Hosheya 10
10
1BeIsrayɛl bá kana sè sede retîn anap
de ra mara nèy pyak.
Sede yɛn á gwɛ̌ tɔs nèy
ko yɛn á gwɛ̌ lɔkɔs nekwɔn nása nenɔrɔ.
Sede vwel mɛn ha gwɛ̌ pyɛ́,
ko yɛn a gwɛ̌ yông beta gacik.
2Neyey mɛn na gas ɛn
ko e yɛn ê sɔ tabak o.
Dagwi pyɛ mɛ ê gangas nekwɔn nása nenɔrɔ̂ mɛn,
ko ê wey na beta gacik mɛn o arɔng.
3Bemat o bê ye:
Wot a to vɔk gbɔng gwɔ̀m wɛt.
Wot e sap Dagwi Darwey wɛt,
ko e sɛ́ de gbɔng gwɔ̀m o ê kyɛm a ra a wot ɛ?
4Yɛn e ha neha zɔng-reng,
ko be sisa hɛn na bɔs.
Râ shɔt vyes yê gwɛ̌ sede sɔ̂ng nedɔm
e hwiri de ba ga kana how.
Bê jugu cî Samariya
5Bemât Samariya bê vow na bengyip,
ko bê tosho mus dyam shinang Bet-Avɛn,#10:5 Bet-Avɛn: Di tin 4:15. de ba ga wey na wɛ.
Yɛn na bepiris mus o bê dak sekun,
jeng de ba ga paa gbɔng nerât wɛ.
6Bê kyè na pyɛ mo vɔk e Asirya
na be wɔ̀ nɔ̂ng Da Vwel o.
BeIsrayɛl bê wok rekyên pyɛ de ba yong.
7Gbɔng gwɔ̀m Samariya ê tɛ́ ɛ
sede bak cɔgɔt de wo tele tǎlu e ra nshi.
8Bê wey na nekwɔn rê fongol berahwol Avɛn
de BeIsrayɛl be ragas ɛ banɛn.
Batîn rɔgɔ na shik
bê bang nekwɔn nása nenɔrɔ mɛn o.
E jeng o, bê dɛrɛ beraku, na be bang ɛn,
ko bê tâng berahwol be lɛrɛ hɛn.
Pyɛ de hwà tus hwô yɛt bwal o
9À yin BeIsrayɛl, yin a ga tik ra a me banɛn wɛt,
yimo jeng de yin á hwo ragas vɛ e Gibeya.
E hwomo yin á kana yong in yaga como,
ko sɛ̌ como yê hwo e ra yin e hwomo wɛt a?
10Mê hwo bemât banɛn vemo na como na me tabak hɛn.
Yére bemat jey yê wuna hɛn e ra yɛn,
ko yɛn ê sey pyɔlɔ̂ nepyak banɛn mɛn.
11Ɛfrayim á sè sede shep ngyi de ba ga gbat yɛ,
ya sé e yong ɛ na ye bɔrɔs pyɛ̂ yeneng e gazu.
Ko ma di rafwɔ yɛ wa sé rwat,
ko ma tɛ̀ a yɛ swesêk vɔk berɔndɔng.
Mê tɛ̀ Ɛfrayim a ra fwom negbang,
mê tɛ̀ Yuda a hwɔlɔ rôn tôw bwi,
ko Yakɔp a dak balê bwi mo.
12Ma ye: “Hów in cap pyas pyɛ min,
tus in necik, na yin ba yɛt bwâl tsak tɛ̂ yey.
Jeng ya ga vey na yin a jama Dagwi Darwey,
ko yɛ ê vey, na a shusha gâs badu e tē e ra yin.
13Yin a tus neves ko yin a yɛt bwâl banɛn.
Yin a ga re nèy bɔs min.
Yin a tɛ̀ gap min e ra bekyɛkyɛ bedwa,
na e ra nepyak bemât como min.
14Yaga ano nekpɛɛ como nê hwo e ra bemat min,
ko bê wey na mwa nekwɔn dál min.
Ê sè sede tuk de Gbɔng Gwɔ̀m Shalman
a wey na repomo Bet-Arbɛl na como,
ko ba mɔbɔs beneng na mwa nèy mɛn.
15Pyɛ de yê té na yin à yane, à yin bemat Bet-Ɛl,
yaga gbɔng neves de yin a ga ra.
Ras de bê hwo como mo e rwa hwol gasi,
bê wey na gbɔng gwɔ̀m Israyɛl vit.”
Currently Selected:
Hosheya 10: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust