ST. MARK 7
7
1Kepemahwunjeëdewug dush egewh Phariseeg, kuhya ahnind oozhebeëga‐wenenewug, kepenaunzekahwahwaud enewh Jesusun, Jerusaleming kepeöonjebahwug.
2Uhpe dush wuhyahbuhmahwaud ahnind ookekenooahmahgunun cheäumwahnid bahquazhegun pwah‐kesebegeneenjenid, kewuhsittahwanduhmoog.
3Egewh muh Phariseeg, kuhya kuhkenuh egewh Jewyug kahween wesenesewug, bahmah atuh ayahpe kahkahsebegeneenjewaud, guhnuhwanduhmoowaud enewh ookuhgequawinewaun egewh katezejig.
4Kuhya uhpe wanjebahwahjin emuh ahtaundewining, kahween wesenesewug, bahmah atuh kahkesebegeneenjewaud. Kuhya dush nebewah pakaunukin oodoodahpenahnahwah cheguhnuhwanduhmoowaud, me enewh chekesebegenuhmoowaud menequahjegunun, kuhya ahkeekoon, kuhya oozahwahbik‐oonahgunun, kuhya nebahgun‐ahkoon.
5Medush kekuhgwajemegood enewh Phariseen, kuhya enewh oozhebeëga‐wenenewun, Ahnishwin ezhewabezesigwah kekekenooahmahgunug debishkoo akedoomahguk ookuhgequawinewah egewh katezejig, wesenewaud dush pwah‐kesebegeneenjewaud?
6Oogenuhquatuhwaun dush oo‐oo keënaud, Kagate quuhyuk keäunwahjega owh Esaias kenuhwah anuhmeäkahzooyag keduhzhemenag, oo‐oo azhebeëgahdag, Mahmig ahnishenahbag nepeshegandahgooëgoog emuh oodoonewaung, emuh dush oodaëwaung wahsuh ninduhyenanemegoog.
7Ahneshah suh nindoojecheengwuhnetahgoog, enenewug ookuhgequawinewaun azhekuhgequawaud.
8Ewh suh wabenuhmag ookuhgequawinun owh Kesha‐Muhnedoo, keguhnuhwandahnahwah ookuhgequawinewaun egewh enenewug, me ewh chekesebegenindwah egewh ahkeekoog kuhya menequahjegunun: nebewah dush oonoo denoowun kedezhechegam.
9Oo‐oo kuhya oogeënaun, Kemenoojegam enunga bahnahjetooyag ookuhgequawin owh Kesha‐Muhnedoo, cheoonjeguhnahwanduhmag tebenuhwa kekuhgequawinewaun.
10Moses dush keëkedoo, Kechetwahwanim koos kuhya keguh: kuhya, Owh dush maje‐guhnoonaud enewh oosun gamuh enewh oogeen, ahbetakummig tahneboo:
11Kenuhwah dush kedekedoom, Keshpin enene oo‐oo enaud enewh oosun gamuh enewh oogeen, Korban, (mesuh aduhming, meegewawin,) ewh kagemeenenaunbaun, kahween oogahmeenahseen.
12Kah dush keduhyenanemahsewah kuhnuhga gagoo chemeenoo‐doodahwaud enewh oosun gamuh enewh oogeen;
13Kebahnahjetoonahwah suh oodekedoowin owh Kesha‐Muhnedoo, kekuhgequawinewaun oonje; Keche nebewah oonoo denoowun kedezhechegam.
14Uhpe dush kahnundoomaud kuhkenuh enewh ahnishenahban, oo‐oo keënaud, Bezindahweshig kenuhwah kuhkenuh, kuhya nesittootuhmook:
15Kahween gagoo ahgwahjuheëeng atag, kishpin peendegamahguk emuh peenjenah weyowing tahoonjekahgwahnesuggeähse owh enene: enewh atuh wanjesahguhummoomahgukkin emuh ooweyowing, me enewh wenishkahgood owh enene.
16Owh wutahwuggahgwan chebezindung, mahnoo tahbezindum.
17Uhpe dush kahpeendegad emuh wegewauming, kahnuhguhnaud enewh ahnishenahban, oogeguhgwajemegoon enewh ookekenooahmahgunun ewh azhnesittootahgwuk ewh ahwajegun.
18Oo‐oo dush oodenaun, Kenuhwah dush kah nuh oo‐oo menik kenessittootunsenahwah? Kah nuh kekekanduhsenahwah, ewh ahgwahjuhyeëeng atag kishpin peenjenuh peendegamahguk, kahween oowenishkahgooseen owh enene;
19Kah muh ezhahmahgussenoon emuh oodaïng, me atuh emuh oomesuhdaung, kuhya mahjahmahgudene uhpe ahgwahjeeng azhahjin, me ewh azheshahbooshkahgood kuhkenuh meejim?
20Keëkedoo dush, Ewh dush ween pahsahgezekahgood owh enene, mesuh ewh wahneëgood owh enene.
21Peenjenuh muh, enenewug ooodaëwaung, oonjebahmahgudenewun enewh mujjeënanduhmoowinun, pezhegwahdezewinun, nesedewinun.
22Kemoodezewinun, oonzaum‐anduhmoowin, mujje-doodahdewin, kuhkuhyanezewin, pezhegwahdanduhmoowin, majeëzhewabuk ooshkinzhegoomah, mujje‐kezhwawin, menahdanemoowin, kuhkebahdezewin:
23Kuhkenuh oonoo mujje‐uhyeëen emuh peenjenuh oonjebahmahgudoon, me oonoo wahneëgoojin owh enene.
24Me dush emuh keoonjepuhsegweed, keëzhemahjaud dush emuh uhkeeng cheguhyeëe Tyre kuhya Sidon anduhgoog, wegewauming kepeendega, kah dush keënanduhse ahweyah chekekandung: kahween dush oogekushketooseen chekahzood.
25Pazhik muh equawun, oodahnisun agahsheënejin kekishkahwahnid enewh wahnezenejin muhnedoon, kenoonduhmoon azhewabezid, ooogepenaunzekahgoon dush keähpuggezoonid emuh oosittaung:
26Mahyuggezegoobun suh wah‐owh equa, kuhya kedebandahgoozid emuh Syropheniciaïng, oogenundoodahmahgoon dush chesahgeche‐wabenaud enewh mujje‐muhnedoon emuh oodahnesing abenejin.
27Jesus dush oo‐oo oogeënaun, Mahnoo netum tahtabeseneähwug egewh wanejahnesemindjig; kah muh oonesheshinsenoon chemuhkummindwah enewh oobuhquazhegunemewaun egewh wanejahnesemindjig, cheähshummindwah dush egewh uhnemoonsug.
28Kenuhquatum dush owh equa, oo‐oo dush keënaud, Aahe, Tabaningayun, pooch kuhya egewh uhnemoonsug ahnaume‐uhdoopoowining ayahjig oomeejenahwah oopewunjegunene enewh wanejahneseminjin.
29Oo‐oo dush oogeënaun enewh equawun, Oo‐oo keëkedooyun, oonjekewan; oosahgejenahwashkahwaun suh owh mujje‐muhnedoo enewh kedahnisun.
30Uhpe dush oowegewauming anetuhgwishing oogemekahwaun enewh mujje‐muhnedoon kesahgejenahwash-kahwahnid, kuhya nebahguning shingeshinenid oodahnun.
31Menuhwah dush, emuh cheguhyuheeng Tyre kuhya Sidon oonjemahjaud, keëzhah emuh Galilee kechegummeeng, keshahbooshkung dush Decapolis adumming uhkee.
32Kuhya dush oopetahwahwaun kakebeshanejin enenewun, natuh‐kekedoosenegoon; oopahgoosanemahwaun dush chetaungenahnid.
33Puhkayeëe oogeëzhewenaun anduhzhe‐ahyahsenenid enewh waqueenoonejin, oogeähtahwaun dush ooneenj emuh ootuhwuggahning, kuhya dush kesikood, oogetaungenah-mahwaun oodanuhnewene;
34Kezhegoong dush keënahbid, keöoduhpunahmoo, oo‐oo dush oodenaun, Ephphata, me oo‐oo waheduhming, pahkahkooshkaun.
35Bahbega dush kepahkahkooshkahnewun enewh ootuhwugun, kuhya dush keähbahegahdane oodanuhnewh, kuhya dush kepuhgukketahgooze kahkekedood.
36Oogeäungwahmemaun dush kuhnuhga ahweyah cheweendahmahwahsigwah: me ewh ahwundish ahwahshema, kekeche‐suhswa‐yahjemoonid;
37Ahpeche dush kekeche‐mahmahkahdanduhmoon, oo‐oo dush keëkedoonid, Keche‐wahweengaze kuhkenuh gagoo ezhechegad: oonoonduhmooäun enewh kakebeshanejin, kuhya dush oodezheäun enewh natuh‐kekedoosenegoon chekekedoonid.
المحددات الحالية:
ST. MARK 7: OTW
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
