लुका 18
18
रान्दि बेबाल रो नियाधिसको उदारन
1एअ्नि इसु चात्यागेलाइहेङ दिनाङ पारथाना पालिगोयाङ रो हारेस माचासु दोअ्तेङ गिपालि एसा दोअ्हि, 2“हिदिङ पुरता एअ्मि निया पाका हिघाखे। वा परमेस्वरहेङ बुङ माथिघाखे रो द्याङहेङ बुङ वास्ताङ मापाघाखे। 3इङकोङ पुरता एअ्मि रान्दि बेबाल बुङ हिघाखे। वा जेलाउ बुङ न्याधिसकोता हानितेङ दोअ्घाहि, ‘काङको झागारियाको रो काङको माझाता हिका झागारा मिलि पापि।’ 4हेन्जा दिनाथिकापा वा रान्दिको काथाङ माहिम्पिहि। कालाउ न्हुअ्सो वा मन मनता फोमपाहि, ‘का परमेस्वरहेङ बुङ माथिखा रो द्याङगेलाइहेङ बुङ वास्ताङ मापाखा! 5कालाउ इदोइ रान्दि कासेहेङ हेन्जाङ तु: पिनाङसिङ याको निया पापिलिगोयाङ। माकुनुते वा घुरिघुरि काङकोता लोतेङ कासेहेङ दोङ सान्तायावा।’”
6कालाउ आरोङ इसु दोअ्हि, “इङको दुरजन निया पाकाको काथा फोम पासु। 7एन्सा दोङ न्हिसिङ नितिमा परमेस्वरहेङ पारथाना पाकालाइ ताइको द्याङगेलाइहेङ वा निया मापाप्यावा कुनु? हाइ वा ताइ द्याङगेलाइहेङ मदत मापासिङ खाङतेङ खिनिङ ह्यावा कुनु? 8का नेलाइहेङ दोअ्ताङका, वा ताइ द्याङगेलाइहेङ मारफा निया पाप्यावा। कालाउ का द्याङको चान लोलाउ हाइ वा सुमिङता खान्धुर पाकालाइ निनावा?”
फरिसि रो पोत ल्होपाकाको उदारन
9ताइमिहेङ खिनिङ धरमाति फोम पाका रो बोमिहेङ हेला पाका द्याङगेलाइहेङ इसु उदारनको रुपता इस्का काथा दोअ्हि, 10“फरिसि रो लेबि न्हेमि परमेस्वरको थानता पारथाना पालि हानिहि। 11इङको फरिसि आसा ओसो जाअ्तेङ एसापा पारथाना पालि तेङहि, ‘परमेस्वर आबा, का नासेहेङ च्याबास पिखा; हाइपानु का बो द्याङगेलाइभाइपा दिअ्का रो बाइमान मान्थुघा। का कासबिरि बुङ पानाङ मान्थुघा। कालाउ का इङको लेबि द्याङभाइका बुङ मान्थुघा। 12का एअ् आथारता न्हेखेअ् म्हितुपाङ हिखा रो काङको निङका गोताङ थोकको ते भागको एअ् भाग नासेहेङ पिखा।’
13 “कालाउ लेबि द्याङ बुङ दुरेङ जाअ्तेङ स्वरगभारि खाङलि आट दोङ मापासिङ तुम्ता थेतेङ दोअ्हि, ‘परमेस्वर आबा, काभाइका पापिहेङ दाया पा!’” 14कालाउ इसु काथा दोपातेङ दोअ्हि, “का नेलाइहेङ दोअ्ताङका, इदोइ फरिसि खान्तेङ बुङ लेबि द्याङ परमेस्वरको नजरता धरमाति जेङतेङ ताइको साअ् घुरिहि। हाइदोनु जाइ ताइमिङहेङ बारका पालि खाङखे वा झाराङखान्तेङ म्हुयावा। कालाउ जाइ ताइमिहेङ म्हुइ पालि खाङखे वा झाराङखान्तेङ बारावा।”#मत्ति २३:१२; लुका १४:११
इसु जामालाइहेङ सहसाम्पा पिका
(मत्ति १९:१३-१५; मरकुस १०:१३-१६)
15एअ्नि द्याङगेलाइ ताइको जामालाइहेङ इसु ताइको खुर ताअ्तेङ सहसाम्पा प्याको दोअ्तेङ वाकोता चुमाहि। इदोइ तिङतेङ चात्यागेलाइ जामालाइको आबा आमाइहेङ हाकाराइहि। 16कालाउ इसु एम्बालाइहेङ काइतेङ दोअ्हि, “इदोइ जामालाइहेङ काङकोता लोलि पिसु रो एम्बालाइहेङ मारोकेसु। हाइदोनु स्वरगको सारभि इस्कालाइको भाअ्सिङ दोङ दोअ्खे। 17जातिङको का नेलाइहेङ दोअ्ताङका, स्वरगको सारभिहेङ जामालाइभाइपाङ मार्हुपाधाउ हासु बुङ इङकोलिअ्ता दुल्लि मानिनावा।”
धनि द्याङ रो स्वरगको सारभि
(मत्ति १९:१६-२९; मरकुस १०:१७-३१)
18इन्ता एअ्मि यहुदिगेलाइको हाकिम लोतेङ इसुहेङ हिअ्हि, “रेम्का मास्टर, हेअ्लाउ मामुअ्का जिबन निङलि का हाइपालि गोयाङका?” 19इसु वासेहेङ दोअ्हि, “ना हाइपालि कासेहेङ रेम्का दोखेना? परमेस्वर खिनिङ रेम्का हि; वा बिना बो हासु बुङ रेम्का मान्थु। 20नासेहेङ परमेस्वरको न्यामको हुकुमगेलाइ थाहादोङ हि; कासबिरि मापासु, द्याङ मासेअ्सु, माखुसु, ढाटाइतेङ दासि मापिसु कालाउ ताइको आबा आमाइहेङ आदर पासु।”#दामालाअ्का २०:१२,१३,१४,१५,१६; न्याम ५:१६,१७,१८,१९,२० 21इङको द्याङ दोअ्हि, “इदोइ गोताङ हुकुमगेलाइ ते का आतुइनासोङ मानितेङ लोकाङ हिघा।” 22इदोइ हिङतेङ इसु वासेहेङ दोअ्हि, “ना आरोङ बुङ एलोङ काम पालिगोइका हिदोङ हि। नाङकोदोफा हिका गोताङ टाका काउरि पिअ्तेङ हाइदोङ मान्थुकालाइहेङ बाखाराइपि। कालाउ खिनिङ ना स्वरगको टाका निनाना। कालाउ ना लोतेङ कासेहेङ पिताइ।” 23इदोइ काथा हिङतेङ वा हेन्जाङ मन तु:पाहि हाइदोनु वा हेन्जाङ धनि हिघाखे।
24वाको मन तु:पाका तिङतेङ इसु दोअ्हि, “खाङ, धनि द्याङहेङ स्वरगको सारभिता दुल्लि हिसिका मुस्किल जेङखे माको? 25हाइदोनु धनि द्याङ स्वरगको सारभिता दुल्काखान्तेङ उटहेङ बिन्दुको कानाता दुल्लि सुकातावा!” 26इदोइ काथा हिङकालाइ इसुहेङ हिअ्हि, “एन्सा जेङनु हासु छुटकारा निङलि द्वाङ कुनु?” 27इसु एम्बालाइहेङ दोअ्हि, “द्याङगेलाइको पालि मादोका हिदि बुङ कामगेलाइ परमेस्वर खिनिङ पालि द्वावा।”
28इङकोन्हुअ्सो पत्रुस दोअ्हि, “खाङ, केलाइ ताइको साअ्द्वार दोङ लाअ्तेङ केलाइ नासेहेङ पिताइका हिनाहि।” 29कालाउ इसु एम्बालाइहेङ दोअ्हि, “जातिङको का नेलाइहेङ दोअ्खा, स्वरगको सारभिको भाअ्सिङ जाइ ताइको आबा आमाइ, दादाओने, बेअ्, चानचामिन्दि रो साअ्द्वार लाअ्कालाइ, 30एलादोङ इङको खान्तेङ हेन्जा निनावा। कालाउ लोका जुगता हेअ्लाउ मामुअ्का जिबन निनावा।”
इसु आरोङ ताइको सिका बारेता दोअ्का
(मत्ति २०:१७-१९; मरकुस १०:३२-३४)
31इसु ताइको तेन्हे मुल चात्यागेलाइहेङ एपाहा काइपुतेङ दोअ्हि, “हिङसु, एला केलाइ यरुसलेमभारि हानिन्हाखे। इन्ता द्याङको चानको बारेता परमेस्वर पाहासो धुइकालाइ लेखिका गोताङ काथागेलाइ एला पोङघावा। 32एन्साङ वासेहेङ रिमतेङ बोजात्यागेलाइको खुरता सुमप्यावा। एम्बालाइ वासेहेङ गिल्ला पावा, लेदेरपा रो थोअ्तावा। 33कोररा लागाइतेङ कुरुसता टाङगाइतेङ सेअ्तावा। कालाउ वा सुम्निता आरोङ सिकासो सिन्हुतेङ ल्होकावा।” 34कालाउबुङ चात्यागेलाइ इदोइ काथागेलाइ एलोङबुङ मागिहि। हाइदोनु इदोइ काथाको माने एम्बालाइसो म्होअ्का हिघाहि। इदोइभाअ्सिङ इसु हाइ दोअ्हि दोअ्तेङ एम्बालाइ बिचारदोङ पालि मादोहि।
इसु कान्हाहेङ एल्पाका
(मत्ति २०:२९-३४; मरकुस १०:४६-५२)
35इसु यरिहो पुरता थुकालि तोम्लाउ एअ्मि कान्हा द्याङ दामाको भेरपा योम्तेङ र्हेतेङ हिघाहि। 36हेन्जाङ द्याङगेलाइ इङकोङ दामा पाहासो हानिका गितेङ इङको मिँ मातिङका द्याङगेलाइहेङ हिअ्हि, “इता हाइ जेङदोङखे?” 37द्याङगेलाइ वासेहेङ दोअ्हि, “नासरत दोअ्का थामेको इसु इतासो हानिदोङखे।” 38इदोइ काथा हिङतेङ इङको कान्हा द्याङ र्हिकाइतेङ दोअ्हि, “दाउदको चान इसु, कासेहेङ दाया पा!” 39आगाआगा हानिका द्याङगेलाइ वासेहेङ “सिकापा हि” दोअ्तेङ हाकाराइहि। कालाउ वा झन र्हिकाइतेङ दोअ्हि, “दाउदको चान, कासेहेङ दाया पा!” 40कालाउ इङको द्याङ र्हिकाइका हिङतेङ इसु “वासेहेङ इता चुमासु” दोअ्हि। कालाउ द्याङगेलाइ वासेहेङ इसुको भेरपा चुमालाउ इसु वासेहेङ हिअ्हि, 41“का नाङको भाअ्सिङ हाइ पापिलिगोयाङ दोअ्तेङ इछा पाखेना?” वा दोअ्हि, “प्रभु, का आरोङ मिँ तिङलि निनाको!” 42इसु दोअ्हि, “नाङको खान्धुरसो एला ना मिँ तिङका जेङन्हा।” 43उदोङघरि वा मिँ तिङका जेङहि रो परमेस्वरको मिङ तोल्हेतेङ इसुहेङ पिताइहि। इदोइ तिङतेङ झाराङ द्याङगेलाइ बुङ परमेस्वरको मिङ तोल्हेहि।
المحددات الحالية:
लुका 18: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
