O MIKHA 7
7
O Israel manga kalakuanga iotaka kohä gurutuku
1To bodito ngohi! Ngohi hokä o nyawa yahahahini yöiki ima pagele o hohoko maöraha ihohoko ipahaka. Koiwaka hagala o hohoko ma utu-utuoka. O angguru ma hohoko deʼ o ara ma hohoko maoa-oa mata-mata imataoka yapagele. 2O nyawa manga hininga iriko-rikoto yohihangoka o bereraka, o nyawa yo sosetia ma Jou Madutuika hä makeokauaoli. Moi-moi o nyawa yodamä o öraha mangale yo toma. Moi-moi ihiakana o modoi imahikoka nyawaika. 3Mata-mata yo sawaro yodiai o dorou magoronaka yo pangka-pangkati de o hakimi yogahoko o tiwi o urubokumu, deʼ o kawaha manga balu-baluhu ya pakisa manga mau, hoko gënanga önanga ima kinïki ima teke fakati. 4Duru yaö oa-oa deʼ duru manga hininga irö riko-rikoto onanginoö hokä o momo i rubu-rubu ma hohihika ibö baragunaua.
Maöraha yadonoka ma Jou Madutu wä hukumu Ai umati hokä wahi döakoka o hohininga onangika itilakuru Ai nabi-nabi. O öraha nënanga ipudaka o ruaë toönanga manga hidogoronaka. 5Uha niä ngaku nimakokadatekika, uha nimahi tangono nia dodiawoika. Nimahi dodiai deʼ nia demo-demo ngaroka ihi gihe-gihene ganga nia hekata mahirete. 6#Mat. 10:35-36; Luk. 12:53 Hababu, maöraha hokä hoko nënanga o tau manyawa imä teke haturu: o ngohaka o nauru yahikauku manga ama, o ngohaka o ngo heka yalawani manga ayo, deʼ ngomi hunungu o ngohëka imalawani deʼ ngomi hunungu o ayo.
7Mä ngone hïnganono ma Jouika; deʼ nanga ngongaku itö totomo ngone hidamä tongone nanga Jou Madutu. Unanga aha woihene tongone nanga niata deʼ wonahihalamati ngone.
Ma Jou wo na hi halamati
8Koiwa mahohol̄e mangale tongone nanga haturu-haturu yo morene mangale ngone hobinaha. Hababu ngaroka ngoneino ina otaka, ngone aha homomikoli. O öraha nënanga ngone naga o huhutu ma goronaka, mä ma Jou aha wona tararono ngone. 9Ngone hobaradohaoka ma Jouika, karana gënanga o öraha nënanga ngone kiani hamao Ai gangamo. Mä itedekanokaua oli Unanga aha wonä demo ngone deʼ wonahidöaka o adili ngoneino. Unanga aha wonä ao wona hihupu o dararonika; ngone aha hamao mahirete Unanga wona hihalamatoka ngone. 10Mahira o haturu inä hikauku ngone deʼ yotemo, ”Kiaka ma Jou, o Jou Madutu gënanga?” Mä o öraha nënanga önanga aha yamake okia wadodiai ma Jou mangale ngone, deʼ önanga aha idadi yamal̄eke, Ngohe aha hahakihi tongone nanga haturu-haturu gënanga wa hohihanga deʼ wa pito-pitoko hokä o pëseke o ngekomoka.
11Hei Yerusalem! Maöraha iboaoka ngini nihi gokookali nia kota ma bebeno-bebeno o mehele. O wange gënanga nia daira aha i amokika. 12Hagala nia nyawa aha yolio nginika kiaino honanga – o Asyur o wange ma hiwaroko deʼ yaiha, o Mesir o koreharail̄e idaduoka deʼ yauku, o Efrat ma Ngairi ma dairaoka deʼ yaino, o ngöto ma honongaka deʼ yaino deʼ hagala o l̄oku ma gogurutoka deʼ yaino. 13Mä dunia aha idadi itoongoro karana manyawa manga dorou.
O Niniata magogahoko ma Jou Ai dora deʼ ai hayanga o Israelika
14Ya Jou, nä goana Ani umati, Ani ngongikiri ma umati. Onanga yo gogere yo kurutika deʼ mahomoa o hongana mahai-haitoka, o tonaka iboburere mahidogoronaka. Mal̄aika önanga ima make o inomo o Basyan deʼ o Gilgaloka mamomo matonaka malua-luasoka hokä maöraha mahira.
15Nadiai ihö hera-heranga mangale ngomi, ya Jou, hokä nadodiai mahira maöraha Ngona nomi ao ngomi o Mesiroka de mi hupu. 16Hagala o hoana deʼ o berera ma ago-agomo aha yamake o hali gënanga deʼ idadi yä mal̄eke karana yamao hagala toönanga manga kuata okia-okiaua ma mangarati. Onanga aha ihihanga manga akali hiädono yakunua yo temo ekola yoihene. 17Onanga aha ima tahe-tahe o tonakoka hokä o dodiha. De manga hawana deʼ yohahara önanga aha yohupu toönanga manga bebeno imahi tatatokino, daha yoböa Ngonaika, ya Jou tongomi mia Jou Madutu.
18Koiwa o Jou Madutu hokä Ngona, ya Jou, na ä apo-apongo Ani umati na iri-iriki mahou-houohi manga baradoha. Mangale kahi ado-adonikaua Ngona nongamo; idulu yaino, Ngona nosanangi nohi dumutu Ani hayanga koiwa-iwa ma batingi gënanga. 19Ngona aha ani hayanga deʼ Ani doraoli ngomino deʼ nomihi apongo ngomi. Hagala tongomi mia baradoha aha Na pito-pitoko deʼ No hikaweli o ngöto ma bukuuku! 20Ani umatika, o Abraham deʼ o Yakub manga difauku, Ngona aha nohidumutu Ani setia deʼ Ani hayanga ko ö iwa-iwa mabatingi gënanga hokä nohi jä jaji tongomi mia ete deʼ mia tohoraika mahira.
Currently Selected:
O MIKHA 7: TLB
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ LAI 2002