O ROMA 6
6
Hohonenge mangale o baradoha deʼ howango horimoi de o Kristus
1Nako hokogënanga, okia hakunu ngone hotemo? Kokiani kahoko genangika dika ngone hodiai o baradoha hupaya ma Jou Madutu wonädora ngone? 2Marai kowali! O baradoha inakuahaokaua ngone, hoʼ, kayakunu kahoko genangika howango de hodiai o baradoha? 3Roriadodoto nihiorikoka maöraha ngone hatarima o gohiki madebi-debini, ngone inahirimoi de o Kristus Yesus? Nënanga mamangarati ngone inahirimoi de Ai honenge. 4#Kol. 2:12 De o gohiki madebi-debini gënanga, ngone ina hidulungunu de o Kristus deʼ homako moteke hohonenge dede Unanga, hupaya hokasarakia o Kristus o honenge mahi goronaka de iwihiwango de mangale o Ama aikuaha imomulia, hokogenangoli ngone hakunu hotagi hanonu moi o ngango mahungi.
5Nako ngone hodadioka kamoi de o Kristus hababu ngone homa komotekoka hohonenge dede Unanga, ngone aha hodadi kamoi dede Unangoli karana ngone homako moteke inahi wangokali hokä Unanga. 6Ngone hohiöriki nanga biaha ihira-hira hokä o nyawa yahohonengoka kamamoi de o Kristus o salib magotaka hupaya o nyawa nanga biaha makuaha iböbaradoha gënanga yawedere; de hokogënanga ngone hogilaongokaua mangale o baradoha. 7Karana nako womatëngo wohonenge, o nyawa gënanga o baradoha makuaha iwiparetaokaua. 8Nako ngone hohonengoka kamamoi de o Kristus, ngone hongaku ngoneö aha howango kamamoi dede Unanga. 9Hababu ngone hohiöriki o Kristus iwihiwangoka o honenge mahigoronaka deʼ Unanga ahaoli wohonengokaua; Ai diri o honenge yakuahaokaua. 10O honenge o Kristus wamäo-mäo gënanga ganga o honenge mangale o baradoha. Gënanga idadi mamoi dika de kahiado-adonika. Deʼ o ngango wanönonu o örahanënanga ganga o ngango mangale ma Jou Madutu. 11Ngini mata-mata kokianioli nianäko niadiri ihonenge mangale o baradoha, mä iwango o rimoi ikëkekete magoronaka de ma Jou Madutu, mangale de madodagi o Kristus Yesus.
12Bötohi nihigumal̄a o baradoha yakuaha niawowango ikokakaliua la Riadodoto uha niamoteke nianahihu madorou. 13Uhaoli Riadodoto nihidöaka niaröehe o baradoha makuahaika la ihi päke madungutu itotorou. Mä nihi döaka niadiri ma Jou Madutuika hokä o nyawa imatotururuoka o honenge magoronaka de o ngangoika. Nihidöaka niadiri ingodu-ngodumu ma Jou Madutuika la yapäke mangale ihidiai ma Jou Madutu aimau. 14O baradoha yakunokaua inïkuaha ngini, karana ngini niwango okaua o agama Yahudi matita matimiuku mä ma Jou Madutu aihininga maoa matimiuku.
Hogilaongo mangale ma Jou Madutu aimau
15O örahanënanga, okia mademo mahohonenge? Kai yakunu ngone hobaradoha, hababu ngone o agama Yahudi matita makuaha matimiukuokaua, duga-duga ma Jou Madutu aihayanga de Ai dora makuaha matimiuku? Hakali-kali kowali! 16Ngini nihiorikoka nako ngini nihidöaka niadiri womatëngoika la niadiai Ai mau done ngini ganga o nyawa niwihimote-moteke gënanga Ai gilaongo – bote o baradoha magilaongo iniao-ao ngini o honengika, ekola o gilaongo nimote-moteke ma Jou Madutuika, deʼ de hokogënanga nimateke oa-oali de ma Jou Madutu. 17Mä sukur ma Jou Madutuika! Hababu kahuruono ngini nidadi o baradoha magilaongo, mä orahanënanga ngini de niahininga magahumu niamoteke o dodötoko madiai inihidöa-döakoka nginika. 18Ngini o baradoha iniparetaokaua, deʼ orahananga nidadi o gilaongo mangale ma Jou Madutu aimau. 19Karana o ade-ade nitagoko niakunowahi, ngohi tapäke manonako o gilaongo hupaya ngini iholoi igapanga nimangarati. Mahiraino ngini niadiri mata-mata nihidöakoka hokä o gilaongo o hali ipese-pesekika deʼ i totorou de madungutu i totorou. Kogenangoli örahananga, kokiani ngini niadiri mata-mata nihidöaka hokä o gilaongo mangale ma Jou Madutu ai mau de mangale ma Jou Madutu Ai dungutu itebi-tebini.
20Maöraha ngini o baradoha imägilaongo, ngini inïkuahaua ma Jou Madutu aimau. 21O hali-o hali inïmal̄e-mal̄eke nidiai o öraha nënanga o utumu okia niatarima enangino o öraha gënanga? O manarama-manarama gënanga duga-duga iao o honenge! 22Maöraha nanga o baradoha inïparetaokaua, deʼ nidadi ma Jou Madutu aigilaongo. Nia utumu ganga Riadodoto niwango nitebini mangale ma Jou Madutu deʼ o hali gënanga mahasili o ngango madutu deʼ ikakali. 23Hababu o honenge ganga o baradoha mahewa; mä o wowango madutu deʼ i kakali de o Kristus Yesus nanga Jou ganga o ngongike ma Jou Madutuoka wohidöaka pöparahaja.
Currently Selected:
O ROMA 6: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002