लुका 17
17
इसु पाप रो खान्धुरको बारेता बिद्या
(मत्ति १८:६-७,२१-२२; मरकुस ९:४२)
1इसु ताइको चात्यागेलाइहेङ दोअ्हि, “द्याङगेलाइहेङ पापको आस्तिता देपाका काथागेलाइ ते जातिङकोङ ल्वावा। कालाउ धिकार, इङको द्याङगेलाइहेङ जाइ बोमिहेङ पाप पालि लागाइखे। 2जाइ म्हुइकालाइहेङ पाप पालि लागाइखे इन्सिकाहेङ ते निरघाता उन्ठुइको जान्ता तोइपितेङ जाहादिता थालगिल्लि दोङ रेम्का जेङधावा। 3एन्साङ होस पातेङ हिसु, नाङको ओने पाप पानु वासेहेङ गावाइ। वा पास्ताइनुते वासेहेङ माफ पि।#मत्ति १८:१५ 4कालाउ नाङको ओने नाङको खिलापता दिनाता न्हिअ्खे पाप पाखे रो वा न्हिअ्खे दोङ ताइको पाप मानितेङ परमेस्वरपाहा घुरिनु ते वासेहेङ माफ पि।”
5केलाइ इसुहेङ साल्तेङ दिङगिल्कालाइ, “प्रभु, केलाइको खान्धुर बार्हेपापि।” 6कालाउ इसु दोअ्हि, “नेलाइको खान्धुर पासाइको चालाइ झोकोका हिनुते इदोइ मिच्किरिको सिङहेङ ‘उअ्न्हातेङ ना चावान्दिता थिङन्हालि हाने’ दोअ्नुते वा मान्यावा।”
कामत्याको पालिगोइका
7 “नेलाइता हासु बुङ ताइको कामत्याहेङ हाले चोइतेङ रो भेरा घोकासो घुरितेङ लोलाउ ‘मारफा लोतेङ उम चालि योम्सु’ दोअ्स्वाना? 8भुरुङ ‘काङको भाअ्सिङ उम सार गा रो मिङतेङ कासेहेङ चालि पि। कालाउ का चालिदोतेङ खिनिङ ना चा।’ 9हाइ ताइको कामत्या दोअ्का भाइपा काम पाहि दोअ्तेङ ना इङकोहेङ च्याबास प्याना कुनु? 10एन्सा दोङ नेलाइ बुङ आर्हाइका काम पालि दोतेङ एसा दोअ्सु, ‘केलाइ ते नाङको कामत्या खिनिङ हिन्हाहि। केलाइ ते नाङको दोअ्का भाइपा खिनिङ पाका हिन्हाहि।’”
इसु तेमि रोग्याखोअ्कालाइहेङ एल्पाका
11इसु यरुसलेम हानिलाउ सामरिया रो गालिल माउजाको सिमाना जेङतेङ हानिहि। 12वा एलोङ देराता दुल्लि तोम्लाउ तेमि रोग्याल्होकालाइहेङ दुसुहि। एम्बालाइ आसा दुरे जाअ्तेङ 13बारका गालापातेङ दोअ्हि, “प्रभु इसु, केलाइहेङ दाया पा!” 14जेलाउ इसु एम्बालाइहेङ तिङहि कालाउ एम्बालाइहेङ दोअ्हि, “नेलाइ धामिकोता हानितेङ तिङपासु।” कालाउ एम्बालाइ धामिकोता हानिकाताङ पालाउ दामाताङ रोग्याखोअ्कासो एल्हि।#लेबि १४:१-३२ 15एम्बालाइता एअ्मि ताइमि एल्का गितेङ बारका गालाहोइ परमेस्वरको पारताप पातेङ घुरितेङ लोहि। 16कालाउ वा इसुको खोकोइता सेउपातेङ वासेहेङ च्याबास पिहि। इङको सामरि जातको द्याङ हिघाखे। 17कालाउ इसु दोअ्हि, “तेमि एल्का माको कुनु? बो क्हामि हिसो हि? 18इदोइ सामरिबिना बोचाहिँ परमेस्वरहेङ बाखिनलि हाइपालि मालोहि?” 19इङकोन्हुअ्सो इसु इङको सामरिहेङ दोअ्हि, “एला ल्होतेङ हाने; हाइदोनु नाङको खान्धुरसो दोङ नासेहेङ एल्पाका हि।”
स्वरगको सारभि
(मत्ति २४:२३-२८,३७-४१)
20एअ्नि फरिसिगेलाइ इसुहेङ हिअ्हि, “स्वरगको सारभि हेअ्लाउ ल्वाङ?” इसु एम्बालाइहेङ दोअ्हि, “स्वरगको सारभि तिङपातेङ माल्वाङ। 21हासुलाउ बुङ स्वरगको सारभि ‘इता हि’ कालाउ ‘उता हि’ दोअ्लि माद्वावा। हाइदोनु स्वरगको सारभि नेलाइको माझाताङ हि।”
22इङकोन्हुअ्सो इसु ताइको चात्यागेलाइहेङ दोअ्हि, “इन्सिका पहर बुङ ल्वावा; जेलाउ नेलाइ ‘का द्याङको चानहेङ एअ्नि झोको तिङलि निङलाउ बुङ जेङधाङ’ दोअ्तेङ दोस्वाना। कालाउ नेलाइ खाङलि मानिङस्वाना। 23द्याङगेलाइ नेलाइहेङ ‘इता खाङसु’ कालाउ ‘उता खाङसु’ दोअ्तावा। कालाउ एम्बालाइको काथाता खान्धुर मापासु। 24हाइदोनु जेसापा आकासता बिजुलि जोल्लाउ फाइसालाम्पा तिङखे; एन्साङपातेङ का द्याङको चान लोलाउ बुङ झाराङ द्याङगेलाइ तिनावा। 25कालाउ इदोइ जेङकाखान्तेङ लाम्फा का द्याङको चान हेन्जाङ तु: भोगिलिगोयाङ। कालाउ इदोइ पुस्ताको द्याङगेलाइ कासेहेङ इन्कार पावा। 26जेसापा नोआको पालाता जेङकाभाइपाङ का द्याङको चान लोका दिनाता बुङ एन्साङ ज्यावा।#सिरजाइ ६:५-८ 27इङको पहर नोआ जाहाजलिअ्ता मादुल्पाधाउ द्याङगेलाइ चादोङघाहि, आम्दोङघाहि रो बिहु पादोङघाहि। एन्सालाउ बारका वाइ लोतेङ बाने लोलाउ झाराङहेङ दुबिपाहि।#सिरजाइ ७:६-२४ 28एन्साङ दोङ लोतको पहरता बुङ एन्साङ जेङका हिघाहि। द्याङगेलाइ चातेङ आम्तेङ, चोलतेङपिअ्तेङ; बालि लागाइतेङ रो साअ् धाम्का काम पादोङघाखे।#सिरजाइ १८:२०; १९:२० 29कालाउ लोत सदोम लाअ्का दिना दोङ स्वरगसो मे रो गन्धक हुल्तेङ झाराङ द्याङगेलाइ सिहि। 30का द्याङको चान लोका दिना बुङ एन्साङ ज्यावा।
31 “इङको पहर साअ् बाहार हिका द्याङगेलाइ ताइ आनेमाने ओल्हिपालि साअ्लिअ्ता मादुलाको। एन्साङपातेङ मिलिङता हिकालाइ बुङ साअ्ता माघुर्याको। 32लोतको बेअ् घुरितेङ खाङलाउ मुलुकको खाम्भा जेङका काथा फोम पासु।#सिरजाइ १९:२६ 33जाइ ताइको जिबन बान्चिपालि भोकावा, वा इङको गुमाइपावा। जाइ ताइको पारान गुमाइपावा वा हेअ्लाउ मामुअ्का जिबन निनावा।#मत्ति १०:३९; १६:२५; मरकुस ८:३५; लुका ९:२४; युहन्ना १२:२५ 34हाइदोनु का नेलाइहेङ दोअ्ताङका, इङको दिलिमा एलोङ सिदाउता जिम्का न्हेमिता एअ्मिहेङ चुमप्वावा रो भेनेङहेङ लाअ्ध्यावा। 35आरोङ दोसादोसाङ योम्तेङ जान्ता म्हाइतेङहिका न्हेमि बेबालता एअ्मिहेङ चुमप्वावा रो भेनेङहेङ लाअ्ध्यावा। 36[एन्साङपातेङ मिलिङता दोसादोसाङ काम पातेङहिका न्हेमिता एअ्मिहेङ चुमप्वावा रो भेनेङहेङ लाअ्ध्यावा।”]#१७:३६इदोइ पद आधे स्रोत बाइबलता मान्थु।
37कालाउ चात्यागेलाइ इसुहेङ हिअ्हि, “प्रभु, इदोइ हिता ज्याङ?” इसु एम्बालाइहेङ दोअ्हि, “जेता सिका गुपुस हि, इन्ता दोङ सिघुनगेलाइ जोम्खे।”
المحددات الحالية:
लुका 17: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
