Hosheya 9
9
Yɛnɛ̂ nzem e vwêl Israyɛl
1À yin BeIsrayɛl, yin kwon vɔk yey pyɛng wɛt!
Yin ra nzem sede bwang yére bemat jey wɛt.
Yin a ga lashe weneng na Dagwi min,
yin a ga ra nedeneves.
Yin a rɛsɛl bato min na cī sede bedebeves,
yin a sap yɛ e kawɛ gazu.
2Pyɛ̂ yeneng e gazu
na nshî anap e kwɔ̂n piri mo yê vey a yin wɛt,
ko nshî anap nepas nê tala hɛn.
3BeIsrayɛl bê nàra e vwêl Dagwi Darwey wɛt.
BeƐfrayim behak bê to ɛn vɔk e Misra,
behak arɔng vɔk e Asirya,
ko yɛn ê re pyɛ̂ kyìri e hwomo.
4E hwomo yɛn ê tɔk nára a Dagwi Darwey nɔrɔ̂ nshî anap wɛt,
ko yɛn ê tɔk nára nenɔrɔ̂ yas de nê pɛngɛ a yɛ yey wɛt arɔng.
Pyɛ̂ re mɛn yê tɛ̀ kawɛ mwat de a re yɛ ligis,
sede jàne.
Yɛn ê re yɛ na be kwɔshɔ mɛ vyong zɔng,
bê tɔk wɔ na cak e Gbɔng Duk Re Fongôl Dagwi Darwey wɛt.
5Ko yɛn ê ra sɛ́ tuk wusal,
tûk nzem Dagwi Darwey ɛ?
6Yaga ka yɛn a ka hywit ɛn yi e gawey,
ko BeMisra bê tula hɛn,
BeMɛmfis bê lɛsɛ hɛn.
Mwa pyɛ̂ nedanerey mɛn yê dyam pyɛng e nelɔ mɛn,
gwòsɔng na batîn rɔgɔ bê bang yɛ.
7Jeng tabak hɛn ya ga vey, na jeng tala hɛn arɔng,
ko BeIsrayɛl bê tɔk yɛ!
Zarap Dagwi a ga tɛ́ ɛ tɔn,
ko mwat de a vɔk Gabik Dagwi a ga tɛ́ ɛ mwât lolong,
gbɔng banɛn min na gbɔng repugu min ba tɛ̀ a ra ano.
8Zarap Dagwi
a sé mwât bɛrɛng BeƐfrayim, bemât Dagwi hom.
Ko kahɛ kwɔn de a wɔ́ ɛ, yɛn e rene hɛ sede gwonon.
E ji Gbɔng Duk Re Fongôl Dagwi mwa, bê jut ɛ sede mwât repugu mɛn.
9Yɛn a dura neves sizɔng sede ba ra e Gibeya.#9:9 sede ba ra e Gibeya: Di Besuga 19-20.
Dagwi ê bare na banɛn mɛn na a tabak hɛn.
A sé a Dagwi Darwey shagarak na bemat mɛ
10Dagwi Darwey a ye:
“Jeng de ma tanga sɛ̀ BeIsrayɛl,
a sé sede mwat a sɛ̀ batîn anap e hey.
Jeng de ma di bedabeda min,
a sè sede dî nèy regwi ne mɛsɛng de na tanga vel nahywɛp.
Ko jeng de yɛn á wul Raku Peyor,
yɛn á hwo re a Baal fongol.
Yɛn a tɛ́ ɛn ligis
sede cī de yɛn a tɛ̀ yey na yɛ.
11Nerêy Ɛfrayim nê sogo yi na yɛn sede gwonon,
vit a tɔ̂s nèy, vit a vɔ̂k jim, vit a sêy yɛ arɔng.
12Ka yɛn a ka ras nèy o,
ko mê wey na nɛ gyam ne tɛ́ ɛn bewen.
Gawey e ra yɛn jeng de mê ye waa à hɛn!
13Ma di de nèy BeƐfrayim na ga tɛ́ ɛn pyɛ̂ jugu,
ko yɛn a ras ne na ne ba kushu zɔng.
14À Dagwi Darwey, nɔ́ng ɛn pyɛ de hwà yong a yɛn.
Tɛ̀ beha mɛn be paa nejim, ko nevasal mɛn ne sè pákpak.
15Yɛn a hwo ra neves mɛn mwa e Gilgal.
A sé e hwomo de ma hwo kyɛ́ mɛ hɛn.
Ko yaga neves de yɛn a ra,
mê ro ɛn yi e lɔ hom.
Mê to tɛ̀ yey na yɛn wɛt,
yaga mwa bemat nuyel mɛn ba sé vê sógo nehywɛ.
16BeƐfrayim ba sé sede cɔgɔt de berinis o ba ga hworok,
ko ye to tɔs nèy wɛt.
Yɛn ê vɔk nèy wɛt,
ko ka yɛn a ka tɔs nèy, mê mɔbɔs nèy yey mɛn o.”
17Dagwi hom ê kyɛ́ ɛ bemat mɛ,
yaga yɛn a kyɛ́ ɛn nà gyeng ha mɛ.
Yɛn ê tɛ́ ɛn bemat de be kyě gǎ
e ji yére bemat jey.
Currently Selected:
Hosheya 9: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust