A-pûn Awang 14
14
Lot Lé Abram Hkyi Yu É Hkyô
1Haú yòq haú bun má, Shina#14:1 Shina gi, Babeloni-a mau lé gâ lhê. Bun zo 9 mâ é le rajung za nghut lhê. hkóhkâm Amrahpela, Elasa hkóhkâm Ari-ok, Elam hkóhkâm Hkedala-uma, Go-im hkóhkâm Htidala pé gi, 2Sodom hkóhkâm Bera, Gomora hkóhkâm Birisha, Adama hkóhkâm Shinap, Zeboyim hkóhkâm Shemeba eq, Zora le gâ é Bela é hkóhkam pé lé, majan ê zân akô nghut ri. 3Htâng mâ é hkóhkâm shí bang gi, Sidim Jangdîng hkaû má gyèwum tsîng akô nghut ri. (Sidim gâ é gi, Xo Nhông lé gâ é nghut lhê.) 4Yhángmòq gi, 12 zân yhang Hkedala-uma èq ùp zô é huî nyi akô; nghut kôlhang, 13 zan zàn má gi, yhángmòq gumlau toq bekô nghut ri.
5Raxe myí zan zàn má, Hkedala-uma gi, yhâng htâng dàp é hkóhkam pé eq htoq ê mù, Ashiterot Kerina-im má Rehpim byu pé lé, Ham má Zuzim byu pé lé, Shawe Kiri-ahtim má Emim byu pé lé, 6Se-ira bum mau má Hori byu pé lé le majan zân ung pyám mù, haû yòso nàm mâ é Ela Paran jé shoq châng hkat akô nghut ri. 7Hau htâng, yhángmòq gi, Kadesha le gâ é En Mishipat má taû jé mù, Amalek byu pê é mau gón lé le, Hazezon Tamari má nyi é Amori byu pé lé le zân ung yù bekô nghut ri.
8Haû mù, Sodom hkóhkâm, Gomora hkóhkâm, Adama hkóhkâm, Zeboyim hkóhkâm, Zora le gâ é Bela hkóhkam pé gi, yán htoq ê mù, Sidim Jangdîng hkaû má majan lhom zân akô nghut ri. 9Yhángmòq gi, Elam hkóhkâm Hkedala-uma, Go-im hkóhkâm Htidala, Shina hkóhkâm Amrahpela, Elasa hkóhkâm Ari-ok pé lé lhom zân akô nghut ri; haû mù, hkóhkâm myi yuq gi, hkóhkâm ngo yuq lé majan zân ri. 10Haû Sidim Jangdîng hkaû má gi, hkabap dong pé byíng tô é nghut mù, Sodom eq Gomora hkóhkam pé hpâng kô é hkûn, ra-am gi, dong pé má byìt gyó wâng kômù, myìt gyó tô é bang gi, bùm pé shut hpang dòq ló bekô nghut ri. 11Haû hkóhkâm myi yuq gi, Sodom eq Gomora wà byu pê é zè bànshoq lé le, haú bâng é zoshuq bànshoq lé le wó lú sing yù kômù, ló byùq bekô nghut ri. 12Abram é yhang gû yhang zo Lot gi, Sodom má nyi é nghut mù, yhang lé le, yhâng é sùtzè pé lé le, haú bâng èq shuî yu ló bê nghut ri.
13Wó hpang lùt lo é byù rayùq gi, Hebre byù Abram lé haú hkyô hkyang lo shit ri. Ahkuî, Abram gi, Eshihkola eq Anera nhik é gu-mang, Amori byù Mamre gá su é jowò mâ é wàqmyòq gàm mó pê é nàm má nyi tô ri. Haú bang bànshoq gi, Abram eq xoq ge tô é bang chyat nghut akô. 14Abram gi, yhang gû yhang zo shúm dông shuî ló byùq bê gâ é lé wó gyo jáng, yhâng yhûm má hkû mù, yhang mhoq ge tô é byù 318 yùq lé wùt yù luî, Dan wà jé shoq shuî châng hkat bê nghut ri. 15Myín lé, Abram gi, yhâng é byù lé gàm mù, haú bang lé ê htîm pyo kat luî, Damasikuq wà mautsûng hkyam shut mâ é Hoba wà jé shoq châng hkat bekô nghut ri. 16Yhang gi, azíng zê bànshoq lé le, yhang gû yhang zo Lot eq yhâng é zè pé lé le, myiwe wuì lé le, gótû byu pé lé le shuî taû yu lò bê nghut ri.
17Abram gi, Hkedala-uma lé le, haú yùq htâng dàp é hkóhkam pé lé le ung pyám luî, taû lo é hkûn, Sodom hkóhkâm gi, Hkóhkam é Langhkaû le gâ é Shawe Langhkaû má, yhang lé lhom hui râ ga htoq lé lo ri.
18Haú hkûn, Salem#14:18 Salem gâ é gi, Yerusalem lé gâ é nghut lhê. hkóhkâm Melahkizedek gi, mùk long eq tsibyiq wing yu lé lo ri. Yhang gi, Myhang htáng Garai Gasâng é hkyangjong nghut luî, 19Abram lé shimân byî é gi,
“Mauhkûng eq myigùng lé hpân Sû#14:19 Hpân Sû gâ é lé sîng Sû le wó gâ lhê; bun zo 22 mâ é le rajung za nghut lhê.,
Myhang htáng Garai Gasang gi, Abram lé shimân byi sháng gàq.
20Náng é gye pé lé, náng é lòq má àp byî é,
Myhang htáng Garai Gasang gi, hkungsô wó nyî sháng gàq.” gâ ri.
Haú hkûn, Abram gi, wó lo é jung hkangmó mâ é, xê gàmbùm mâ é ragàmbùm, yhang lé byî ri.
21Haû Sodom hkóhkâm gi, Abram lé, “Ngá é byù lé gi, ngo lé byi aq; azíng zê pé lé gi, náng é matú yu to aq.” ga taî ri.
22-23Nghut kôlhang, Abram gi, Sodom hkóhkâm lé, “Nàng mai, ‘Ngò gi, Abram lé wó nhang é nghut lhê.’ ga, hkâ-nhám le a wó taí sháng gàq nghû, ngò gi, mauhkûng eq myigùng lé hpân Sû, Myhang htáng Garai Gasang, haû Yhûmsîng Garaî é hí má, nàng eq sêng é haî le a yù, hkyîng rahkat eq hkyî-tsung tui rahkat lháng yù râ a nghut nghû, ngá é lòq tû mù, dâkam to bê nghut lhê. 24Ngò gi, ngá é zorâm wuì zô pyám bê eq, ngá htâng cháng bang nghut é, Anera, Eshihkola, Mamre pé eq sêng é gàmbùm mai lai luî, haî le yù râ a nghut. Yhángmòq é gàmbùm gi, yhángmòq yù kó sháng gàq.” ga tû taî ri.
Tans Gekies:
A-pûn Awang 14: znot
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2025, Wycliffe Bible Translators, Inc.
