JOSUA 13:1-6
JOSUA 13:1-6 Bybel vir almal (ABA)
Toe Josua baie oud was, het die Here vir hom gesê: “Jy is baie oud, en julle het 'n groot deel van die land nog nie oorwin en vir julleself gevat nie. Die deel van die land wat oorbly, is al die grond van die Filistyne en die Gesur-mense. Dit is 'n deel van die land Kanaän, en dit is die grond van die Sigor-rivier naby Egipte tot by die stad Ekron in die noorde. Die grond van die vyf leiers van die Filistyne wat regeer oor die stede Asdod, Askelon, Gat, Ekron en Gasa is 'n deel van die land. Daar is ook nog die hele land van die Kanaäniete wat begin by die stede Teman en Meara en wat aan die mense van die stad Sidon behoort. Dit is die grond tot by die stad Afek, die grond van die Amoriete begin daar. Daar is ook die land van die mense van die stad Gebal en die oostelike deel van die Libanon-berge, van die stad Baäl-Gad suid van Hermon-berg tot by die stad Lebo-Hamat. Die Sidon-mense woon in die Libanon-berge tot by die stad Misrefot-Majim. Ek sal hulle almal ook wegjaag om plek te maak vir die Israeliete. Maar jy moet lootjies trek om die land vir die Israeliete te gee, jy moet doen soos Ek vir jou gesê het.
JOSUA 13:1-6 Afrikaans 1933/1953 (AFR53)
EN toe Josua oud en ver op sy dae was, het die HERE vir hom gesê: Jy is oud en ver op jou dae, en daar het nog 'n baie groot stuk land oorgebly om in besit te neem. Dit is die land wat oorgebly het: Al die landstreke van die Filistyne en al die Gesuriete, van die Sihor aan die kant van Egipte af tot by die grens van Ekron na die noorde, wat as Kanaänities gereken word; die vyf vorste van die Filistyne: dié van Gasa en dié van Asdod, dié van Áskelon, dié van Gat en dié van Ekron, en die Awiete in die suide; die hele land van die Kanaäniete en Méara wat aan die Sidoniërs behoort, tot by Afek, tot by die grens van die Amoriete; en die land van die Gibliete en die hele Líbanon aan die oostekant, van Baäl-Gad af, onderaan die berg Hermon, tot by die ingang na Hamat. Al die bewoners van die gebergte, van die Líbanon af tot by Mísrefot-Maim, al die Sidoniërs — Ek self sal hulle voor die kinders van Israel uit verdrywe; laat dit net as erfdeel aan Israel val soos Ek jou beveel het.
JOSUA 13:1-6 Afrikaans 1983 (AFR83)
Josua was al baie oud. Die Here het vir hom gesê: “Jy is al baie oud, en daar is nog 'n baie groot deel van die land wat in besit geneem moet word. “Onder die deel wat oorbly, is daar al die Filistynse gebiede en die hele Gesurgebied. Die gebied van die Sigor af teen Egipte tot by die Ekrongebied in die noorde word as Kanaänitiese gebied beskou. Dit is die gebiede van die vyf Filistynse regeerders, dié van Gasa, Asdod, Askelon, Gat en Ekron, en dit sluit die gebied van die Awwiete in. “Verder is daar die hele Kanaänitiese gebied van Teman af, die Gebalgebied van Meara af wat aan die Sidoniërs behoort, tot by Afek aan die Amoritiese grens en die hele Libanon aan die oostekant, van Baäl-Gad suid van Hermonberg af tot by Lebo-Hamat. “Ek sal al die bewoners van die bergwêreld verdryf om vir die Israeliete plek te maak, van die Libanon af tot by Misrefot-Majim, al die Sidoniërs. Intussen moet jy hierdie gebiede as besitting aan Israel toewys soos Ek jou beveel het.
JOSUA 13:1-6 Die Bybel 2020-vertaling (AFR20)
Toe Josua oud en gevorderd in jare was, het die HERE vir hom gesê: “Jy is oud en gevorderd in jare en 'n baie groot deel van die land wat in besit geneem moet word, is nog oor. Die volgende is die gebied wat nog oorbly: al die distrikte van die Filistyne en die hele gebied van die mense van Gesur; van die Sigor af wat langs Egipte lê, noordwaarts tot by die gebied van Ekron. Dit word as Kanaänitiese gebied gereken, naamlik die gebied van die vyf Filistynse regeerders van Gasa, Asdod, Askelon, Gat, en Ekron, en van die Awwiete. Vanaf die suide is dit die hele land van die Kanaäniete, en vanaf Ara, wat aan die Sidoniërs behoort, strek dit tot by Afek, by die grens van die Amoriete. Verder is daar die gebied van die mense van Gebal, en die hele Libanon aan die oostekant, van Baäl-Gad af onder aan die voet van die berg Hermon tot by Lebo-Hamat. Al die inwoners van die bergland, van die Libanon af tot by Misrefot-Majim, al die Sidoniërs – Ek self sal hulle voor die Israeliete verdryf. Laat dit in elk geval as erfdeel aan Israel toeval, soos Ek jou beveel het.
JOSUA 13:1-6 Contemporary Afrikaans Bible 2023 (CAB23)
En Josua was oud en verdruk in jare; en die HERE sê vir hom: Jy is oud en verdruk in jare, en daar is nog baie land oor om in besit te neem. Dit is die land wat nog oor is: al die gebiede van die Filistyne en die hele Gesuri, Van Sihor af wat voor Egipte lê, tot by die grense van Ekron, noordwaarts, wat tot die Kanaäniete gereken word: vyf vorste van die Filistyne; die Gasatiete en die Asdotiete, die Eskaloniete, die Gittiete en die Ekroniete; ook die Aviete: Van die suide af, die hele land van die Kanaäniete en Meara wat naas die Sidoniërs is, tot by Afek, tot by die grense van die Amoriete; En die land van die Gibliete en die hele Líbanon, teen sonop, van Baälgad onder die berg Hermon af tot by die ingang na Hamat. Al die inwoners van die gebergte van die Líbanon af tot by Misrefotmaim, en al die Sidoniërs, hulle sal Ek voor die kinders van Israel uit verdrywe; verdeel dit net deur die lot aan die Israeliete as 'n erfdeel, soos Ek jou beveel het.
JOSUA 13:1-7 Die Boodskap (DB)
Teen dié tyd was Josua al baie oud. Daarom het die Here vir hom gesê: “Jy is nou al baie oud, maar daar is nog ’n groot deel van die land wat ingeneem moet word: die hele grondgebied van die Filistyne en die Gesuriete. Ook die deel van hierdie gebied wat aan die Kanaäniete behoort. Dit is die gebied wat strek van die Sigorrivier af aan die oosgrens van Egipte en noordwaarts tot by die grens met Ekron. Dit sluit in die vyf Filistynse dorpe Gasa, Asdod, Askelon, Gat en Ekron, asook die gebied van die Awwiete in die suide. Die res van die Kanaäniete se gebied moet ook nog ingeneem word, insluitend Meara wat aan die Sidoniërs behoort en verder noordwaarts tot by Afek aan die Amoritiese grens; die gebied van die Gebaliete; asook die hele Libanon aan die oostekant, van Baäl-Gad suid van die Hermonberg af tot by Lemo-Hamat. Dit sluit ook die hoër bergagtige gebiede van die Libanon af tot by Misrefot-Majim in. Ek sal al hierdie mense uit hulle gebiede wegdryf sodat die Israeliete daar kan gaan bly. Wat jy moet doen, is om te sorg dat die hele land onder die halwe Manassestam en die ander nege oorblywende stamme verdeel word volgens my opdrag aan jou.
JOSUA 13:1-6 Nuwe Lewende Vertaling (NLV)
Josua het oud geword. Die HERE het vir hom gesê: “Jy het aangestap in jare en baie van die land is nog oor om in besit geneem te word. Die deel van die land wat oorbly, is al die gebiede van die Filistyne en van Gesur. Die gebied van die spruit van Sigor af teen die grens met Egipte tot by die Ekrongebied in die noorde is Kanaänitiese gebied. Dit is die gebiede van die vyf Filistynse regeerders van Gasa, Asdod, Askelon, Gat en Ekron. Daar is nog die gebied van die Awwiete in die suide. “In die noorde is daar die hele Kanaänitiese gebied van Teman af, Meara, wat aan die Sidoniërs behoort, noord tot by Afek aan die Amoritiese grens. Dan is daar die Gebalgebied en die hele Libanongebergte na die oostekant, van Baäl-Gad suid van Hermonberg af tot by Lebo-Hamat. Al die bewoners van die Libanonberg af tot by Misrefot-Majim, al die Sidoniërs, sal Ek tussen die Israeliete uit verdryf. Sorg dat hierdie gebiede as erfgrond na Israel toe kom, soos Ek jou beveel het.