O ROMA 7
7
O kawingi matita hokä o dulada
1Ahi Roriadodoto! Riadodoto mata-mata nianaköka o tita. Hoʼ, ngini nihiöriki o tita makuaha o nyawa moika, imadadi duga-duga madekana o nyawa gënanga kawowango-wangohi. 2Hohitero, o ngoheka momatëngo de amirokatoka, o tita imihidinikutu amirokatika duga-duga madekana amirokata wowango-wangohi. Nako amirokata wohonengoka, ngoihekata gënanga o tita imihidodilikoika de amirokata molapahioka. 3Nako o ngoheka gënanga mowango de o nauru mahomoa maöraha amirokata kawowango-wangohi, o ngoheka gënanga yahetongo mohowono. Mä nako amirokata wohonengoka, o tita madatoro imidäenokaua. Deʼ nako muna mokawingoli de o nauru mahomoa münanga mohowonua. 4Ahi Roriadodoto, hoko genangoli mahali de ngini. Mangale o agama Yahudi matita ngini nihonengoka, karana ngini inihi rimoioka de o Kristus airöehe deʼ nidadi To ünanga kiaka wihiwangokali o honenge mahidogoronaka. Unanga wihiwangokali o honenge mahidogoronaka hupaya ngone hodadi baraguna ma Jou Madutuika nanga wowango magoronaka. 5Hababu, mahiraino ngone howango hamoteke o nyawa nangarupa de nangabiaha. O öraha gënanga o nahihu iböbaradoha, ipuda karana naga o agama matita, inahitotitila nanga diri magoronaka. Mahababu gënanga ngone hadiai o hali mahasili o honenge. 6Maöraha nanga inahidinikutokaua de o agama Yahudi matita. Ngone hohonengoka mangale o tita mahiraino inakokuaha ngone. Ngone homahi gilaongokaua de imoteke ihira-hira, imoteke o tita itötuli-tulihi. Orahananga hogilaongo imoteke madodagi maduru ma Jou Madutu ai Womaha ihidödumu-dumutu ngoneino.
O tita deʼ o baradoha
7 #
Kel. 20:17; Ul. 5:21 Nako hokogënanga, okia yakunu ngone hotemo? O agama Yahudi matita itorou? Marai kowali! Mä o tita gënanga ihïdotoko ngohi mangale o baradoha. Ngohi tohiorikua o kal̄il̄u gënanga okia, nako o agama matita yahetongua, ”Uha nikal̄il̄u.” 8Mangale de madodagi o agama matita, o baradoha yamäke o ngëkomo la yapuda hagala rupa o nahihu ikokal̄il̄u ahihininga magoronaka; hababu nako o agama matita koiwa, o baradoha maihonenge. 9Ngohi mahiraino towango de o agama matita koiwa. Mä maöraha o agama matita iböa, o baradoha imuläenge iwango 10deʼ ngohi tohonenge. O agama matita gënanga, madungutu madodihiraka mangale ihidöaka o ngango, ino de iao o honenge ngohino. 11#Kej. 3:13 Karana mangale de madodagi o agama matita gënanga, o baradoha yal̄ë o ngëkomo ihi tipu deʼ i hitoma ngohi.
12O agama matita maahali ma Jou Madutuino, deʼ moi-moi o pareta o tita gënanga magoronaka ma Jou Madutuino, hoʼ iadili deʼ yaoa. 13Aa, boteka nënanga mamangarati maoa-oa gënanga ihïgao o honenge ngohino? Marai kowali! O baradoha ihïgao o honenge gënanga. De tapäke maoa-oa, o baradoha ihïgao o honenge ngohino, hupaya mabiaha de marupa o baradoha imahi matoko madodiai. Mangale de madodagi ma Jou Madutu aipareta, imahinyata i goungu hokokia o baradoha mamodorou.
O ributu o nyawa nanga diri magoronaka
14Ngone hohiöriki o agama Yahudi matita maahali ma Jou Madutu ai Womahino; mä ngohi nënanga o nyawa tobole-bole. Ngohi ihihukunoka la todadi o baradoha magilaongo. 15#Gal. 5:17 Hababu ngohi mahirete tomangaratiua tongohi ahimanarama. O hali-o hali ngohi tönahihu tadiai, gënanga ngohi tadiaiua; mä o hali-o hali ngohi tödoha-dohata, gënanga iholoi ngohi tadiai. 16Aa, nako ngohi tadiai o hali-o hali imaroributu de ahinahihu, gënanga mamangarati ngohi tohigoungu o agama Yahudi matita gënanga yaoa. 17Hoʼ, imoteke madiai gënanga ngohi okaua tadiai, duga-duga o baradoha yakokuaha ahidiri. 18Ngohi tohiöriki maoa kamoiö de koiwa ahidiri magoronaka; enagënanga ahibiaha magoronaka hokä o nyawa. Hababu naga o nahihu ngohioka mangale o oa todiai, mä ngohi takunua tohidagi. 19Ngohi takunua todiai maoa-oa kiaka ngohi tönahihu tadodiai; i iduluyaino ngohi todiai o hali madodorou, kiaka ngohi toluku tadiai. 20Nako ngohi todiai o hali kiaka ngohi toluku tadiai, gënanga ngohiua tadiai o hali-o hali gënanga, duga-duga o baradoha yakokuaha ahidiri.
21Hoʼ, ngohi tal̄ë mademo mahohonenge, o tita nënanga ihititila; enagënanga nako ngohi tomau todiai maoa-oa, maduga-duga madodorou dika ipuda ngohioka. 22Doka ahihiningaka yöigo ma Jou Madutu aitita, 23mä ngohi tomanako ahidiri magoronaka nagaoli o tita mahomoa ihitotitila – enagënanga o titaima roributu de o tita kiaka ahidibanga marorahai ihimoteke. Mahababu gënanga ngohi hihidinikutu o baradoha matita kiaka ihitotitila ahidiri magoronaka. 24-25Aa, hokonënanga ahibiaha de ahirupa; ngohi tamoteke ma Jou Madutu aitita de tongohi ahidibanga irorahai, mä de ahi biaha o nyawa, ngohi tomahi moteke o baradohaika. Hokokia ahibodito ngohi nënanga! O röehe nënanga magoronaka ihiao ngohi o honengika, o nagona yömodeke ihihalamati ngohi? Sukur ma Jou Madutuika! Unanga wömodeke wohihihalamati mangale de madodagi o Yesus Kristus.
Currently Selected:
O ROMA 7: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002