على التوازي
28
زیندووبوونەوەی عیسا
1دوای شەممە لە بەرەبەیانی یەكەم ڕۆژی هەفتەدا، مریەمی مەجدەلی و مریەمەكەی دیكە هاتن تەماشای گۆڕەكە بكەن.
2لەناكاو بوومەلەرزەیەكی بەهێز ڕوویدا، چونكە فریشتەیەكی یەزدان لە ئاسمانەوە هاتە خوارەوە، چوو بەردەكەی گلۆر كردەوە و لەسەری دانیشت. 3ڕوخساری وەك بروسكە وابوو، جلەكانی وەك بەفر سپی بوون. 4پاسەوانەكان لە ترسی ئەو لەرزین و وەك مردوویان لێ هات.
5بەڵام فریشتەكە بە ژنەكانی گوت: «مەترسن، چونكە دەزانم بە شوێن عیسای لەخاچدراودا دەگەڕێن. 6ئەو لێرە نییە، وەك خۆی فەرمووی، هەستێنراوەتەوە. وەرن سەیری ئەو شوێنە بكەن كە لێی درێژكرابوو. 7خێرا بڕۆن و بە قوتابییەكانی بڵێن: ”ئەو لەنێو مردوواندا هەستێنراوەتەوە، پێش ئێوە دەچێتە جەلیل، لەوێ دەیبینن.“ ئەوەتا پێم گوتن.»
8ئەوانیش خێرا لەلای گۆڕەكە ڕۆیشتن، بە ترس و خۆشییەكی گەورەوە ڕایانكرد، تاوەكو هەواڵ بدەنە قوتابییەكانی. 9ئەوە بوو عیسا تووشیان هات: «سڵاو!» ئەمانیش چوونە پێشەوە، پێی عیسایان گرت و كڕنۆشیان بۆ برد. 10عیسا پێی فەرموون: «مەترسن، بڕۆن بە باوەڕداران بڵێن با بچنە جەلیل، لەوێ دەمبینن.»
قسەی پاسەوانەكان
11كە دەڕۆیشتن، هەندێك لە پاسەوانەكان هاتنە ناو شار و ئەوەی ڕوویدابوو بۆ كاهینانی باڵایان گێڕایەوە. 12ئەوانیش لەگەڵ پیران كۆبوونەوە و ڕاوێژیان كرد، زیوێكی زۆریان دایە سەربازەكان و 13گوتیان: «بڵێن، ”كاتێك ئێمە خەوتبووین، قوتابییەكانی لە شەودا هاتن و دزییان.“ 14ئەگەر ئەمەش لەلای فەرمانڕەوا بیسترا، ئەوا ڕازی دەكەین و لە گرفتەكە دەتانپارێزین.» 15ئەوانیش زیوەكەیان وەرگرت و چۆن فێركران، وایانكرد، ئیتر ئەم قسەیە هەتا ئەمڕۆش لەناو جولەكەدا بڵاو بووەتەوە.
دەركەوتنی عیسا بۆ قوتابییەكان
16ئیتر یازدە قوتابییەكە چوونە جەلیل، بۆ ئەو كێوەی عیسا فەرمانی پێدابوون. 17كاتێك بینییان كڕنۆشیان بۆ برد، بەڵام هەندێكیان گومانیان كرد. 18عیسا لێیان نزیك بووەوە و قسەی بۆ كردن: «هەموو دەسەڵاتێكم لە ئاسمان و لەسەر زەوی دراوەتێ. 19كەواتە بڕۆن، هەموو نەتەوەكان بكەنە قوتابی، بە ناوی باوك و كوڕ و ڕۆحی پیرۆز لە ئاویان هەڵبكێشن، 20فێریان بكەن با كار بكەن بە هەموو ئەو شتانەی كە ڕامسپاردوون. دڵنیابن من هەموو ڕۆژێك لەگەڵتانم، هەتا كۆتایی زەمان.»