:
–Mostaseri tskípuentku enkats'ï úpirinka jakak'uni, úpirinkats'ï p'ukurini ma arhini: Uétsentsï ka k'éri japuntarhu mótse arhini, ka p'ukuriksïni kurhach'apirinti.
Jántspiriri úkua
7“Enka chári jántspirini ma, juátarhu junkuarinia ka tarherinia ka karichichani ónhantaatinia, ¿Anti arhisïnits'ï incharantani sáni imani urheta t'irerani? 8Nómpe cháts'ï arhisïnka: ‘Mórhekorhentsï kókuani ka jupak'u ka úmachentsïrini, ka jatsiracherini ka itsït'urini jatsirache. Ka tátsekuari úakia t'u arhani.’ 9Ka nót'uts'ï diósïmaiamukua arhintasïnka enka sési úka eskats'ï na juramukupka. 10Chát'uts'ï ísï, enkats'ï na iámu ampe úakia enkaksïni Diósï úraka, uantaakats'ï: ‘Jántspiri nómpemarueskachi, jimpokachi imantkusï úka enkachi úranhapka.’ ”
Jesusi témpeni xúta jukarichani ampakerantaasti
11Jerusaleni níntani jámani, Jesusi Samaria ka Galilea ísï parhiakuntaspti.
12Ka ireta sapichurhu ma niáraspti, ka jimaksï témpeni acheti xúta jukaricha uéakuspti kúmani, iauani jatinksï 13uinhachaparini arhispti:
–¡Jesusi, Jurhentpiri, p'amok'uts'ïni!
14Enka Jesusi exeapka, arhiaspti:
–Tátechani jinkuni ni je.
Tátecha jinkuni nirani jámanksï ampakentaspti. 15Ka ima ma ísï enka exekorhepka eska ampakentaspka, k'uanhatsentaspti uinhachaparini Diósïni k'éri ampe arhiparini, 16ka Jesusini tinkuixurhikuspti, kápatsentaspti diósïmaiamu arhintani. Ima acheti Samaria anapuespti. 17Jesusi uantaspti:
–¿Anti nóksï témpenispki enkaksï ampakentaka? ¿Máteru iúmu t'ámuksï na úskia? 18¿Antisï uérakua iretik'u k'uanhatsentsï Diósïni k'éri ampe arhini?
19Ka achetini arhispti:
–Jauara ka ni níntani chéti jakak'ukuakini ampakerantasti.
Néna jánhaskorheski Diósïri irechekuarhu
(Mt 24.23-28,36-41)
20Fariseouechaksï Jesusini kurhamarhespti Diósïri irechekua na jatini janopirini, ka ima arhiaspti:
–Nónema mítetini jauati enka Diósïri irechekua janoaka. 21Nónema úati uantani: Ixu jarhasti o jimini jarhasti; jimpoka Diósïri irechekua chánksïni jinkuni jarhaska.
22Ka imeri jurhenkorherichani arhiaspti:
–Niáraatiksï jurhiatecha enkats'ï náuek'i ma jurhiatekuak'u acheti Uáp'ani uékaaka exeni, ka nóts'ï exeaka. 23Máruksï uantaati: Ixu jarhasti, o jimini jarhasti; k'óru ásï ni je, ka ásït'u chúxapaa je. 24Jimpoka jimak'ani enka acheti Uáp'a junkuaaka, piritakueni junkuaati, enka iámu t'íkjaxek'a, 25k'óru acheti Uáp'a urheta jatsisti nósesi ampe úkorhenchani ka eskaksï urheta íni jurhiatekua anapuecha no xénhchani kámaaka. 26Ísï eska na úkorhepka jimak'ani enka Noe irekani jápka, mák'uentu úkorheati enka acheti Uáp'a junkuaaka. 27Jukari t'irenhasïrempti, ka kauinhani ka tempuchanhani jiák'ani jamperi enka Noe k'éri icharhutarhu jatapka, enka iurhentpepka ka iámu uarhimenhani. 28Mák'ueni úkorhespti jiák'ani ísï enka Lóti irekapka: Jukari t'irenhasïrempti ka kauinhani, ka ampe ataranhantani ka ampe piánhani ka tarhenhani ka k'umanchekuecha únhani; 29ka enka Lóti Sodoma uéakupka, auantarhu uératini chpíri uekorhespti janhajanhak'uparini ka iámu uarhinhaspti. 30Ísï úkorheati enka acheti Uáp'a xarharaaka.
31“Ima jurhiatekua, ne enka taiats'ïtakatarhu jámani jauaka ka imeri kánkorhekua ampe k'umanchekuarhu incharini jatsini, ásï kétse ampe petakorheni; ka ásï nínte chénjempo ne enka juátarhu jámani jarhak'a. 32Míantsï je Lótiri uarhitini. 33Ne enka jánkorhent'aska tsípekuani patsakorheni, sánteru sóntku tsîtaati, k'óru íoni sési jauati ne enka tsípekuani tsîtaaka. 34Aiankuxakaksïni eska imani chúrekua, náuek'i márku k'uínhani jarhani ma pánhantaati ka ma jurak'unhaati. 35Ka enkaksï nanachicha márku urhuni jauaka, ma pánhantaati ka ma jurak'unhaati.”
37Jimak'anksï kurhamarhespti:
–¿Acha, nani ísï úkorhea?
Ka ima arhiaspti:
–Náni enka uarhiri jántentaaka k'uákichaksï jima tánkorheati.
المحددات الحالية:
Sáni Lúkasï 17: DKPJ
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia en P´urhépecha, Michoacán, México © Sociedad Bíblica de México, A.C.
